ភ្នំពេញ ៖ គូស្នេហ៍វ័យក្មេងមួយគូ កំពុងជិះម៉ូតូដឹកគ្នាដើរលេងពេលរាត្រីយ៉ាងមានសេចក្តីសុខ ស្រាប់តែមកដល់ចំណុចផ្លូវបំបែកជាបួន ក៏ត្រូវរថយន្តមួយគ្រឿង បើកក្នុងល្បឿនលឿន ជ្រុលចង្កូតមកបុកយ៉ាងពេញទំហឹង បណ្តាលឱ្យយុវជនជាប្រុសស្នេហ៍បោកក្បាលស្លាប់នៅនឹងកន្លែងយ៉ាងរន្ធត់ ចំណែកនារីជាសង្សារទទួលរងរបួសធ្ងន់ រីឯរថយន្តបង្កហេតុបានបន្ថែមល្បឿនបើករត់គេចបាត់។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ កើតឡើងកាលពីវេលាម៉ោង១និង៣០ រំលងអធ្រាត្រ ឈានចូលថ្ងៃទី១៥ ខែវិច្ឆិកា ឆ្នាំ២០១៧ នៅចំណុចទល់មុខហាងស៊ុប ហុយហុយ តាមផ្លូវលេខ១៦៣ កែងនឹងផ្លូវលេខ៤៦៨ ស្ថិតក្នុងសង្កាត់ទួលទំពូង២ ខណ្ឌចំការមន។ យុវជនរងគ្រោះដែលត្រូវរថយន្តបុកបែកក្បាលស្លាប់នោះ មានឈ្មោះឆោម បូរិន អាយុ ២៣ឆ្នាំ មុខរបរបុគ្គលិកខារ៉ាអូខេ ស្នាក់នៅផ្ទះជួល សង្កាត់ផ្សារដើមថ្កូវ ខណ្ឌចំការមន និងមានស្រុកកំណើតនៅភូមិកំពង់ត្រាច ឃុំកំពង់ត្រាច ស្រុករមាសហែក ខេត្តស្វាយរៀង។ ចំណែកនារីរងគ្រោះជាសង្សារ ដែលទទួលរងរបួសធ្ងន់ មានឈ្មោះសុផាន ស្រីតី អាយុ២១ឆ្នាំ មុខរបរអ៊ុតសក់ស្នាក់នៅក្នុងបន្ទប់ជួលជាមួយគ្នា។ គូសង្សារខាងលើជិះម៉ូតូមួយគ្រឿង ម៉ាក MSX ពណ៌ក្រហម ពាក់ស្លាកលេខ ភ្នំពេញ 1FE-5720។ ចំណែករថយន្តបង្កហេតុ មិនត្រូវបានស្គាល់ម៉ាក និងស្លាកលេខនោះទេ ព្រោះក្រោយពីបង្កហេតុរួចម្ចាស់រថយន្តបានបន្ថែមល្បឿនរត់គេចបាត់ស្រមោល។
តាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេបាន ឃើញគូស្នេហ៍វ័យក្មេងខាងលើ មិនដឹងថា ជិះម៉ូតូដឹកគ្នា ក្នុងគោលបំណងទៅណាមកណានោះទេ ដោយធ្វើដំណើរតាមផ្លូវ១៦៣ ក្នុងទិសដៅពីជើងទៅត្បូង លុះពេលមកដល់ចំណុចកើតហេតុខាងលើ ដែលជាចំណុចផ្លូវបំបែក ជា៤ ក៏ស្រាប់តែមានរថយន្តមិនស្គាល់ម៉ាក១គ្រឿង បើកបរតាមផ្លូវ៤៦៨ ក្នុងទិសដៅ ពីកើតទៅលិច ក្នុងល្បឿនយ៉ាងលឿនដូចហោះ បានជ្រុលទៅបុកចំពាក់កណ្តាលម៉ូតូយ៉ាងពេញទំហឹង បណ្តាលឱ្យយុវជនជាអ្នកបើកម៉ូតូដួល បោកក្បាលទៅនឹងផ្លូវ ហូរឈាមស្លាប់នៅនឹងកន្លែងកើតហេតុ ចំណែកនារីជាសង្សារដែលអង្គុយខាងក្រោយ រងរបួសសន្លប់ស្តូកស្តឹង និងត្រូវបានរថយន្តសង្គ្រោះដឹកយកទៅសង្គ្រោះ នៅគ្លិនិកហុងហាក់។ រីឯម៉ូតូរងការខូចខាត ខ្ទេចមួយចំហៀងឆ្វេង ដោយឡែករថយន្តបង្កហេតុ នៅពេលបង្កគ្រោះថ្នាក់ហើយបានបន្ថែមល្បឿនរត់គេចបាត់ស្រមោល ដោយមិនបានឈប់ទទួលខុសត្រូវសោះឡើយ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញ បានចុះទៅដល់កន្លែងកើតហេតុ ធ្វើការវាស់វែងអូសយកម៉ូតូទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំប្រគល់ឱ្យសាច់ញាតិរបស់ជនរងគ្រោះវិញ។
ដោយឡែក សពជនរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារដឹកទៅកាន់ស្រុកកំណើតឯខេត្តស្វាយរៀង ដើម្បីរៀបចំធ្វើបុណ្យតាមប្រពៃណី៕