ភ្នំពេញ ៖ ស្រ្តីរងគ្រោះម្នាក់ជិះម៉ូតូទៅទិញសាច់គោដើម្បីធ្វើម្ហូបលុះត្រឡប់មកវិញបម្រុង នឹងបត់ចូលផ្ទះត្រូវជនសង្ស័យ២នាក់ភ្ជង់ប្លន់យកម៉ូតូបានដោយសុវត្ថិភាព បង្កអោយមានការភ្ញាក់ផ្អើលកាលពីវេលាម៉ោង៦និង៣០នាទីព្រលប់ថ្ងៃទី៨ខែមិនាឆ្នាំ២០១៧នៅតាមបណ្តោយផ្លូវបេតុង ជាប់របងបន្ទាយយោធាឆ័ត្រយោង៩១១ ទល់មុខផ្ទះជនរងគ្រោះភូមិកំបូលសង្កាត់កំបូល ខណ្ឌពោធិ៍សែនជ័យ។
ជនរងគ្រោះឈ្មោះតុន គារ ភេទស្រី អាយុ៤៧ឆ្នាំ មុខរបរកម្មការិនីរោងចក្ររស់នៅភូមិ
កំបូល សង្កាត់កំបូល ខណ្ឌពោធិ៍សែនជ័យ។ម៉ូតូដែលជនសង្ស័យប្លន់យកទៅបាត់ម៉ាក
ហុងដាឌ្រីមសេរ៊ី២០១៧ ពណ៌ខ្មៅពាក់ស្លាកលេខភ្នំពេញ 1DO9066។
តាមប្រភពពត៌មានពីជនរងគ្រោះបាននិយាយថាមុនពេលកើតហេតុគាត់បានជិះម៉ូតូទៅផ្សារកំបូលគោលបំណងទៅទិញសាច់គោយកមកធ្វើម្ហូប ខណៈពេលទិញរួចហើយបានជិះម៉ូតូត្រឡប់មកផ្ទះវិញជិតដល់ផ្ទះហើយស៊ីញ៉ូបម្រុងនឹងបត់ចូលផ្ទះស្រាប់តែមានជនសង្ស័យ២នាក់ជិះម៉ូតូម៉ាកហុងដាឌ្រីមមួយគ្រឿងស្រែកឲ្យគាត់ឈប់ភ្លាមៗនោះជនសង្ស័ម្នាក់ជិះខាងក្រោយបានយកកាំភ្លើងខ្លីទៅភ្ជង់រួចស្រែកតិចៗថាកុំមាត់ហ៊ានតែស្រែកគេបាញ់ឥឡូវ ជនសង្ស័យដែលកាន់កាំភ្លើងបានយកកូនសោម៉ូតូពីគាត់ហើយជិះចេញទៅទាំង២នាក់បាត់ គាត់រត់ចូលផ្ទះអ្នកជិតខាងដែលនៅខាងត្បូងផ្ទះគាត់ទាំងអាការៈភ័យខ្លាចយ៉ាងខ្លាំង។
ប្រភពបានបន្តទៀតថាជនសង្ស័យទាំង២នាក់ខាងលើសុទ្ធតែក្មេងៗអាយុត្រឹម២០ឆ្នាំចុះក្រោមឫលើសតិចតួចប៉ុណ្ណោះ ។ជនរងគ្រោះនិយាយទាំងសោកស្តាយម៉ូតូព្រោះម៉ូតូរបស់គាត់ទើបនឹងទិញបាន២ខែ មិនហានជិះទៅឆ្ងាយផងទើបតែជិះបានជិតៗប៉ុណ្ណោះ ។
ក្រោយពេលកើតហេតុស្រ្តីរងគ្រោះខាងលើបានមកដាក់ពាក្យបណ្តឹងនៅប៉ុស្តិ៍នគរបាល
កំបូលដើម្បីអោយសមត្ថកិច្ចជួយស្រាវជ្រាវវែករកមុខសញ្ញាខាងលើយកមកផ្តន្ទាទោសតាមច្បាប់៕ ថោង ធីម