ភ្នំពេញ៖ បុរសម្នាក់ដឹកស្ត្រីម្នាក់ជាអ្នកឆក់កាបូបយួរដៃពីស្ត្រីម្នាក់ទៀត កំពុងដើរចេញមកពីធ្វើការរោងចក្រ បានសម្រេច សំណាងអាក្រក់ត្រូវប្រជាពលរដ្ឋចាប់បានប្រគល់ឲ្យសមត្ថកិច្ចប៉ុស្តិ៍ទួលសង្កែ ហេតុការណ៍នេះបានកើតឡើងកាលពីវេលាម៉ោង៧និង៥០នាទីយប់ ថ្ងៃទី២៤ ខែកក្កដា ឆ្នាំ២០១៧ តាមបណ្តោយផ្លូវបេតុងគ្មានលេខ នៅចំណុចម្តុំលូទឹកស្អុយ ស្ថិតនៅក្នុងភូមិបាក់ទូក សង្កាត់ទួលសង្កែ ខណ្ឌឬស្សីកែវ។
ជនសង្ស័យមានឈ្មោះ លី សុខឃាង ភេទស្រី អាយុ២៩ឆ្នាំ ស្នាក់នៅផ្ទះជួលគ្មានលេខក្រុម៤ ភូមិបាក់ទូក សង្កាត់ទួលសង្កែ ខណ្ឌឬស្សីកែវ ។ ចំណែកឯជនរងគ្រោះមានឈ្មោះ អុក សារ៉ន ភេទស្រី អាយុ២៨ឆ្នាំ ស្នាក់នៅក្រុម៤ ភូមិបាក់ទូក សង្កាត់ទួលសង្កែ ខណ្ឌឬស្សីកែវ។
តាមប្រភពពត៌មានពីជនរងគ្រោះបានឲ្យដឹងថា មុនពេលកើតហេតុ គាត់ទើបតែចេញមកពីកន្លែងធ្វើការរោងចក្រនៅជិតនឹងកន្លែងកើតហេតុ លុះពេលដែលដើរជិតមកដល់កន្លែងកើតហេតុ ស្រាប់តែលេចមុខជនសង្ស័យប្រុសស្រី២នាក់ ជិះម៉ូតូម៉ាកវីវ៉ា ពណ៌ក្រហម មិនចាំស្លាកលេខបានជិះមកជិត ហើយខាងស្រីក៏បានធ្វើសកម្មភាពឆក់កាបូបយួរដៃបានសម្រេច ហើយបម្រុងបើករត់គេចខ្លួន ភ្លាមៗនោះដែរក៏មានប្រជាពលរដ្ឋគាត់ប្រទះឃើញ ក៏ជួយដេញតាំងពីកន្លែងកើតហេតុខាងលើ រហូតទៅដល់ចំណុចផ្លូវ២៧៣ មុខផ្ទះសំណាក់សេរីធំ ទើបជនសង្ស័យខាងប្រុសជាអ្នកឌុបបានដាក់ជនសង្ស័យជាស្ត្រីដេលធ្វើសកម្មភាពឆក់ ហើយបើករត់គេចខ្លួនតែម្នាក់ឯង ស្របពេលនោះក៏សមត្ថកិច្ចប៉ុស្តិ៍ទួលសង្កែ បានមកដល់ធ្វើការឃាត់ខ្លួនយកទៅសួរនាំ។
នៅក្នុងកាបូបរបស់ស្ត្រីរងគ្រោះខាងលើ មានតែទូរស័ព្ទដៃមួយម៉ាកសាំងសុង តែប៉ុណ្ណោះ។
ក្រោយពេលកើតហេតុជនសង្ស័យខាងលើត្រូវបានសមត្ថកិច្ចកសាងសំណុំរឿងបញ្ចូនទៅតុលាការ ដើម្បីចាត់ការទៅតាមនីតិវិធី៕
