ភ្នំពេញ ៖ ថៅកែហាងស៊ុប៦៣ ខឹងបុគ្គលិកផឹកស៊ីស្រវឹងជិះម៉ូតូដួលរត់ទៅស្តីបន្ទោសឈ្លោះ ប្រកែក ត្រូវនគរបាលព្រហ្មទណ្ឌខណ្ឌ៧មករា ឃើញចូលឃាត់ត្រូវថៅកែហាងស៊ុបឈ្លោះប្រកែកជាមួយនគរបាលព្រហ្មទណ្ឌខណ្ឌ៧មករាទៀត បង្កឲ្យមានការភ្ញាក់ផ្អើលកាលពី
វេលាម៉ោង១០យប់ ថ្ងៃទី២២ ខែកក្កដា ឆ្នាំ២០១៧ តាមបណ្តោយផ្លូវ៣៣៦ នៅចំណុចហាងស៊ុប៦៣ ស្ថិតនៅក្នុងសង្កាត់វាលវង់ ខណ្ឌ៧មករា។
តាមប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុបុគ្គលិកថៅកែហាងស៊ុប៦៣ ចំនួន៣នាក់ បានផឹកស៊ីស្រវឹង ហើយជិះម៉ូតូត្រឡប់ទៅផ្ទះវិញ ខណៈពេលជិះចេញផុតពីហាងបានជាង១០០ម៉ែត្រ បានចាប់ហ្វ្រាំងមុខដួលម៉ូតូ ធ្វើឲ្យថៅកែដែលស្រវឹងស្រឿងៗដែេនោះឮប្រាវ បានរត់ទៅមើលឃើញកូនចៅ៣នាក់ ជិះម៉ូតូដួល ក៏បានស្តីបន្ទោស ធ្វើឲ្យមានការឈ្លោះប្រកែកគ្នារវាងថៅកែហាងនិងកូនចៅ ស្របពេលនោះមាននគរបាលព្រហ្មទណ្ឌ៧មករាម្នាក់ ស្លៀកពាក់ស៊ីវិលបានជិះម៉ូតូឆ្លងកាត់ប្រទះឃើញឈ្លោះប្រកែកគ្នា តាមផ្លូវសាធារណៈ ក៏បានឈប់ម៉ូតូឃាត់មិនឲ្យឈ្លោះប្រកែកគ្នា ស្រាប់តែមានបុគ្គលិកហាង៥ទៅ៦នាក់ទៀត សុទ្ធតែស្រវឹង ស្មានតែវ៉ៃថៅកែរបស់គេ បានរត់ចេញពីហាងទៅរកវាយនគរបាលព្រហ្មខណ្ឌ៧មករា ភ្លាមៗនោះ នគរបាលព្រហ្មទណ្ឌខណ្ឌ៧មករា បានរត់គេចខ្លួន ហើយរួចបានទាក់ទងហៅកម្លាំងសមត្ថកិច្ចមូលដ្ឋានមកអន្តរាគមន៍ ។
ប្រភពព័ត៌មានបានឲ្យដឹងថា មុនពេលសមត្ថកិច្ចមូលដ្ឋានមកដល់ថៅកែហាងដែលស្រវឹងបានឈ្លោះ ប្រកែកជាមួយនគរបាលព្រហ្មទណ្ឌ បង្កឲ្យមានប្រជាពលរដ្ឋចោមរោមមើល ទាល់តែសមត្ថកិច្ចមូលដ្ឋានមកដល់ជួយសម្របសម្រួល ទើបភាគីខាងថៅកែបានចូលទៅក្នុងហាងវិញ ចំណែកនគរបាលព្រហ្មទណ្ឌក៏ជិះម៉ូតូចេញទៅវិញ ៕
