ភ្នំពេញ៖ ក្មេងស្ទាវចំនួនពីរក្រុមបានធ្វើការវាយតប់គ្នាពេញដងផ្លូវ បង្កភាពចលាចលក្នុងមូលដ្ឋាន ត្រូវសមត្ថកិច្ចចាប់ឃាត់ខ្លួនបានបីនាក់ និងម្នាក់ទៀតរងរបួសបញ្ចូនទៅមន្ទីពេទ្យព្រះកុសុមៈ ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៩និង២០នាទីយប់ ថ្ងៃទី២៤ ខែកក្កដា ឆ្នាំ២០១៧ ត្រង់ចំណុចផ្លូវ២០១១ កែងផ្លូវបេតុង ស្ថិតក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។
តាមសម្តីពីសមត្ថកិច្ចមូលដ្ឋានបានប្រាប់ឲ្យដឹងថា បន្ទាប់ពីបានទទួលដំណឹងពីប្រជាពលរដ្ឋថាមានករណីក្មេងស្ទាវពីរក្រុមបានធ្វើការវាយតប់គ្នាតាមដងផ្លូវ ដោយម្ខាងមានគ្នា៤នាក់ និងម្ខាងទៀតមានគ្នា២នាក់ ភ្លាមនោះកម្លាំងពួកគាត់បានចុះទៅកន្លែងកើតហេតុ និងឃាត់ខ្លួនបានក្មេងទំនើងចំនួន៤នាក់ ក្នុងនោះម្នាក់បានរងរបួសរយះដៃស្តាំ ត្រូវបញ្ជូនទៅព្យាបាលនៅមន្ទីពេទ្យព្រះកុសុមៈ ចំណែកឯបក្ខពួកចំនួន២នាក់ទៀត រត់គេចខ្លួនបាត់ស្រមោល និងដកហូតបានម៉ូតូចំនួនបីគ្រឿង រួមទាំងដំបងមួយដើម និងដុំថ្មមួយចំនួន នាំយកទៅសាកសួនៅប៉ុស្តិ៍។
ប្រភពព័ត៌មានបន្តថា ក្មេងទំនើងទាំងពីរក្រុមខាងលើដែលវាយតប់គ្នាតាមដងផ្លូវបង្កភាពចលាចលក្នុងមូលដ្ឋាន ដែលភាគីម្ខាង ឃាត់ខ្លួនបានចំនួនពីរនាក់ ទី១. មានឈ្មោះ
យ៉ែន សុខយ៉េង ភេទប្រុស អាយុ១៧ឆ្នាំ មុខរបរជាងក្រឡឹង ទី២. មានឈ្មោះ ហ៊ុយ
ស៊ីថា ភេទប្រុស អាយុ២៤ឆ្នាំ មុខរបរជាងក្រឡឹង អ្នកទាំងពីស្នាក់នៅស្នាក់នៅភូមិច្រេស សង្កាត់ភ្នំពេញថ្មី ខណ្ឌសែនសុខ និងដកហូតបានម៉ូតូមួយគ្រឿង ម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ ១CA-១២១០ ។ ចំណែកភាគីម្ខាងទៀត ឃាត់បានចំនួនពីរនាក់ ទី១. មានឈ្មោះ ជ័យ សុភក្រ័ ភេទប្រុស អាយុ៣០ឆ្នាំ មុខរបរបើកបររថយន្ត ស្នាក់នៅភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ ទី២. មានឈ្មោះយុង សារ៉ូ ភេទប្រុស អាយុ២៦ឆ្នាំ មុខរបរជាងអ៊ុតតែមម៉ូតូ ស្នាក់នៅភូមិដីថ្មី សង្កាត់ភ្នំពេញថ្មី ខណ្ឌសែនសុខ រងរបួសរយះដៃខាងស្តាំ ដកហូតបានម៉ូតូចំនួនពីរគ្រឿង ម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GL-៦៦២៧ រងការខូចខាតបែកចង្កៀងមុខ និងបែកក្បាំង និងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ ១GM-៧៨៤៦ ចំណែកឯបក្ខពួកពីរនាក់ទៀតរត់គេចខ្លួនបាត់ស្រមោល។
បច្ចុប្បន្នក្មេងទំនើងទាំងបួននាក់ខាងលើ រួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មី កសាងសំណុំរឿងបញ្ជូនទៅអធិការដ្ឋាននគរបាលខណ្ឌសែនសុខ ដើម្បីរង់ចាំចាត់ការតាមនីតិវិធី ៕
