ភ្នំពេញ ៖ ជនសង្ស័យ២នាក់បានធ្វើសកម្មភាពឆក់យកកាបូបស្ពាយពីស្រ្តីម្នាក់បានសម្រេច ជិះម៉ូតូរត់គេចខ្លួន ជ្រុលទៅបុករថយន្តមួយគ្រឿង ដែលកំពុងតែធ្វើដំណើតាមផ្លូវ បណ្ដាលឲ្យដួលម៉ូតូ ត្រូវប្រជាពលរដ្ឋដែលឃើញហេតុការណ៍នាំគ្នាចាប់បានស្វាគមន៍ម្នាក់មួយដៃជើង បណ្តាលឲ្យជនសង្ស័យម្នាក់រងរបួសធ្ងន់ និងម្នាក់ទៀត រងរបួសស្រាល ដែលហេតុការណ៍នេះកើតឡើងនៅវេលាម៉ោង ៩និង៤៥នាទីយប់ ថ្ងៃទី២៥ ខែឧសភា ឆ្នាំ២០១៧ ជិតវត្តសារ៉ាវ័ន្ត ផ្លូវ១៧២ សង្កាត់ជ័យជំនះ ខណ្ឌដូនពេញ ឃាត់ខ្លួនបាននៅផ្លូវព្រះនរោត្ដម កែងនិង១៤៤ សង្កាត់ជ័យជំនះ ខណ្ឌដូនពេញ ។
ជនរងគ្រោះមានឈ្មោះ នាង វ៉ាន់ថា ភេទស្រី អាយុ៣៩ឆ្នាំ ស្នាក់នៅផ្ទះជួលម្តុំផ្សារចាស់ សង្កាត់ផ្សារកណ្ដាល ខណ្ឌដូនពេញ របស់ដែលបាត់បង់ក្នុងកាបូបស្ពាយមានលុយ៥០ដុល្លារ ទូរស័ព្ទដៃម៉ាក iphone មួយគ្រឿង និងគ្រឿងសំអាងមួយចំនួន ។
ជនសង្ស័យមានឈ្មោះ ច្រឹង សំណាង ភេទប្រុស អាយុ១៥ឆ្នាំ មុខរបរសិស្ស ស្នាក់នៅសង្កាត់ទួលសង្កែ ខណ្ឌឫស្សីកែវ ជាអ្នកឆក់ ដកហូតម៉ូតូម៉ាកហុងដាឌ្រីម សេរីឆ្នាំ២០១៥ មួយគ្រឿង ដែលជនសង្ស័យជិះធ្វើសកម្មភាព ។
តាមសម្ដីជនរងគ្រោះបានឲ្យដឹងថា មុនពេលកើតហេតុ រូបគាត់បានចេញពីហូបអាហារនៅម្តុំផ្សារទំនើបៗសូរិយាម៉ល គោលបំណងត្រឡប់ទៅផ្ទះវិញ ដោយធ្វើដំណើរដោយថ្មើរជើង តាមផ្លូវ១៧២ ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ក៏ស្រាប់តែបុរស២នាក់ បានជិះម៉ូតូម៉ាកហុងដាឌ្រីម សេរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1FI 4129 បានមកជិត រួចហើយបានធ្វើសកម្មភាពឆក់យកកាបូបស្ពាយពីរូបនាង បានសម្រេច ហើយបានបន្ថែមល្បឿនម៉ូតូបើករត់គេចខ្លួន ពេលនោះដែររូបនាងជាជនរងគ្រោះ បានស្រែកថាចោរៗផ្អើលដល់ប្រជាពលរដ្ឋដែលឃើញហេតុការណ៍ បានជិះម៉ូតូដេញតាម ធ្វើឲ្យជនសង្ស័យភ័យស្លន់ស្លោ បានជិះទៅបុករថយន្តមិនស្គាល់ម៉ាកមួយគ្រឿង ពីក្រោយពេញទំហឹង បណ្តាលឲ្យជនសង្ស័យទាំងពីរនាក់ដួល ត្រូវបានប្រជាពលរដ្ធនាំគ្នាស្វាគមន៍ម្នាក់មួយដៃមួយជើង បណ្ដាលឲ្យជនសង្ស័យម្នាក់ដែលជាអ្នកបើកម៉ូតូរងរបួសសន្លប់ស្ដូកស្ដឹង ត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យកាល់ម៉ែត ចំណែកជនសង្ស័យម្នាក់ទៀត រងរបួសស្រាលត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលជ័យជំនះ ។
នៅចំពោះមុខសមត្ថកិច្ចសាកសួរជនសង្ស័យបានសារភាពថា ពួកគេពិតបានធ្វើសកម្មភាពឆក់យកកាបូបស្ពាយពីស្រ្តីរងគ្រោះពិតប្រាកដមែន តែនៅពេលឆក់បានពួកគេប្រឹងព្យាយាមជិះម៉ូតូរត់គេចខ្លួន ក៍ជ្រុលទៅបុករថយន្តមួយគ្រឿង បណ្ដាលឲ្យដួលក៍ត្រូវសមត្ថកិច្ចឃាត់ខ្លួនបានតែម្តងទៅ ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលជ័យជំនះ ចំណែកជនសង្ស័យត្រូវបានសមត្ថកិច្ចកសាងសំណុំរឿងបញ្ជូនខ្លួនទៅអធិការដ្ឋានខណ្ឌដូនពេញ ដើម្បីចាត់ការបន្ត ៕