ខេត្តកណ្តាល ៖ កម្លាំងផ្នែកជំនាញសហការជាមួយកម្លាំងប៉ុស្តិ៍រដ្ឋបាលផ្សារដែក បានចុះបង្ក្រាប និងឃាត់ខ្លួនជនសង្ស័យ៣នាក់ និងដកហូតវត្ថុតាងមួយចំនួន នាំមកសាកសួរ និងចាត់ការតាមផ្លូវច្បាប់ ខណៈកំពុងធ្វើសកម្មភាពជួញដូរនូវសារធាតុញៀនដោយខុសច្បាប់ នៅចំណុចភូមិម្លូម៉ឺន ឃុំផ្សារដែក ស្រុកពញាឮ ខេត្តកណ្តាល។ ប្រតិបត្តិការបង្ក្រាប និងឃាត់ខ្លួនជនសង្ស័យខាងលើធ្វើឡើង កាលពីវេលាម៉ោង១៩និង៣០នាទី ថ្ងែទី១៣ ខែធ្នូ ឆ្នាំ២០១៧។
នគរបាលស្រុកពញាឮ បានឱ្យដឹងថា ជនសង្ស័យដែលជាមុខសញ្ញាជួញដូរថ្នាំញៀន ត្រូវចាប់ខ្លួនទី១-ឈ្មោះសយ សារ៉េត ភេទប្រុស អាយុ៣២ឆ្នាំ ជនជាតិខ្មែរ មុខរបរកម្មករជាងដែក មានលំនៅភូមិក្នុងវាំង ឃុំវាំងចាស់ ស្រុកឧដុង្គ ខេត្តកំពង់ស្ពឺ ស្នាក់នៅផ្ទះជួលភូមិម្លូម៉ឺន ឃុំផ្សារដែក ស្រុកពញាឮ ខេត្តកណ្តាល ទី២-ឈ្មោះសឿន ធឿន ហៅទុយ ភេទប្រុស អាយុ ២៥ឆ្នាំ ជនជាតិខ្មែរ មុខរបរកម្មករជាងដែក លំនៅភូមិក្នុងវាំង ឃុំវាំងចាស់ ស្រុកឧដុង្គ ខេត្តកំពង់ស្ពឺ និងទី៣-ឈ្មោះប៉ុល ស្រីប៉ ហៅ ពៅ ភេទស្រី អាយុ២៩ឆ្នាំ ជនជាតិខ្មែរ មុខរបររត់តុៗ លំនៅភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
កម្លាំងសមត្ថកិច្ចចាប់យកវត្ថុតាងរួមមាន ម្សៅក្រាមពណ៌សថ្លា សង្ស័យជាសារធាតុញៀន (Ice) ចំនួន៤កញ្ចប់តូច ទូរស័ព្ទ១គ្រឿង ម៉ាក Camfone ឧបករណ៍វេចខ្ចប់និងប្រើប្រាស់មួយចំនួន។
នៅចំពោះមុខសមត្ថកិច្ច ជនសង្ស័យឈ្មោះ សយ សារ៉េត បានសារភាពថា ថ្នាំញៀនដែលខ្លួនយកមកជួញដូរនៅថ្ងៃកើតហេតុនេះ បានទិញពីម្តុំផ្សារស្វាយប៉ាក ពីជនមិនស្គាស់ឈ្មោះ ឡើងទិញម្តងចំនួន៥កញ្ចប់តូច យកមកលក់បន្តឱ្យគេ ក្នុងមួយកញ្ចប់តូចតម្លៃ៣ម៉ឺនរៀល ហើយពេលពួកគេកំពុងចេញលក់ថ្នាំញៀន ក៏ត្រូវកម្លាំងសមត្ថកិច្ចចុះមកចាប់ខ្លួនតែម្តង។
បច្ចុប្បន្នជនសង្ស័យនិងវត្ថុតាង សមត្ថកិច្ចអធិការដ្ឋាននគរបាលស្រុកពញាឮ កសាងសំណុំរឿងបញ្ជូនទៅកាន់ការិយាល័យប្រឆាំងបទល្មើសជួញដូរថ្នាំញៀន ស្នងការដ្ឋាននគរបាល ខេត្តកណ្តាល ដើម្បីចាត់ការតាមនីតិវិធី៕