ខេត្តព្រះសីហនុ ៖ បុរសជនជាតិចិន ចំនួន២នាក់ ក្រោយពីផឹកស៊ីស្រវឹងធ្លាក់ភ្នែកក៏កើត មានទំនាស់ពាក្យសម្តីនឹងគ្នា រហូតដល់ភាគីម្ខាង ទប់កំហឹងមិនបាន ក៏ទាញាកាំបិតសាមូរ៉ៃចាក់ ប្រហារទៅលើគូទំនាស់ បណ្តាលឱ្យរយះដៃម្ខាងរងរបួសធ្ងន់ កាលពីវេលាម៉ោង៣រសៀល ថ្ងៃទី១៥ ខែវិច្ឆិកា ឆ្នាំ២០១៧ នៅចំណុចហាងសាច់អាំង ហូជៀន (អូឈើទាល) ស្ថិតក្នុងក្រុម ទី១៤ ភូមិ៤ សង្កាត់លេខ៤ ក្រុងព្រះសីហនុ។
បុរសរងគ្រោះ ដែលត្រូវគូទំនាស់ចាក់រយះដៃ មានឈ្មោះ SHI WEILI មុខរបរលក់សាច់អាំង ជាជនជាតិចិន ឆ្នាំកំណើតថ្ងៃទី ២០ ខែមីនា ឆ្នាំ១៩៧០ រងរបួសដើមដៃខាងឆ្វេង។ ចំណែកជនសង្ស័យ មានឈ្មោះ LIN GUIXIAN មុខរបរលក់បង្អែមជាជនជាតិចិនដូចគ្នា ឆ្នាំកំណើតថ្ងៃទី២៥ ខែមេសា ឆ្នាំ ១៩៧៤។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនជាតិចិនទាំង២នាក់ខាងលើ បានអង្គុយផឹកស៊ីនៅក្នុងហាងសាច់អាំងខាងលើ ដោយផឹកស៊ីបណ្តើរ ជជែកគ្នាបណ្តើរ តែមិនដឹងនិយាយគ្នាពីរឿងអ្វីខ្លះទេ ព្រោះគ្មានអ្នកស្តាប់យល់ដោយសារអ្នកទាំង២ និយាយគ្នាជាភាសាចិន។ លុះក្រោយមក បន្ទាប់ពីផឹកស្រាវឹងធ្លាក់ភ្នែកអ្នកទាំងពីរក៏ផ្ទុះជម្លោះតឹងសរសៃកដាក់គ្នា បន្ទាប់មកភាគីជនសង្ស័យទប់កំហឹងមិនបាន ក៏ស្ទុះទៅទាញ កាំបិតសាមូរ៉ៃកាប់ប្រហារទៅលើជនរងគ្រោះ បណ្តាលឱ្យរយះដើមដៃខាងឆ្វេងរងរបួសធ្ងន់ តែម្តង។
ក្រោយកើតហេតុ សមត្ថកិច្ចបានចុះអន្តរាគមន៍ដល់ទីតាំងកើតហេតុចាប់ឃាត់ខ្លួនជនសង្ស័យ ព្រមទាំងដកហូតបានវត្ថុតាងកាំបិតសាមូរ៉ៃ១ដើមផង រួចក៏នាំទៅកាន់អធិការដ្ឋាននគរបាលក្រុងព្រះសីហនុ ដើម្បីរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី។
ដោយឡែក ជនរងគ្រោះត្រូវបានគេដឹកបញ្ជូនទៅព្យាបាលរបួសនៅមន្ទីរពេទ្យរួច ទើប ត្រឡប់មកដាក់ពាក្យបណ្តឹងវិញតាមក្រោយ៕