ភ្នំពេញ ៖ បុរសជាអ្នករត់ម៉ូតូឌុបម្នាក់ដឹកម៉ូយពីកាណាឌីយ៉ា ទៅបុរីពិភពថ្មីត្រពាំងថ្លឹង ត្រូវបុរសម្នាក់ ដែលមានទំនាស់ជាមួយគ្នា៦ខែមកហើយ បានស្ទាក់វាយបែកមាត់ ហេតុការណ៍នេះបានកើតឡើងកាលពីវេលាម៉ោង១២និង៣៥នាទីរំលងអាធាត្ រឈានចូលថ្ងៃទី១ ខែធ្នូ ឆ្នាំ២០១៧ តាមបណ្តោយផ្លូវវេងស្រេង នៅចំងាយ២០ម៉ែត្រពីបុរីពិភពថ្មី ស្ថិតនៅត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ។
ជនរងគ្រោះមានឈ្មោះសុខ សំអូន ភេទប្រុស អាយុ៣០ឆ្នាំ មុខរបររត់ម៉ូតូឌុប ស្នាក់នៅផ្ទះជួលភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិ
ឧត្ថដុង្គ ឃុំព្រែកកំបៅ ស្រុកពាមរ ខេត្តព្រៃវែង។
តាមប្រភពព័ត៌មានពីសំដីជនរងគ្រោះបានអោយដឹងថា មុនពេលកើតហេតុគាត់ជិះម៉ូតូមួយគ្រឿងម៉ាកហុងដាសេ១០០ ស៊េរីឆ្នាំ២០០០ ពណ៍ខៀវ ពាក់ស្លាកលេខ ព-9972 ភព១ ក្នុងទិសដៅកើតទៅលិចឌុបស្រ្តីម្នាក់ក្នុងតំលៃ៣០០០រៀល ពីកាណាឌីយ៉ាទៅបុរីពិភពថ្មីភូមិត្រពាំងថ្លឹង១ ខណៈពេលដឹកទៅដល់គោលដៅក្នុងបុរី ហើយបានត្រឡប់ទៅវិញ ស្រាប់តែលេចមុខបុរសម្នាក់ដែលមានទំនាស់គ្នារយៈ៦ខែមកហើយ បានបើកម៉ូតូមកស្កាត់វាយមួយដៃចំមាត់បណ្តាលអោយបែកមាត់តែម្តង។
ក្រោយពេលកើតហេតុភាគីបង្កបានជិះម៉ូតូគេចខ្លួនបាត់ស្រមោល ចំណែកជនរងគ្រោះបានទៅដាក់ពាក្យបណ្តឹងសុំឲ្យសមត្ថកិច្ចឃាត់ខ្លួនជនបង្កយកទៅសួរនាំនៅប៉ុស្តិ៍នគរបាលចោមចៅ១ ដើម្បីចាត់ការទៅតាមផ្លូវច្បាប់ ៕