ខេត្តព្រះសីហនុ ៖ ប្តីប្រពន្ធ២នាក់ ព្រោះតែរវល់ការងារភ្លេចខ្លួនបន្តិច ស្រាប់តែកូនប្រុស អាយុ៣ឆ្នាំម្នាក់ បានរត់លេងនៅលើផ្ទះបណ្តែត ទឹកសមុទ្ររអិលជើងធ្លាក់ចូលទឹកសមុទ្រលង់ ស្លាប់យ៉ាងអាណោចអាធ័ម បង្កឱ្យមានការ ភ្ញាក់ផ្អើលឡើង កាលពីវេលាម៉ោង៥និង៣០ នាទីល្ងាច ថ្ងៃទី១៩ ខែមេសា ឆ្នាំ២០១៧ នៅ ចំណុចបណ្តោយឆ្នេរសមុទ្រ ស្ថិតក្នុងភូមិព្រែកស្វាយ សង្កាត់កោះរ៉ុង ក្រុងព្រះសីហនុ។
ក្មេងប្រុសរងគ្រោះ ដែលលង់ទឹកសមុទ្រ ស្លាប់នោះ មានឈ្មោះលិង ឡាន អាយុ៣ឆ្នាំ មានឪពុកឈ្មោះគឹម ឡេង អាយុ២៩ឆ្នាំ និង ម្តាយឈ្មោះសាន់ សូត អាយុ២៩ឆ្នាំ ស្នាក់នៅ ផ្ទះសង់លើទឹកសមុទ្រ តាមបណ្តោយឆ្នេរ ស្ថិត ក្នុងភូមិកើតហេតុខាងលើ។
តាមសម្តីឪពុកក្មេងប្រុសរងគ្រោះ បាន ឱ្យដឹងថា មុនពេលកើតហេតុគាត់ និងប្រពន្ធ នៅក្នុងផ្ទះ រវល់ធ្វើការងាររៀងៗខ្លួន ទើប បណ្តោយឱ្យកូនប្រុសរត់លេងនៅលើផ្ទះតែម្នាក់ ឯង។ លុះមួយសន្ទុះក្រោយមក ស្រាប់តែបាត់ សំឡេងកូនប្រុស ទើបប្តីប្រពន្ធគាត់បានឆោឡោ ដើរតាមរកកូនប្រុសនៅក្នុងភូមិ តែគ្មានអ្នក ឃើញសោះ លុះពេលត្រឡប់មកផ្ទះវិញ ក៏ប្រទះ ឃើញកូនប្រុសអណ្តែតទឹកសមុទ្រនៅក្បែរ សសរក្រោមស្ពានផ្លូវចូលផ្ទះ។
ក្រោយកើតហេតុ សមត្ថកិច្ចជំនាញ សហ– ការជាមួយមន្ត្រីកងរាជអាវុធហត្ថ ប្រចាំការ នៅលើកោះរ៉ុង បានចុះទៅពិនិត្យនិងធ្វើកោសល្យវិច័យសព រួចបញ្ជាក់ថា ក្មេងប្រុសរងគ្រោះ ពិតជាលង់ទឹកស្លាប់ប្រាកដមែន ដោយសារតែការធ្វេសប្រហែសរបស់អាណាព្យាបាល។
សពក្មេងប្រុសរងគ្រោះ ត្រូវបានសមត្ថកិច្ច ប្រគល់ឱ្យក្រុមគ្រួសារ ដើម្បីរៀបចំធ្វើបុណ្យ តាមប្រពៃណី៕