ភាពយន្តខ្នាតធំរឿង “អាស្ទើរទឹកប៉ះខ្មោចបែកស្លុយ” របស់ផលិតកម្មBKS ដែលជាស្នាដៃទី១របស់ លោក ឈុន សុវណ្ណភក្តី បានចេញTrailer ហើយដែលកំពុងទាញបានការគាំទ្រទាំងនៅតាមបណ្ដាញសង្គមហ្វេសប៊ុក និងយូធូប។
ម្ចាស់ផលិតកម្មBKS លោក ឈុន សុវណ្ណភក្តី បានថ្លែងឲ្យដឹងថា រឿង “អាស្ទើរទឹកប៉ះខ្មោចបែកស្លុយ” ជាប្រភេទខ្សែភាពយន្តខ្មោចបែបកំប្លែងសើចតាំងពីដើមរហូតដល់ចប់ នឹងចាក់បញ្ចាំងនៅរោងភាពយន្តទំនើបៗក្នុងរាជធានីភ្នំពេញនិងខេត្តសៀមរាប ក្នុងពេលឆាប់ៗនេះ។លោកថ្លែងថា“ខ្ញុំសង្ឃឹមថា រឿងថ្មីនេះនឹងមានអ្នកចូលទស្សនាច្រើន នៅពេលបញ្ចាំងតាមរោងកុន ព្រោះរឿងនេះប្រមូលផ្ដុំដោយតួធំៗជាច្រើនរូប។ជាពិសេសនោះបានសម្រិតសម្រាំងការសម្ដែងជាខ្លាំងដោយផ្ដោតលើគុណភាពពោលគឺភាពយន្តនេះនឹង មិនធ្វើឲ្យទស្សនិកជនខកចិត្តទេ”។
ភាពយន្តខ្នាតធំនេះចូលរួមសម្ដែងដោយ លោក ឈុន សុវណ្ណភក្តី លោក រ៉ូណាន់ ចាន់ណា អ្នកដឹកនាំរឿងកំណត់ហេតុនាងនាថ លោក Jimmy Henderson អ្នកដឹកនាំរឿង Jailbreak នាយ ចឺម នាងខ្ញុង នាយ គ្រឿន នាយក្រូច និងតារាសម្ដែងល្បីៗជាច្រើនរូបទៀត៕
