ខេត្តព្រះសីហនុ៖ បុរសម្នាក់ទៀតហើយ នាយប់ថ្ងៃទី២០វេលាម៉ោង ២រំលងអាធ្រាត បានបង្កការអុកឡុកហាងខារ៉ាអូខេ និងបានធ្វើឲ្យផ្អើលសមត្ថកិច្ចទាំងកណ្តាលយប់ ដោយបានតាំងខ្លួនជាខ្សែអ្នកធំ មានឈ្មោះថា ស លីហ៊ួរ ៦៦៦៦ ហៅខ្លាក្រហឹម ។
ជុំវិញការភ្ញាក់ផ្អើលដល់សមត្ថកិច្ចស្ទើរមួយក្រុងនេះ ពុំមានការបកស្រាយណាមួយពីសមត្ថកិច្ចនោះទេ ប៉ុន្តែបើយោងតាមប្រភពនៅកន្លែងកើតហេតុ ក៏ដូចជាសម្តីជនបង្កផ្ទាល់ បានស្រែកឡូឡា គំរាមដកសមត្ថកិច្ចប៉ូលីសណាដែលពុំធ្វើតាមគេ ដោយគេបានតាំងខ្លួនថា រូបគេមានឈ្មោះថា ស លីហ៊ួរ ៦៦៦៦ ហៅខ្លាក្រហឹម រូបគេនឹងសមត្ថកិច្ចណាដែលពុំធ្វើការ បណ្តោយឲ្យជនជាតិវៀតណាម មកបើកហាងខារ៉ាអូខេ បើទោះបីជាសមត្ថកិច្ចខិតខំសម្របសម្រួលយ៉ាងណាក្តី រហូតសមត្ថកិច្ចក្តៅស្លឹកត្រចៀក ចាប់វ៉ៃខ្នោះលើកឡើងឡានដូចជ្រូក ក៏បុរសរូបនោះនៅតែសម្តែងអាការៈក្អេងក្អាងដែរ។
ដោយឡែក បើយោងតាមប្រភពម្ចាស់ហាងឈ្មោះ ធីតា មានទីតាំងម្តុំក្រោយពេទ្យ ស្ថិតក្នុងក្រុមទី០២ ភូមិ៤ សង្កាត់លេខ៤ ក្រុងព្រះសីហនុ បានអះអាងថា នៅមុនកើតហេតុបុរស់រូបនេះ បានចូលទៅផឹកបៀរជាមួយមិត្តភក្តិ៣នាក់ផ្សេងទៀត រហូតអស់ជិតចំនួន០២ថូធំ បុរស់រូបនោះមានអាការៈស្រវឹង បានស្រែកឡូឡា ដើររករឿងគេឯង បើទោះបីជាមិត្តខិតខំអង្វរយ៉ាងណាក៏ដោយ ដោយការនិយាយមិនស្តាប់គ្នា ទើបមិត្តចំនួន០៣នាក់ផ្សេងទៀត (ស្រីម្នាក់ប្រុស០២នាក់) បានជិះម៉ូតូចេញទៅមុន ។
ប្រភពដដែលបានបន្តថា ក្រោយពីមិត្តចេញទៅបាត់ ជនបង្កនៅតែបន្តស្រែកដើរករឿងក្នុងហាងដដែល ទើបរូបគាត់ប្តឹងសមត្ថកិច្ច រហូតសមត្ថកិច្ចមកដល់ ក៏ជនបង្កនៅតែសម្តែងអាការៈអួតអាងដដែល មិនត្រឹមតែប៉ុណ្ណោះបានប្រតាយប្រតប់ជាមួយសមត្ថកិច្ចថែមទៀតផង បើទោះបីជាស្នងការរងអន្តោប្រវេសន៍ មកឃាត់សម្របសម្រួល ក៏ជននោះតែមិនស្តាប់ ហើយបានចង្អុលក្រុមសមត្ថកិច្ច ដោយចោទសួរថា ហេតុអីក៏ជនជាតិវៀតណាម មានសិទ្ឋបើកហាងខារ៉ាអូខេ ហើយមានអត្តសញ្ញាណប័ណ្ណថែមទៀត៕
