ចុះឆែកគុក ឃើញទូរស័ព្ទ១២គ្រឿង កាំបិតច្នៃ ៦ដើម

ភ្នំពេញ ៖ អគ្គនាយកដ្ឋានពន្ធនាគារ ក្រសួងមហាផ្ទៃ បានឱ្យដឹងថា រយៈពេល ១ឆ្នាំ នៅឆ្នាំ២០២៥ មន្ត្រីពន្ធនា គារ បាមចុះអនុវត្តឆែកឆេរស្វែងរកនាំចូលវត្ថុហាមឃាត់ នៅតាមមណ្ឌលអប់រំកែប្រែ និងពន្ធនាគាររាជធានី ខេត្ត ចំនួន ២១អង្គភាព ស្មើនឹង ៩២៦លើក ក្នុងនោះ រកឃើញនិងដកហូតទូរស័ព្ទដៃ ចំនួន ១២គ្រឿង និងកាំបិតច្នៃ ចំនួន៦គ្រឿង។

យោងតាមរបាយការណ៍សង្ខេបស្តីពីលទ្ធផលការងារឆ្នាំ២០២៥ និងទិសដៅការងារសម្រាប់ឆ្នាំ២០២៦ របស់អគ្គmនាយកដ្ឋានពន្ធនាគារ បង្ហាញនៅក្នុងសន្និបាតរបស់ខ្លួន ក្រោមអធិបតីភាព លោកឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ នៅថ្ងៃទី២៨ ខែវិច្ឆិកា ឆ្នាំ២០២៥ នាទីស្តីការក្រសួងមហាផ្ទៃ ឱ្យដឹងទៀតថា មន្ត្រីពន្ធនាគារ បានរៀបចំការពារសុវត្ថិភាព និងដឹកបញ្ជូនជនជាប់ឃុំ ទៅកាន់សាលាជម្រះក្តីគ្រប់ថ្នាក់ ដោយអនុវត្តតាមដីកាបង្គាប់ឱ្យនាំខ្លួនជនជាប់ឃុំ តាមមណ្ឌលអប់រំកែប្រែ និងពន្ធនាគាររាជធានី ខេត្ត ចំនួន ៦៤ ៧០៨ដីកា មានជនជាប់ឃុំ ចំនួនជាង១០ម៉ឺននាក់ ស្មើនឹង ១៦ ៦៥៨លើក គិត ជាចម្ងាយផ្លូវ សរុបប្រមាណ ជាង៨២ម៉ឺនគីឡូម៉ែត្រ។ ដោយឡែក ដឹកបញ្ជូនទៅកាន់មន្ទីរពេទ្យ ៤ ០០៨នាក់ ស្មើ ៣២៧៤លើក ដែលគិតជាចម្ងាយផ្លូវសរុប ប្រមាណ ជាង៦ម៉ឺនគីឡូម៉ែត្រ ។

គួររំលឹកថា គិតត្រឹមថ្ងៃទី១០ ខែវិច្ឆិកា ឆ្នាំ២០២៥ ជនជាប់ឃុំ មានចំនួនសរុប ៦១ ០៦៩នាក់ (ស្ត្រី ៣ ៩២៦នាក់) ក្នុងនោះ  ជនបរទេស មានចំនួន ៤ ៧៧២នាក់ អនីតិជន ៣ ៨៤១នាក់ ស្ត្រីមានផ្ទៃពោះ ៣៨នាក់ កូនតាមម្តាយ ១១៩នាក់៕