ក្មេងស្ទាវបីនាក់ត្រូវបានសមត្ថកិច្ចប៉ុស្តិទំនប់ទឹកឃាត់ខ្លួនយកទៅសាកសួរ បន្ទាប់ពីក្រុមក្មេងស្ទាវទាំងនោះបានជិះម៉ូតូដេញវាយគ្នាឡើងប្រសាចពេញផ្លូវ ពេលដែលសមត្ថកិច្ចជិះ ម៉ូតូដេញតាមឃាត់ត្រូវក្មេងស្ទាវនោះជិះម៉ូតូបុកសមត្ថកិច្ចម្នាក់បណ្តាលឲ្យដួលរងរបួសផងដែរ ហេតុការណ៍បានកើតឡើងនៅវេលាម៉ោង១១យប់ ថ្ងៃទី២៤ ខែតុលា ឆ្នាំ២០១៧ ចំណុចស្តុបកៅដាយ ផ្លូវម៉ៅសេងទុង សង្កាត់ទួលស្វាយព្រៃ២ ខណ្ឌចំការមន ឃាត់ខ្លួនបាននៅផ្លូវមុនីរ៉េត សង្កាត់ទំនប់ទឹក ខណ្ឌចំការមន ។
ក្រុមក្មេងស្ទាវដែលសមត្ថកិច្ចឃាត់បានមានឈ្មោះ ១-លន លុច ភេទប្រុស អាយុ១៨ឆ្នាំ
ស្នាក់នៅផ្ទះជួល ភូមិឫស្សី សង្កាត់ស្ទឹងមានជ័យ ខណ្ឌមានជ័យ, ២-ទន់ សូលី អាយុ១៧ឆ្នាំ មុខរបរជាងដែក ស្នាក់នៅផ្ទះជួល សង្កាត់ស្ទឹងមានជ័យ ខណ្ឌមានជ័យ និង៣- វ៉ានី
ស៊ីណេង ភេទប្រុស អាយុ១៥ឆ្នាំ មុខរបរជាងដែក ស្នាក់នៅភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ដកហូតម៉ូតូម៉ាកវ៉េវ ពណ៌ខ្មៅ ពាក់ស្លាកលេខ ភ្នំពេញ 1-J6904 មួយគ្រឿង ព្រមទាំងខ្សែក្រវ៉ាត់មួយ ជារបស់ក្មេងស្ទាវទាំងនោះ ។
តាមសម្តីសមត្ថកិច្ចខណ្ឌចំការមន បានអោយដឹងថា មុននៅមុនពេលកើតហេតុ ពួកគាត់បានធ្វើការល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេងៗ ខណៈពេលនោះក៍ស្រាប់តែប្រទះឃើញក្រុមក្មេងស្ទាវចំនួន២ក្រុម មានគ្នាជាង១០នាក់ មានស្រីមានប្រុស ជិះម៉ូតូ៥ទៅ៦គ្រឿង បានធ្វើសកម្មភាពដេញវាយគ្នា នៅត្រង់ចំនុចស្តុបកៅដាយ ឃើញមានក្មេងស្ទាវកាន់ខ្សែក្រវ៉ាត់គ្រប់ដៃ កម្លាំងសមត្ថកិច្ចខណ្ឌចំការមន បានសហការគ្នាដេញតាមឃាត់ខ្លួន ក៍ស្រាប់តែមាន បុរសម្នាក់ក្នុងចំណោមបីនាក់ ដែលឃាត់ខ្លួនបានជិះម៉ូតូបំបុកកម្លាំងនគរបាលប៉ុស្តិ៍ទំនប់ទឹកម្នាក់ បណ្តាលអោយដួលរងរបួសផងដែរ ។
បន្ទាប់ពីបុកសមត្ថកិច្ចរួចហើយ ពួកក្មេងស្ទាវទាំងនោះបានព្យាយាមរត់គេចខ្លួន តែត្រូវបានកម្លាំងសមត្ថកិច្ច ឃាត់បានចំនួនបីនាក់និងម៉ូតូមួយគ្រឿង យកទៅសាកសួរនៅប៉ុស្តិនគរបាលទំនប់ទឹក ។
នៅពេលសមត្ថកិច្ច សាកសួរក្រុមក្មេងស្ទាវទាំងនោះ និយាយកុហកសមត្ថកិច្ចថា មាន
ភាគីម្ខាងទៀតជាអ្នកដេញវាយពួកគេមុន តែពេលសមត្ថកិច្ចជំនាញក្នុងការសាកសួរ ក្រុមក្មេងស្ទាវទាំងបីនាក់នោះទើបសារភាពថា ពួកគេគឺជាអ្នកដេញវាយគេមុនទៅវិញទេ ហើយពួកគេទើបចេញមកពីលេងនៅកោះពេជ្រ ព្រមទាំងមានបក្ខពួក ៦នាក់ ជិះម៉ូតូចំនួនបីគ្រឿង ថែមទៀតផង ។
ក្រោយពេលកើតហេតុ បន្ទាប់ពីសាកសួរ ក្មេងស្ទាវទាំងបីនាក់ ត្រូវបានសមត្ថកិច្ច កសាងសំណុំរឿង បញ្ជូនទៅអធិការដ្ឋានខណ្ឌចំការមនដើម្បីចាត់ការបន្ត ៕