តារាចម្រៀងឈានមុខគេនៅផលិតកម្មសាន់ដេ ខេមរៈ សិរីមន្ត បានគ្រងតំណែងជាអ្នកចម្រៀងប្រុសនៅទ្រនំធំនេះ ជិត៧ឆ្នាំមកហើយ ដែលបទចម្រៀងសិរីមន្ត ល្បីល្បាញជាច្រើនបទ រហូតធ្វើឱ្យកេរ្តិ៍ឈ្មោះអ្នកចម្រៀងរូបនេះ លោតទៅកៀកប្រដមប្រសងជាមួយព្រាប សុវត្ថិ។ ប៉ុន្តែរយៈពេលចុងក្រោយនេះ សិរីមន្ត ហាក់ស្ងប់ស្ងាត់ខ្លាំង មិនសូវមានបទល្បីដូចមុនទៀតឡើយ ស្របពេលដែលនាយចឺម បែរជាស្ទុះឡើងទៅវិញ ទើបធ្វើឱ្យមានការលេចឮថា សិរីមន្ត ចង់ចេញពីសាន់ដេ ទៅបើកផលិតកម្មដោយខ្លួនឯង…។
ខេមរៈ សិរីមន្ត ឬខេម ប៊ុនថៃ ជាតារាចម្រៀងដែលមានឥទ្ធិពលជាងគេ របស់ផលិតកម្មសាន់ដេ ព្រោះតែអ្នកចម្រៀងរូបនេះ មិនអាចមានតារាថ្មីណារបស់សាន់ដេ មកប្រជែងបានឡើយ នៅរយៈពេលចុងក្រោយនេះ សូម្បីតែលោកឆាយ វីរៈយុទ្ធ ដែលកាន់តែប្រកៀកប្រកិតជាមួយសិរីមន្ត ខ្លាំងនោះ ក៏មិនអាចដណ្តើមតំណែងសិរីមន្ត បានដែរ ហេតុនេះហើយ មហាជនមើលឃើញថា សិរីមន្ត គឺជាតួឯកដ៏សំខាន់របស់សាន់ដេ ដូចហង្សមាស មានព្រាប សុវត្ថិ ដែរ។ ប៉ុន្តែ រយៈពេលចុងក្រោយនេះ ខេមរៈ សិរីមន្ត មិនសូវមានបទផ្ទុះដូចមុនទៀតឡើយ គឺស្ងប់ស្ងាត់តែម្តង ហើយក៏លេចឮដំណឹងថា សិរីមន្ត ចង់ចេញពីសាន់ដេ ទៅបង្កើតផលិតកម្មថ្មីដោយខ្លួនឯងវិញម្តង។
ការចង់ឈានទៅធ្វើម្ចាស់ដោយខ្លួនឯង របស់ខេមរៈ សិរីមន្ត នៅពេលនេះ ស្របពេលដែលផលិតកម្មសាន់ដេ ត្រូវបានមើលឃើញថា កំពុងតែប្រឹងប្រែងលើកស្ទួយតារាកំប្លែងរបស់ CTN ដែលក្លាយទៅជាអ្នកចម្រៀងរបស់ខ្លួន គឺនាយចឺម ព្រោះក្មួយរបស់នាយក្រូច រូបនេះមានបទចម្រៀងល្បីៗចេញជាបន្តបន្ទាប់ច្រើនជាងគេ ទើបមហាជននិងអ្នកសិល្បៈបាននិយាយស្របគ្នាថា ពេលនេះនាយចឺម ត្រូវបានសាន់ដេ លើកស្ទួយជាងតារាដទៃទៀត របស់ផលិតកម្មសាន់ដេ។
ទន្ទឹមនឹងនេះ ក៏មានអ្នកខ្លះទៀតសង្ស័យថា ការដែលខេមរៈ សិរីមន្ត ចង់ដើរចេញពីសាន់ដេ ដោយសារតែអ្នកចម្រៀងល្បីល្បាញរូបនេះ មានការអាក់អន់ចិត្តជាមួយនាយចឺម ដែលកាន់តែមានបទល្បីៗច្រើន ទើបសិរីមន្ត ចង់ធ្វើផលិតកម្មដោយខ្លួនឯងវិញម្តង។
