ភ្នំពេញ៖ ផ្លូវមួយខ្សែលេខ១៩២ ចាប់ពីកែងផ្លូវ២៦១ ចាប់ផ្តើមខូចក្រហេងក្រហូងដូចថ្លុកក្របី និងបែកភក់ជ្រាំប្រជាពលរដ្ឋជាអ្នកដំណើរ ក៏ដូចជាអ្នករស់នៅអមសងខាងសំណូមពរឲ្យអាជ្ញាធរខណ្ឌទួលគោក និងមន្ទីរសារធារណ:ការ និងដឹកជញ្ជូន ជួយចុះពិនិត្យមើលផង កុំទុកឲ្យផ្លូវមួយខ្សែនេះ ខូចធ្ងន់ធ្ងរខ្លាំងជាងនេះទៀត ហើយទីតាំងផ្លូវខូចនេះស្ថិតនៅក្នុងសង្កាត់ទឹកល្អក់៣ ខណ្ឌទួលគោក ។
ប្រជាពលរដ្ឋបានលើកឡើងថា ផ្លូវមួយខ្សែនេះ កាលពីមុននៅមិនទាន់ខូចក្រហេងក្រហូងអញ្ចឹងទេ គឺមានក្រឡុកតូចៗទេ ដោយសារតែមិនមានការជួសជុល ទើបធ្វើឲ្យផ្លូវមួយនេះខូចក្រឡុករីកធំទៅៗ ដូចថ្លុកក្របីបែបនេះ ដូច្នេះប្រជាពលរដ្ឋសំណូមពរដល់សាលារាជធានីភ្នំពេញ ជាពិសេសសាលាខណ្ឌទួលគោក និងមន្ទីរសាធារណៈការមេត្តាចុះទៅពិនិត្យមើល និងធ្វើការជួសជុលផ្លូវនេះឡើងវិញផង កុំទុកឲ្យផ្លូវមួយខ្សែនេះខូចធ្ងន់ធ្ងរទៅជាថ្លុកក្របីអី។
លោកជា ឃៀង ចៅសង្កាត់ទឹកល្អក់៣ បានឲ្យដឹងថា ផ្លូវមួយខ្សែនេះត្រូវបានដាក់ឲ្យដេញថ្លៃហើយ ក្រោមគម្រោងអភិវឌ្ឍន៍សង្កាត់ ឆ្នាំ២០១៧ នេះ ហើយលោកចៅសង្កាត់បានបញ្ជាក់ទៀតថា ផ្លូវមួយខ្សែនេះ នឹងចាប់ផ្តើមជួសជុលក្នុងពេលឆាប់ៗខាងមុខនេះហើយ។
គួររំលឹកអោយដឹងផងដែរថា កាលពីពេលថ្មីៗនេះ ឯកឧត្តម ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានដាក់ចេញនូវវិធានការក្តៅមួយ ដល់ប្រធានមន្ទីរសាធារណការ និងដឹកជញ្ជូនរាជធានី ខេត្តទូទាំងប្រទេសអោយជួសជុលបន្ទាន់ នូវថ្នល់ទូទាំងប្រទេស ក្រោយបញ្ជប់ជាស្ថាពរនៅរដូវវស្សាឆ្នាំនេះ ខណៈដែលផ្លូវជាច្រើនបាននឹងកំពុងខូចខាត៕