ភ្នំពេញ ៖ បុរសម្នាក់សង្ស័យមានពេលទំនេរចុងសប្តាហ៍ ផឹកសុីស្រវឹង ជោគជាំ រហូតគ្រប់គ្រងខ្លួនឯងលែងបាន ព្យាយាមបើកបរម៉ូតូ ទីបំផុតជួបគ្រោះបានសម្រេច មូ៉តូហោះឆ្លងប្រឡាយ ទៅបោកផ្ទប់ជញ្ជាំងថ្ម បណ្តាលឲ្យរងរបួសធ្ងន់ កាលពីវេលាម៉ោង១០យប់ថ្ងៃទី២៥ ខែកុម្ភៈ ឆ្នាំ២០១៧ ស្ថិតនៅតាមបណ្តោយផ្លូវបេតុង ត្រង់ចំណុចភូមិស្រៃជម្រៅ សង្កាត់ចោមចៅ ខណ្ឌពោធិសែនជ័យ ។
ជនរងគ្រោះ មានឈ្មោះ រុន ហុីម ភេទប្រុស អាយុ២០ឆ្នាំ មុខរបរ កម្មកររោងចក្រ ស្នាក់នៅផ្ទះជួល សង្កាត់ចោមចៅ ខណ្ឌពោធិសែនជ័យ មានស្រុកកំណើត ខេត្តកំពង់ស្ពឺ រងរបួសសន្លប់ស្តូក ។ ជនរងគ្រោះជិះមូ៉តូមួយគ្រឿងម៉ាក ហុងដា សេ១២៥ សេរី២០១៦ ពណ៌ខ្មៅ ពាក់ស្លាកលេខ ភ្នំពេញ 1GB-7324 ។
តាមប្រភពនៅកន្លែង បានឲ្យដឹងថា មុនកើតហេតុ គេឃើញជនរងគ្រោះ ជិះមូ៉តូល្បឿនលឿន តែម្នាក់ឯង បានទាំងរោទ៍ម៉ាសុីនមូ៉តូផង ក្នុងស្ថានភាពស្រវឹងជោគជាំ មិនដឹងមកពីផឹកសុីទីណានោះទេ បន្ទាប់ពីទំនេរចុងសប្តាហ៍ បើកបោះពួយ តាមផ្លូវបេតុង ពីកើតទៅលិច លុះដល់ចំណុចខាងលើ ដោយសារអំណាចនៃជាតិស្រវឹង ធ្វើឲ្យជនរងគ្រោះ គ្រប់គ្រងខ្លួនឯង ដៃចង្កូតលែងបាន ទើបមូ៉តូហោះឆ្លងប្រឡាយ ទៅបោកផ្ទប់នឹងរបងថ្ម បណ្តាលឲ្យរងរបួសធ្ងន់ សន្លប់ស្តូក ។
ក្រោយកើតហេតុ ជនរងគ្រោះត្រូវបានប្រជាពលរដ្ឋហៅរថយន្តសង្រ្គោះសង្រ្គោះរបស់អង្គភាព៧១១ ដឹកបញ្ជូនទៅមន្ទីរពេទ្យព្រះកុសុមៈ ចំណែកមូ៉តូត្រូវបាននគរបាល យកទៅរក្សាទុកនៅប៉ុស្តិ៍ចោមចៅ រងចាំប្រគល់ជូនជនរងគ្រោះវិញពេលក្រោយ ៕