នារី២នាក់ ត្រូវជនសង្ស័យ២នាក់ ជិះម៉ូតូធ្វើសកម្មភាពឆក់កាបូបលុយ

ភ្នំពេញ ៖ នារី២នាក់ បានជិះម៉ូតូឌុបគ្នាធ្វើដំណើរតាមដងផ្លូវ ត្រូវជនសង្ស័យមានគ្នា២នាក់ ជិះម៉ូតូសីុរ៉ូស ១គ្រឿង ធ្វើសកម្មភាពឆក់កាបូបបានសម្រេច ហើយគេចខ្លួនបាត់ស្រមោល កាលពីវេលាម៉ោង១២និង២០នាទីថ្ងៃត្រង់ ថ្ងៃទី៣១ ខែឧសភាឆ្នាំ២០១៧ នៅចំណុចមុខខាងកើតវត្តអង្គតាមិញ ផ្លូវបេតុង  ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ។

នារីរងគ្រោះបាត់បង់កាបូបលុយ ឈៀង រដ្ឋា  ភេទស្រី អាយុ២៣ឆ្នាំ  មុខរបរធ្វើការក្រុមហ៊ុន ស្នាក់នៅបន្ទប់ជួល ភូមិដំណាក់ធំ២ សង្កាត់ស្ទឹងមានជ័យ រាជធានីភ្នំពេញ ។

តាមសម្តីនារីជាអ្នកឌុប បានឲ្យដឹងថា នៅមុនពេលកើតហេតុ រូបនាងបានជិះម៉ូតូម៉ាកឃ្លីក ពណ៍សលាយក្រហម ពាក់ស្លាកលេខ ភ្នំពេញ 1AP-6391 ធ្វើដំណើរតាមបណ្តោយផ្លូវបេតុង ក្នុងទិសពីជើងត្បូងទៅជើង ខណៈមកដល់ចំណុចកើតហេតុ ស្រាប់តែមានជនសង្ស័យ២នាក់ ជិះម៉ូតូម៉ាកសីុរ៉ូស គ្មានស្លាកលេខ ធ្វើដំណើរមកពីក្រោយ ហើយបានធ្វើសកម្មភាពឆក់កាបូបនារីដែលអង្គុយពីក្រោយបានសម្រេច ហើយគេចខ្លួនបាត់។ សម្ភារៈដែលបាត់បង់មានអត្តសញ្ញាណបណ្ណ លុយចំនួន៦០ដុល្លារ ។

ក្រោយពលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅ ដើម្បីងាយស្រួលសមត្ថកិច្ចស្រាវជ្រាវ ៕