ភ្នំពេញ ៖ នារីវ័យក្មេងម្នាក់ ខណៈដែលវិលត្រឡប់មកពីផ្សារ ធ្វើដំណើរទៅផ្ទះតាមផ្លូវស្ងាត់ ត្រូវបានជនសង្ស័យគ្នា២នាក់ជិះម៉ូតូមួយគ្រឿងតាមពីក្រោយ ធ្វើសកម្មភាពស្ទាក់មុខ វាយ២ដៃ ច្រានឲ្យចុះ ប្លន់យកម៉ូតូទៅបាត់ដោយសុវត្តិភាព កាលពីវេលាម៉ោង១និង៣០នាទីរសៀល ថ្ងៃទី២៧ ខែតុលា ឆ្នាំ២០១៧ ស្ថិតនៅតាមផ្លូវលំ ចុងភូមិខាងត្បូងភូមិកន្ទោកត្បូង សង្កាត់កន្ទោក ខណ្ឌពោធិសែនជ័យ ។
នារីរងគ្រោះ ឈ្មោះ ឃឹម ម៉ាលីកា អាយុ២៥ឆ្នាំ មុខរបរនៅផ្ទះ រស់នៅភូមិត្រាញ់តាបាញ់ សង្កាត់ភ្លើងឆេះរទេះ ខណ្ឌពោធិសែនជ័យ ។ ចំណែកម៉ូតូដែលជនសង្ស័យប្លន់យកទៅបាត់ ម៉ាក ZOOMER-X ពណ៌ក្រហម ស៊េរី២០១៧ ពាក់ស្លាកលេខ ភ្នំពេញ 1FH-0036 ។ ដោយឡែកជនសង្ស័យ មានគ្នា២នាក់ មិនស្គាល់អត្តសញ្ញាណ ជិះម៉ូតូមួយគ្រឿងម៉ាក ស៊ុយហ្ស៊ុយគី និច (Nex) ពណ៌ស មិនចាំស្លាកលេខ ។
បើតាមសម្តីនារីរងគ្រោះ បានឲ្យដឹងថា មុនកើតហេតុបានឌុបប្អូនទៅដាក់សាលារៀនជម្ពូវ័ន រួចឈៀងចូលផ្សារជម្ពូវ័ន រកទិញរបស់របរប្រើប្រាស់ លុះចេញពីផ្សារវិលត្រឡប់មកផ្ទះវិញ ជិះកាត់តាមផ្លូវ ក្នុងភូមិកន្ទោកត្បូង សង្កាត់កន្ទោក ហើយជិះកាត់តាមផ្លូវលំ វាលស្រែ ដល់ខាងខាងត្បូងភូមិកន្ទោកត្បូង ស្រាប់តែលេចមុខជនសង្ស័យ ជិះម៉ូតូ ម៉ាកនិច តាមពីក្រោយ មកស្ទាក់កាក់ពីមុខ ជនសង្ស័យម្នាក់ចុះមកចាប់ម៉ូតូជាប់ វាយក្បាល២ដៃ តែចំមួកសុវត្ថិភាព គម្រាម សំឡុត ច្រានឲ្យចុះចេញពីម៉ូតូ ហើយទើបជនសង្ស័យ យកម៉ូតូជិះរត់គេចទៅបាត់ ។
ក្រោយកើតហេតុ បន្ទាប់ពីជនរងគ្រោះទូរស័ព្ទប្រាប់សាច់ញាតិ ទើបផ្អើលប្រជាពលរដ្ឋ នគរបាលប៉ុស្តិ៍ភ្លើងឆេះរទេះ ចុះទៅដល់កន្លែងកើតហេតុ សាកសួរទីតាំងកន្លែងកើតហេតុ ស្ថិតនៅក្នុងភូមិកន្ទោកត្បូង ទើបនគរបាល ប្រាប់ឲ្យជនរងគ្រោះ ទៅដាក់ពាក្យបណ្តឹងនៅប៉ុស្តិ៍កន្ទោក ដើម្បីឲ្យសមត្ថកិច្ចជួយស្រាវជ្រាវ និងកំណត់មុខសញ្ញា ៕