ភ្នំពេញ ៖ បុរសជាងដែកម្នាក់ខណៈដែលកំពុងរុះដំបូលផ្ទះ ធ្វេសប្រហែស លើកដែកទីបប៉ះនឹងខ្សែកាបភ្លើង បណ្តាលឲ្យឆក់ធ្លាក់រងរបួសធ្ងន់ រលួយដៃរលួយជើង កាលពីវេលាម៉ោង៥និង១០នាទីល្ងាច ថ្ងៃទី១៣ ខែកក្កដា ឆ្នាំ២០១៧ ស្ថិតនៅផ្ទះលក់គ្រឿងទេសគ្រប់មុខ ឈ្មោះ អេង សុផាត តាមផ្លូវវេងស្រេង មុខរោងចក្រ៦ជាន់ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះមានឈ្មោះ វឿន លុច ភេទប្រុស អាយុ៣២ឆ្នាំ មុខរបរជាងសំណង់ មានឪពុកឈ្មោះ វ៉ន វឿន អាយុ៤៦ឆ្នាំ មុខរបរជាងសំណង់ ២នាក់ឪពុកកូនស្នាក់នៅក្បែររោងចក្រកាណាឌីយ៉ា ភូមិត្រពាំងថ្លឹង សង្កាត់ចោមចៅ មានស្រុកកំណើត ភូមិច្រកស្តៅ ឃុំទ្រាន ស្រុកកំពង់សៀម ខេត្តកំពង់ចាម ។
តាមប្រជាពលរដ្ឋនៅកន្លែងកើតហេតុ បានឲ្យដឹងថា មុនកើតហេតុ គេឃើញជនរងគ្រោះ២នាក់ឪពុក នាំគ្នារុះរើផ្ទះខាងលើ តាំងពីព្រឹកមកម្ល៉េះ រហូតមកដល់ល្ងាចវេលាម៉ោងខាងលើ ខណៈដែលជនរងគ្រោះ រុះដែកដំបូល ហើយលើកទីបវ័ធប៉ះនឹងខ្សែកាបភ្លើងនៅលើក្បែរនោះ បណ្តាលឲ្យផ្ទុះឆក់ធ្លាក់មកដី រងរបួសរលាកដៃជើង ។
តាមឪពុកជនរងគ្រោះ បានឲ្យដឹងថា ម្ចាស់ផ្ទះលក់គ្រឿងទេសខាងលើបានជួលពួកគាត់មករុះរើ ផ្ទះ ដែកប្រក់ស័ង្កសី ហើយគាត់២នាក់កូនប្រុសនាំគ្នាមករុះតាំងពីព្រឹកទល់ល្ងាច ស្រាប់តែនៅវេលាម៉ោងខាងលើ ពេលដែលកូនប្រុសគាត់លើកដែកទៅប៉ះខ្សែកាបភ្លើង ទើបឆ្លងឆក់ធ្លាក់តែម្តង ។
ក្រោយកើតហេតុជនរងគ្រោះ ត្រូវបានរថយន្តសង្រ្គោះរបស់អង្គភាព៧១១ ដឹកបញ្ជូនទៅមន្ទីពេទ្យបង្អែកពោធិ៍ចិនតុង ។