ខេមរៈ សិរីមន្ត កំពុងច្រៀងសម្តែងនៅប្រទេសអូស្ត្រាលី ទើបមិនអាចទាក់ទងសុំយោបល់បានឡើយ។ ដោយឡែក នាយចឺម វិញបាននិយាយថា ខ្លួនមិនហ៊ានប្រជែង ឬធ្លាប់គិតថា នឹងល្បីជាងរៀមច្បងខេមរៈ សិរីមន្ត ឡើយ តែបទចម្រៀងរបស់នាយ ពិតជាកំពុងតែទទួលបានការគាំទ្រច្រើនមែន ហើយសង្ឃឹមថា នឹងកាន់តែល្បីជាងនេះទៀត នៅពេលខាងមុខបន្តិចទៀតនេះ។
នាយចឺម ដែលកំពុងតែមានសេចក្តីសុខដោយឱបស្រីស្អាតអូនម៉ី ជំនួសពុធ ស្រីខួច នោះថ្លែងថា “អូ! បងសិរីមន្ត គាត់ចង់បើកផលិតកម្មខ្លួនឯងហ្នុង ខ្ញុំឮយូរហើយបង មិនពាក់ព័ន្ធថា មកពីពេលហ្នឹងខ្ញុំមានបទចម្រៀងច្រើនជាងគាត់ គាត់អន់ចិត្តអី ខ្ញុំថាមិនអីចឹងទេ ព្រោះគាត់ (សិរីមន្ត) ជាកំពូលតារាចម្រៀងទៅហើយ ខ្ញុំម៉េចហ៊ានប្រជែងអីជាមួយគាត់ទៅបង! តាមខ្ញុំមើល បងសិរីមន្ត នៅតែមានបទចម្រៀងច្រៀងច្រើនអីចឹង មិនស្ងាត់ទេ។ ចំពោះខ្ញុំវិញ មួយរយៈចុងក្រោយនេះ គឺបទចម្រៀងខ្ញុំមានការគាំទ្រច្រើនមែន តាំងពីខ្ញុំផ្ទុះបទ “មនុស្សប្រុសសង្សារច្រើន មិនមែនសុទ្ធតែសាវ៉ា” មក បងប្អូនគាំទ្រខ្ញុំច្រើនណាស់តាមឆាកតន្ត្រីអី ខ្ញុំមិននឹកស្មានដល់ផង ហើយតាមដឹង ក្រុមហ៊ុននឹងទម្លាក់បទឱ្យខ្ញុំច្រៀងច្រើនទៀត ព្រោះគាត់ដឹងទីផ្សារ។ ខ្ញុំមិនគិតថា ខាងសាន់ដេ លើកខ្ញុំជាងគេនោះទេ ព្រោះបទចម្រៀងតារាផ្សេងក៏គាត់មានច្រៀងដែរ គ្រាន់តែខាងក្រុមហ៊ុនគាត់មើលដែរថា បទអ្នកណាស៊ី ឬមិនស៊ីនៅលើទីផ្សារនោះ។ នៅពេលខាងមុខបន្តិចទៀតនេះ ខ្ញុំនឹងត្រៀមចេញបទថ្មីៗទៀត ដែលសង្ឃឹមថា នឹងល្បីដែរ គឺបទ “បែកអូនដូចខាំគ្រាប់មីន” បទនេះល្អ ហើយខាងលោកថៅកែគាត់ពេញចិត្តណាស់”។
ខេមរៈ សិរីមន្ត បានចេញទៅច្រៀងសម្តែងនៅប្រទេសអូស្ត្រាលី កាលពីដើមខែមិថុនា ដោយរួមដំណើរជាមួយអ្នកនាងអឿន ស្រីមុំ និងបងប្រុសបង្កើត គឺលោកខេមរៈ ភារុណ ដែលតាមគម្រោងនឹងវិលត្រឡប់មកស្រុកវិញ នៅដើមខែកក្កដានេះ ហើយស្របពេលដែលតារាសិល្បៈដែលស្និទ្ធនឹងសិរីមន្ត បានបង្ហើបឱ្យដឹងថា ការទៅកើបលុយនៅលើទឹកដីអូស្ត្រាលី