ភ្នំពេញ ៖ ចំណងស្នេហាតារាចម្រៀង ឃីន ស្រីនាថ ហៅអ៊ីវ៉ា និងលោក លី សេងហួរ ម្ចាស់ក្លឹបបាល់ទាត់ សៀមរាប យូណាយធីត ឈានចូលដល់ឆ្នាំទី៩ ហើយ ខណៈដែលពេលនេះ រាល់ពេលដែលនាងបណ្ដើរថៅកែ ទៅណាមកណា នាងតែងប្រាប់ Fan ថា ទៅជាមួយ AI (Artificial Intelligence) ដែលបញ្ហានេះ ធ្វើឲ្យអ្នកគាំទ្រ ចង់វិលក្បុងទៅហើយ ។ ទោះជាយ៉ាងណា រឿងនេះ អ៊ីវ៉ា ចង់សំដៅថា ពេលនាងនាំសង្សារទៅកៀកកើយនោះ នាងទុកថា លោកសេងហួរ ប្រៀបបានបញ្ញាសិប្បនិម្មិ (AI) ដែលរូបនាងផ្ទាល់ ក៏សឹងតែមិនជឿថា ខ្លួនហ៊ានបង្ហាញភាពផ្អែមស្នេហ៍ជាមួយសង្សារ ចំពោះមហាជនបែបនេះដែរ ។
ប៉ុន្ដែសម្រាប់លោកថៅកែវិញ លោកចង់ឲ្យគេគ្រប់គ្នាដឹងថា ខ្លួនជាសង្សារចម្រៀងល្បីរូបនេះ ដើម្បីកុំឲ្យមានប្រុសផ្សេង តាមប្រជែងស្នេហ៍នាង ហេតុនេះ កាន់តែបង្ហាញ រឹតតែល្អ ។ ប៉ុន្តែបើអ៊ីវ៉ា នៅតែទុកលោកសេងហួរ ថាជា AI បែបនេះ នោះលោកអាចនឹងមិនសប្បាយចិត្តឡើយ ព្រោះតាមព័ត៌មានថា អ្នកទាំងពីរ បានភ្ជាប់ពាក្យតាំងពីឆ្នាំ២០២៣ ក្រោយសាងស្នេហ៍ដោយលាក់បាំង បាន៨ឆ្នាំ និងមានដំណឹងថា ពួកគេគ្រោងរៀបការ នៅឆ្នាំ២០២៤ តែពេលនេះបែរជាស្ងប់ស្ងាត់ទៅវិញ ។
អ្វីដែលគួរឲ្យចាប់អារម្មណ៍ ស្រីនាថ និងគូស្នេហ៍ ងាកមកសម្រុកការរកស៊ីតាម Online ហើយទោះជាលោកសេងហួរ មិនដែលប្រចណ្ឌហួងហែងនាងក៏ដោយ តែគ្រប់សកម្មភាពទាំងអស់របស់អ៊ីវ៉ា គឺលោកតែងតែតាមដានជាប់ជានិច្ច ដូចជាការទៅច្រៀងនៅទីណា? និងមកដល់ផ្ទះវិញ នៅម៉ោងប៉ុន្មាន? ជាដើម …។
ប្រភពថា តាំងពីអ៊ីវ៉ា បើកគូស្នេហាថ្មីជាចំហនេះ នាងមិនត្រូវបានលោក «ប» ជាថៅកែក្លឹប និងហាងបញ្ចាំ នៅក្រុងសៀមរាប តាមស្អិត ដូចមុនទៀតទេ ហេតុនេះនាងអាចលេងសិល្បៈតាមចិត្តដែលខ្លួនចង់ទាំងអស់ គ្មានសម្ពាធនិងការហួងហែងពីអ្នកណាទាំងអស់ ។ ប៉ុន្ដសម្រាប់ឪពុកនាង លោកអ៊ូ ចន្ថា ហៅ អ៊ូ វ៉ាវ ហាក់ខកចិត្តនឹងកូនស្រី ម្ដងហើយម្ដងទៀត ព្រោះ៥ឆ្នាំហើយ ដែលលោកធ្លាប់ជំរុញឲ្យរៀបការ តែកូនស្រី ចេះតែរារែកចិត្ត និងមានលេសរហូត ។ ជាក់ស្ដែងដូចជា នៅឆ្នាំ២០២៤ ដែលគ្រប់គ្នាគិតថា អ៊ីវ៉ា នឹងមិនអាចគេចរឿងចូលរោងការបានទៀតទេ ព្រោះទាំងឪពុក និងសង្សារ សុទ្ធតែចង់ឲ្យនាងព្រមធ្វើកូនក្រមុំមែនទែននៅឆ្នាំនោះ ទាំងដែលរូបនាងថា ចង់រៀបការ នៅអាយុ៣០ឆ្នាំ ត្រូវនឹងឆ្នាំ២០២៤ តែទីបំផុតនាងនៅតែមិនហ៊ានប្រថុយក្រាបផ្ទឹម ។
គួរបញ្ជាក់ថា ក្រៅពីអ៊ីវ៉ា តារាដែលហៅសង្សារខ្លួនថា AI នោះ សម្រាប វី ឌីណែត កូនស្រីលោក ហូរ ឡាវី ក៏មិនចង់ឲ្យគេស្គាល់មុខសង្សារដែរ ព្រោះពេលនាងអង្គុយជិតគូស្នេហ៍តែងតែយកស្ទីគ័របិទមុខសង្សារគ្រប់ពេល ។ ចំពោះអ៊ីវ៉ា លោកថៅកែ AI តែងតែនៅពីក្រោយខ្នងអាជីវកម្ម Online របស់នាង ហើយពួកគេដាក់ទុនរកស៊ីរួមគ្នា មុនរៀបការ។
ក្រៅពីអ៊ីវ៉ា តារាដែលបង្ហាញមុខប្រុសស្នេហ៍ជាចំហ នៅឆ្នាំ២០២៥ ប៉ុន្ដែពន្យារពេលរៀបការ មានដូចជាអ្នក នាងយុគ ចិន្ដា, ប៉ាច គីមមួយ, ម៉ានីកា និងពេជ្រ សោភា ជាដើម ។
ប្រភពថា បញ្ហាធំដែលស្រីនាថ ពន្យារពេលចូលរោងការជាមួយលោក លី សេងហួរ រហូតដល់ជិត ១ទសវត្សនេះ គឺមានតែមួយគត់ នោះគឺនាងបារម្ភខ្លាចមានប្ដីទៅ ច្រៀងគេលែងស្ដាប់ ធ្លាក់កូដ…។ ប៉ុន្ដែលោក វ៉ាវ ធ្លាប់ប្រាប់អ្នកយកព័ត៌មានយើងថា តារា គេគាំទ្រលើសមត្ថភាព ហេតុនេះលោកគ្មានការបារម្ភខ្លាចកូនស្រីមានប្ដីទៅ គេលែងគាំទ្រនោះទេ ។
មានការកត់សម្គាល់ថា អ៊ីវ៉ា តាំងពីចាប់អាជីពចម្រៀង ជាង១០ឆ្នាំមកនេះ នាងច្រៀងឲ្យតែសាន់ដេ មួយគត់ ពោលគឺមិនធ្លាប់ផ្លាស់ប្ដូរផលិតកម្មឡើយ បើទោះជាកាលពីឆ្នាំមុនហង្សមាស និងថោន រួមទាំងថ្មីៗនេះ Galaxy ចង់បាននាងក្ដី ក៏នាងមិនប្ដូរផលិតកម្មច្រៀងឡើយ ។ ចំណុចនេះហើយដែលធ្វើឲ្យថៅកែសាន់ដេ ពេញចិត្តនាង ប្រគល់សិទ្ធិពិសេសឲ្យពោលគឺនាងអាចច្រៀងបទណាដែលខ្លួនស្រលាញ់ បទដែលមិនពេញចិត្ត អាចបដិសេធច្រៀងបាន ។ អ៊ីវ៉ា ថែមទាំងច្រៀងនៅផលិតកម្មសាន់ដេ ដោយគ្មានកុងត្រាទៀតផង ហើយពេលនេះទោះ ជានាងខ្លាចរោងការ និងទុកសង្សារ ជា AI ប៉ុន្ដែនាងក្លាហានជាងរៀមច្បង សុខ ពិសី ដែលមិនធ្លាប់បង្ហាញភាពផ្អែមល្ហែមស្នេហ៍ជាសាធារណៈ ដូចនាងម្ដងណាឡើយ ៕