ភ្នំពេញ ៖ បុរសចំណាស់ម្នាក់រងរបួសធ្ងន់ បាក់ជើងឆ្វេង និងបែកភ្នែកឆ្វេង ចំណែកចៅស្រីម្នាក់ទៀត រងរបួសបាក់ជើងឆ្វេង បន្ទាប់ពីជិះមូ៉តូកំពុងឆ្លងផ្លូវត្រូវបានរថយន្តបែនមួយគ្រឿងបើកបោះពួយ ល្បឿនលឿនជ្រុល ទៅបុកកិនអូសជាង១០ម៉ែត្រ កាលពីវេលាម៉ោង២និង១៥នាទីរសៀល ថ្ងៃទី២៦ ខែកុម្ភៈ ឆ្នាំ២០១៧ ស្ថិតនៅតាមបណ្តោយផ្លូវ៣០ម៉ែត្រ មុខច្រកចូលផ្សារបុរីសន្តិភាព២ ភូមិតំណាក់ត្រយឹុង សង្កាត់ចោមចៅ ខណ្ឌពោធិសែនជ័យ ។
ជនរងគ្រោះ មានឈ្មោះ សូរ សុខា ភេទប្រុស អាយុ៥១ឆ្នាំ ម៧ខរបរកសិករ មានទីលំនៅភូមិតំណាក់ត្រយុឹង ក្បែរកន្លែងកើតហេតុ រងរបួសបាក់ជើងឆ្វេង បែកភ្នែកឆ្វេង ចំណែកចីស្រីម្នាក់ទៀត រងរបួសបាក់ជើងឆ្វេង ។ ជនរងគ្រោះជិះមូ៉តូមួយគ្រឿងម៉ាក ហុងដា គុបជ្រុង សេ៩០ ពណ៌ទឹបិ៊ច ពាក់ស្លាកលេខ ភ្នំពេញ 1X-7379 ។ ចំណែករថយន្តបង្ក ម៉ាកនីសាន់ ប្រភេទបែន កង់៦ ពណ៌ ស ពាក់ស្លាកលេខ ចង្កូតស្តាំ PP-0665 បើកបរដោយឈ្មោះ វ៉ាន់ ដា ភេទប្រុស អាយុ២៣ ឆ្នាំ មុខរបរបើកបររថយន្ត ស្នាក់នៅផ្ទះថៅកែលក់គ្រឿងសំណង់ ភូមិទ្រា២ សង្កាត់ស្ទឹងមានជ័យ ខណ្ឌមានជ័យ មានស្រុកកំណើត ស្រុកសំរោង ខេត្តតាកែវ ។
តាមប្រភពពីប្រជាពលរដ្ឋឃើញហេតុការណ៍បានឲ្យដឹងថា មុនកើតហេតុ ជនរងគ្រោះជិះមូ៉តូ មានឌុបចៅស្រីតូចម្នាក់ពីក្រោយផង ជិះចេញពីផ្សារបុរីសន្តិភាព២ គោលបំណងឆ្ពោះទៅផ្ទះ ខណៈដែលកំពុងបើកឆ្លងផ្លូវពីត្បូងទៅជើង ស្រាប់តែរថយន្តបង្ក បើកបោះពួយល្បឿនល្បឿន បន្ទាប់ពី ផ្លូវ៣០ម៉ែត្រទើបស្ថាបនាហើយថ្មីៗផង ល្បឿនមិនចាំបាច់ជាន់ហ្វ្រាំង ជ្រុលមកបុកមូ៉តូជនរងគ្រោះ ហើយកិនអូសជាង១០ម៉ែត្រ បណ្តាលឲ្យរងរបួសធ្ងន់ ទាំងតា ទាំងចៅស្រីតូច ។ ភ្លាមៗអ្នកបើកបររថយន្តបង្ក ត្រូវបានបងប្អូនប្រជាពលរដ្ឋ ព័ទ្ធចាប់ជាប់ ប្រគល់ឲ្យបូ៉លីស ។ ជនរងគ្រោះក្រោយកើតហេតុ ត្រូវបានរថយន្តសង្រ្គោះ របស់អង្គភាព៧១១ ដឹកបញ្ជូនទៅមន្ទីរពេទ្យព្រះកុសុមៈ ចំណែកចៅស្រី ត្រូវបានបញ្ជូនទៅមន្ទីរពេទ្យគន្ធបុប្ផា ។ ដោយឡែកមូ៉តូរងការខូចខាតខ្ទេចមួយកំណាត់ក្រោយ និងរថយន្តត្រូវបាននគរបាលជំនាញ វាស់វែងរួចយកទៅរក្សាទុកនៅផ្នែកជំនាញអធិការដ្ឋានខណ្ឌ រងចាំដោះស្រាយពេលក្រោយ ៕