បើករថយន្តដេញបាញ់គ្នា ផ្ទុះ៦គ្រាប់ ផ្អើលប្រជាពលរដ្ឋ និងសមត្ថកិច្ចខណ្ឌឬស្សីកែវ

ភ្នំពេញ៖ រថយន្ត២គ្រឿងបើកដេញបាញ់គ្នាដូចក្នុងភាពយន្តភាគចិន សង្ស័យថាជារឿងគំនុំ បង្កឲ្យមានការភ្ញាក់ផ្អើលកាលពីវេលាម៉ោង​៩និង១០នាទីយប់ ថ្ងៃទី២៧ ខែតុលា ឆ្នាំ២០១៧ ត្រង់ចំណុចខាងមុខហាងលក់អ៊ីវ៉ាន់យីហោ មជ្ឍមណ្ឌលជប៉ុន តាមបណ្តោយផ្លូវ៣៥៥ ស្ថិតក្នុងសង្កាត់ទួលសង្កែ ខណ្ឌឬស្សីកែវ។

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញមាន រថយន្ត២គ្រឿង ក្នុងនោះរថយន្តរងគ្រោះមួយគ្រឿងមិនចាំម៉ាក ជាប្រភេទរថយន្តស្ព័រ ​ធ្វើដំណើរតាមបណ្តោយផ្លូវ៣៥៥ ក្នុងទិសដៅពីត្បូងទៅជើង។ លុះមកដល់ចំណុចកើតហេតុស្រាប់តែមានរថយន្តបង្កមួយគ្រឿងទៀតម៉ាកឡិចស៊ីស RX330 ពណ៌ខ្មៅ មិនចាំស្លាកលេខ បើកបរមកពីក្រោយក្នុងល្បឿនលឿន ហើយមិនដឹងថាមានរឿងរ៉ាវអីទេ បានជារថយន្ត​បង្កដកកាំភ្លើងខ្លីបាញ់សំដៅទៅរថយន្តរងគ្រោះ​ចំនួនប្រាំមួយគ្រាប់ រួចបានបើករថយន្តរត់គេចខ្លួនបាត់ស្រមោល ។

ចំណែកឯរថយន្តរងគ្រោះក៏មិនឈប់នោះទេ គឺបានបន្តដំណើរទៅមុខទៀតបាត់។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុ និងបានដើរប្រមូលសំបកកាទុសេ្សរកឃើញតែចំនួនតែបួនគ្រាប់ យកទៅរក្សាទុកដើម្បីធ្វើការស្រាវជ្រាវរកមុខជនដែលបាញ់បោះសេរីយកមកផ្តន្ទាទោសទៅតាមទៅច្បាប់ ។

ជុំវិញករណីខាងលើនេះសមត្ថកិច្ចសង្ស័យថា អាចជារឿងគំនុំបានជាបើករថយន្តដេញបាញ់ គ្នាដូចរឿងកុនអញ្ចឹង ៕