ស្រឡាញ់គ្នា​រាប់​ខែ​មិន​ដែល​ទៅ​សោះ នឹក​ពេក​ទ្រាំ​លែង​បាន ទៅ​ម្តង​ចំថ្ងៃ​ស៊យ

ភ្នំពេញ ៖ បុរសម្នាក់ក្រោយពីបង្កាត់ភ្លើងស្នេហ៍ជាមួយនារីម្នាក់អស់រយៈពេលច្រើនខែកន្លងមកហើយ ម៨នដែលស្គាល់ក្លិន មិនដែលស្គាល់ខ្លួន តាំងខ្លួនជាបុរសថ្លៃថ្នូរ ស្អាតស្អំ មិនឲ្យរំលងប្រពៃណីស៊ូរងចាំឆ្លងកាត់ថ្ងៃអាពាហ៍ពិពាហ៍ សូម្បីតែលំនៅដ្ឋានផ្ទះសម្បែងនួនល្អងក៏បងម៨នហ៊ានទៅអើតដែរ ក៏ប៉ុន្តែទឹកចិត្ត នៃក្តីស្រឡាញ់ គ្រឺតខ្នាញ់រំជើបចិត្ត រំជួលបេះដូង នឹកពេក ទ្រាំលែងបានហើយ កាត់ចិត្តសម្រេចជិះម៉ូតូទៅ ដេកសម្រាកម្តង នៅគេហដ្ឋានខាងស្រី អ្វីៗមិននឹកស្មានដល់ មិនដែលទៅសោះ បានទៅម្តង ជួបចំថ្ងៃស៊យ រវល់តែដេកសម្រាកសម្រាន្ត ត្របាញ់ស្នេហ៍ បែជាដឹកខ្លួន ភ្ញាក់ឡើងនៅវេលាម៉ោង៤ព្រឹកថ្ងៃទី២០ ខែមេសា ឆ្នាំ២០១៧ ស្រាប់តែចោរលួចកាច់សោកម៉ូតូ យកទៅបាត់ ពីបន្ទប់ផ្ទះជួល ក្នុងភូមិក្បាលដំរី សង្កាត់កាកាប ខណ្ឌពោធិសែនជ័យ ។

ជនរងគ្រោះមានឈ្មោះ ង៉ែត ចាន់សុខា ភេទប្រុស អាយុ៣៦ឆ្នាំ មុខរបរ គ្រូបង្រៀនសាលាបើកបររថយន្ត ស្នាក់នៅភូមិព្រៃទា សង្កាត់ចោមចៅ មានស្រុកកំណើតភូមិរោងចក្រ សង្កាត់ភ្នំពេញថ្មី ខណ្ឌសែនសុខ ។ ចំណែកម៉ូតូចោរលួចកាច់សោកយកទៅបាត់ ម៉ាក ហុងដា សេ១២៥ សេរី២០១២ ពណ៌ខ្មៅ ពាក់ស្លាកលេខ ភ្នំពេញ 1BD-3141 ។

តាមការរៀបរាប់ពីជនរងគ្រោះបានឲ្យដឹងថា ខ្លួនបានស្រឡាញ់នារីម្នាក់ ស្នាក់នៅផ្ទះជួលជាន់ទី១ ភូមិក្បាលដំរី អស់រយៈពេលច្រើនខែមកហើយ គ្រាន់តែកន្លងមកស្រឡាញ់ចិត្តនឹងចិត្ត ឥតបានស្គាល់ក្លិន ស្គាល់ខ្លួនគេឡើយ ដោយយល់ឃើញថា រងចាំហៅចាស់ទុំចូលតាមផ្លូវទៅតាមច្បាប់ ចាំថ្ងៃរៀបការ ក្លាយជាប្តីប្រពន្ធ ជាមុនសិន សូម្បីតែបន្ទប់របស់ស្រីក៏មិនហ៊ានអើតផង ច្រើនថ្ងៃ ច្រើនខែ ដោយសាររន្តះបេះដូង រន្ទោករន្ទោល រហូតទ្រាំលែងបាន មើលឃើញមនុស្សមជ្ឈដ្ឋានក្រៅមានគូរស្នេហ៍ នេបនិត ស្និទ្ធស្នាល បណ្តាលចិត្តប្រុស ទៅដេកសម្រាក នៅបន្ទប់ខាងស្រីនៅវេលាម៉ោង១០យប់ថ្ងៃទី១៩ ខែមេសា ដោយចតទុកដាក់ចាក់សោ ត្រឹមត្រូវ នៅខាងក្រោម ចាក់សោទ្វារមុខជាប់ ហើយក៏ឡើងទៅដេកសម្រាកនៅបន្ទប់ជាន់ទី១ លង់លក់បាត់ទៅ រហូតដល់វេលាម៉ោង៤ព្រឹកថ្ងៃទី២០ ខែមេសា ភ្ញាក់ពីដំណេកចុះមករកម៉ូតូស្រាប់តែបាត់សករមោល ជនសង្ស័យ កាត់សោទ្វារ ចូលកាច់សោក ម៉ូតូជិះទៅបាត់ដោយសុវត្តិភាព ។

ជនរងគ្រោះ បានឲ្យដឹងទាំងហួសចិត្តថា មិនដែលទៅដេកផ្ទះខាងស្រីសោះ លុះបានទៅម្តងចំប៉ះថ្ងៃគ្រោះស៊យ បាត់អស់ម៉ូតូមួយគ្រឿង លុះនៅព្រឹកថ្ងៃដដែល ទើបជនរងគ្រោះកាន់កាតគ្រី រត់ទៅប្តឹងនគរបាលប៉ុស្តិ៍កាកាប ឲ្យជួយអន្តរាគមន៍ស្រាវជ្រាវរកម៉ូតូខ្លួន ៕