នេះ សិរីមន្ត ឬប៊ុនថៃ ទទួលបានការគាំទ្រច្រើនពីបងប្អូនខ្មែរនៅទីនោះ ហេតុនេះហើយនៅពេលដែលតារាល្បីរូបនេះ ស្ពាយបង្វេចលុយមកវិញនោះ ច្បាស់ជានឹងបើកផលិតកម្មផ្ទាល់ខ្លួននោះ ចេញជារូបរាងជាមិនខាន ដែលពេលនោះហើយក្រុមត្រកូល “ខេមរៈ” នឹងកាន់តែប្រជែងការធ្វើបទចម្រៀងឱ្យបានច្រើន ដើម្បីបុកទីផ្សារ ហើយគេជឿថា ខេមរៈ ស្រីពៅ ដែលបាត់ខ្លួនជាង២ឆ្នាំនោះ នឹងអាចលេចមុខជាថ្មីមកវិញ នៅផលិតកម្មផ្ទាល់ខ្លួនរបស់បងប្រុសនាងនេះជាមិនខាន។
ប្រភពបានឱ្យដឹងថា ពេលនេះ ខេមរៈ សិរីមន្ត កំពុងតែពិចារណាហើយថា តើលោកនឹងត្រូវផ្តាច់ខ្លួនទាំងស្រុង ពីផលិតកម្មសាន់ដេ ដើម្បីមកពង្រឹងតែលើផលិតកម្មផ្ទាល់ខ្លួនឯង ឬក៏ជ្រើសផ្លូវដូចមាស សុខសោភា ដែលច្រៀងទាំងផលិតកម្មផ្ទាល់ខ្លួន Camtrax និងថោន ខណៈដែលមិត្តភក្តិតារាចម្រៀងរូបនេះ បានជំរុញឱ្យសិរីមន្ត ច្រៀងទាំង២ផលិតកម្មដែរ គឺសាន់ដេ និងផលិតកម្មដែលសិរីមន្ត ជិតនឹងបង្កើតនោះ។
ខេមរៈ សិរីមន្ត នៅពេលដែលចេញទៅច្រៀងសម្តែងក្រៅស្រុក តារារូបនេះ នៅតែរក្សាភាពខ្លាំងក្លាបានដដែល ដោយមានការគាំទ្រយ៉ាងច្រើនពីបងប្អូនខ្មែរនៅអូស្ត្រាលី បើទោះជាអ្នកចម្រៀងសាន់ដេ រូបនេះ បានល្បីសុសសាយថា រូបគេមានប្រពន្ធនិងកូនប្រុស២នាក់ទៅហើយក្តី តែក្រមុំៗមិនតិចឡើយ ដែលចោមស្នេហ៍អ្នកចម្រៀងល្បីរូបនេះ ហើយថែមទាំងចង់ឃាត់ឱ្យសិរីមន្ត បន្តនៅប្រទេសអូស្ត្រាលី ទៀតផង តែតារារូបនេះមិនព្រមឡើយ ព្រោះដឹងថា មានអ្នកពិសេសកំពុងតែអន្ទះសាចាំផ្សាភ្នែកនៅស្រុកខ្មែរ។
មហាជនមួយចំនួនបានរិះគន់ខេមរៈ សិរីមន្ត ថា ព្យាយាមបិទបាំងរឿងមានប្រពន្ធកូន ហើយមិនដែលបណ្តើរជាចំហម្តងណាឡើយ ព្រោះតែខ្លាចប៉ះពាល់ដល់កេរ្តិ៍ឈ្មោះ ដែលសកម្មភាពបែបនេះ គឺផ្ទុយស្រឡះទៅនឹងលោកព្រាប សុវត្ថិ ដែលមិនត្រឹមតែមិនលាក់ប្រពន្ធកូនទេ តែលោកសុវត្ថិ ថែមទាំងនាំប្រពន្ធទៅមើលលោកថតសឹងគ្រប់កម្មវិធី ថែមទាំងយកកូនប្រុសទាំង៣ ឡើងរាំអមខ្លួនទៀតផង តែតារាហង្សមាស រូបនេះ នៅតែល្បីដដែល៕