ភ្នំពេញ ៖ បុរសជនជាតិបរទេសម្នាក់ រួមនិងនារីខ្មែរម្នាក់បានបើករថយន្តទៅឈប់ទិញងាវស្រុះនៅមុខវត្តសន្សំកុសល ត្រូវក្មេងស្ទាវព្រួតវាយ បណ្តាលអោយបុរសជាជនជាតិបរទេស រងរបួសបែកក្បាល ហើយជនជនជាតិបរទេសបានបើករថយន្តបន្តដំណើរទៅមុខទៀត ទាំងអាការៈស្រវឹង បានជ្រុលទៅបុកនឹងរថយន្តលុចស៊ិស RX 300 ដែលកំពុងឈប់រង់ចាំភ្លើងស្តុប
បណ្តាលអោយរងការខូចខាតបន្តិចបន្តួច។
ហេតុការណ៍នេះបានកើតឡើងនៅវេលាម៉ោង ២និង៥០នាទី រំលងអាធ្រាត្រ ឈានចូលថ្ងៃទី២៩ ខែវិច្ឆកា ឆ្នាំ២០១៧ ទល់មុខនឹងវិទ្យាល័យបឹងត្របែក ផ្លូវ៨៨៤ កែងនឹងផ្លូវព្រះមុនីវង្ស សង្កាត់បឹងត្របែក ខណ្ឌចំការមន ។
ជនរងគ្រោះមិនបានអោយស្គាល់អត្តសញ្ញាណនោះទេ តាមសម្តីនារីម្នាក់ដែលបានរួមដំណើរជាមួយនឹងជនជាតិបរទេបានអោយដឹងថា នៅមុនពេលកើតហេតុ ពួកគាត់ទាំងពីរនាក់ បានបើករថយន្តម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 2I-2973 ចេញពីផឹកស៊ីវិញម្តុំទួលគោក គោលបំណងទៅទិញងាវស្រុះនៅមុខវត្តសន្សំកុសល ផ្លូវ២៧១ សង្កាត់បឹងទំពុន១ ខណ្ឌមានជ័យ។ លុះមកដល់មុខវត្តសន្សំកុសល ពួកគាត់ទាំង២នាក់ជនបរទេស តែមិនដឹងថាយ៉ាងម៉េច ស្រាប់តែបុរសជាជនជាតិបរទេសបានទាស់ពាក្យសម្តីជាមួយនិងក្មេងស្ទាវនៅម្តុំនោះ ហើយក៍ត្រូវក្មេងស្ទាវទាំងនោះបានព្រួតគ្នាយកដំបងវាយ
បណ្តាលអោយបែកក្បាលហូរឈាមពេញខ្លួន នៅពេលដែលវាយហើយ ក្រុមក្មេងស្ទាវទាំងនោះបាននាំរត់គេចខ្លួនបាត់ស្រមោលអស់ ។
ប្រភពដដែលបានបន្តទៀតថា បន្ទាប់ពីមានរបួសស្នាមហើយ រូបគាត់រួមជាមួយនិងជនបរទេស បានបើករថយន្តធ្វើដំណើរតាមផ្លូវព្រះមុនីវង្ស ក្នុងទិសដៅពីត្បូងទៅជើង គោលបំណងទៅមន្ទីរពេទ្យដើម្បីព្យាបាលរបួស តែបើកបានពាក់កណ្តាលផ្លូវ ក៍ស្រាប់តែជ្រុលទៅបុកនិងរថយន្តឡិចស៊ីស RX-300 ពណ៌ខ្មៅ ពាក់ស្លាកលេខ ភ្នំពេញ 2I-0022 ដែលឈប់រងចាំភ្លើងស្តុប នៅមុខវិទ្យាល័យបឹងត្របែក ចំពីក្រោយ បណ្តាលអោយរងការខូចខាតតិចតួច តែមិនមានគ្រោះថ្នាក់ដល់អ្នកជិះក្នុងរថយន្តនោះទេ ។ បន្ទាប់ពីបុករថយន្តហើយ ជនបរទេសរូបនោះត្រូវបានរថយន្តសង្គ្រោះបានមកដឹកយកទៅសង្គ្រោះនៅមន្ទីរពេទ្យកាល់ម៉ែត្រ និងទុករថយន្តអោយសមត្ថកិច្ចធ្វើការដោះស្រាយ ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញបានចុះទៅដល់កន្លែងកើតហេតុថា ករណីនេះកើតហេតុដំបូងនៅទឹកដីខណ្ឌមានជ័យ រួចហើយបានទំនាក់ទំនងទៅសមត្ថកិច្ចខណ្ឌមានជ័យ អោយចុះមកមើល ស្រាប់តែភាគីខាងរថយន្តឡិចស៊ីស មិនចង់មានរឿងវែងឆ្ងាយ បានសុំរួចខ្លួន ហើយនាំគ្នាបើករថយន្តបន្តដំណើរទៅមុខទៀតទៅ ចំណែករថយន្តរបស់ជនបរទេស ត្រូវបានសមត្ថកិច្ច យកទៅរក្សាទុកនៅអធិការដ្ធានខណ្ឌមានជ័យ ដើម្បីរងចាំប្រគល់អោយម្ចាស់រថយន្តវិញ ៕