Freshie Girl លេខ១ ជំនាន់ទី១៦ ប្រចាំឆ្នាំ២០១៧ នាងសុខ វិច្ឆរ៉ា រួមទាំងស្រីស្អាត២នាក់ផ្សេងទៀត ដែលជាអតីត Freshie Girls គឺកញ្ញាអ៊ិន ម៉ូលីកា និងកញ្ញារ៉ន ឌីយ៉ា ទទួលបានការចាប់អារម្មណ៍ខ្លាំងក្នុងកម្មវិធីប្រគល់រង្វាន់ធំ មាសដុំ១៨តម្លឹង ដែលមានតម្លៃ៣០.០០០ម៉ឺនដុល្លារ ជូនអតិថិជនមកពីខេត្តកំពង់ធំ ឈ្មោះហាត ទៀងចាន់នីម ដែលមានសន្លឹកឆ្នោត លេខ៤១៨០៩៩៦។ ដោយឡែក អតិថិជនដែលឈ្នះមានដុំ ១តម្លឹង មាន៥រង្វាន់ មានឈ្មោះ សុខ វណ្ណឌីន , គូ គង, សេង ប៊ុនលេង , គឹម ច័ន្ទនា និងហេង មករា រួមទាំងរង្វាន់តូប៉ុង Jiffy ទឹកប្រាក់២០ដុល្លារ ចំនួន៥០រង្វាន់ផងដែរ ដែលសុទ្ធតែត្រូវបានស្រីស្អាត Freshie ទាំង៣រូប ផ្ដល់ភាពរំភើបរីករាយដល់អ្នកដែលឈ្នះរង្វាន់ទាំងនេះ តាមរយៈការចាប់ឆ្នោតជាលើកទី២ នៅសណ្ឋាគារសូហ្វីតែល កាលពីថ្ងៃទី២២ ខែធ្នូ ឆ្នាំ២០១៧ កន្លងមក ពីការចាក់ប្រេងឥន្ទនៈ PTT ឬទិញទំនិញក្នុងហាងជីហ្វី (jiffy)។
កញ្ញាសុខ វិច្ឆរ៉ា ត្រូវបានអតិថិជនដែលមានឈ្នះរង្វាន់ជាច្រើននាក់សរសើរថាស្រីក្មេងរូបនេះមានសម្រស់ស្អាត និងមានចរិតរួសរាយរាក់ទាក់ទៀតផង ខណៈដែលនាងកាន់ដុំមាស និងខ្សែកមាស រួមទាំងគូប៉ុងជូនដល់អ្នកដែលមានសំណាងទាំងនោះ បើទោះជាកញ្ញាវិច្ឆរ៉ា មិនទាន់មានមានសកម្មភាពសិល្បៈលេចធ្លោក្ដី។
គេចាប់អារម្មណ៍ថា នេះមិនមែនជាលើកទី១ឡើយ ដែលកញ្ញាវិច្ឆរ៉ា បង្ហាញខ្លួនក្នុងកម្មវិធីដែលរៀបចំដោយក្រុមហ៊ុន BKA នោះ ព្រោះកន្លងមក តារាដែលតូចច្រឡឹងរូបនេះក៏ធ្លាប់លេចមុខក្នុងកម្មវិធីបង្ហាញម៉ូដក្នុងកម្មវិធីសម្ពោធផលិតផលធំៗជាច្រើនផងដែរ បើទោះជានាងមិនទាន់ហក់ចូលប្រឡូកក្នុងអាជីពសិល្បៈពេញទំហឹងក្ដី។
តាមក្រុមការងារក្រុមហ៊ុន BKA បានបង្ហើបឲ្យដឹងថា មានបណ្ដាផលិតកម្ម និងក្រុមហ៊ុនស្ពតមួយចំនួនបានទាក់ទងកញ្ញាសុខ វិច្ឆរ៉ា ក្នុងការថតស្ពត និងសម្ដែងរឿងដុំ និងរឿងភាគ។ ប៉ុន្ដែពេលនេះ កញ្ញាវិច្ឆរ៉ា នៅជាប់កុងត្រាជាមួយ BKA ហេតុនេះហើយក្រុមហ៊ុនមិនមែនចេះតែឲ្យចេញថត ដោយមានតម្លៃថោកៗនោះទេ គឺទាល់តែបានតម្លៃសមរម្យទៅតាមក្រុមហ៊ុនកំណត់ ទើបបណ្ដា Freshie ទាំងនោះអាចលេចមុខក្នុងស្ពត ឬភាពយន្ដបាន។ ដោយឡែក កញ្ញាវិច្ឆរ៉ា កន្លងមកធ្លាប់ប្រាប់ថា នាងនឹងហក់ចូលសិល្បៈយ៉ាងពេញទំហឹង ដូចអតីត Freshie មុនៗដែរ ព្រោះនាងស្រលាញ់ខាងអាជីពសម្ដែង ហើយនាងថែមទាំងថា មិនខ្លាចមានរឿងអាស្រូវស្នេហាប៉ះខ្លួនឡើយ ព្រោះពេលនេះនាងមិនទាន់មានគូស្នេហ៍ទេ ហើយរឿងអាស្រូវទាំងឡាយអាចជំពប់លើអ្នកណាម្នាក់នោះ គឺមកពីខ្លួនឯងទាំងអស់ គ្មានអ្នកណាបង្ខំយើងនោះទេ។
គួរបញ្ជាក់ថា ការផ្ដល់ភាពរីករាយរបស់ក្រុមហ៊ុនប្រេងឥន្ធនៈភីធីធី ដែលមានក្រុមស្រីស្អាត Freshie girls ផ្ដល់រង្វាន់ដល់អ្នកឈ្នះដុំមាស១៨តម្លឹងនេះ ធ្វើនៅផ្ទះលេខ៣២០ ផ្លូវ១២៨ (កម្ពុជាក្រោម) សង្កាត់មិត្តភាព ខណ្ឌ៧មករា រាជធានីភ្នំពេញ។
អ្នកតំណាងក្រុមហ៊ុន BKA បានឲ្យដឹងថា “ការបង្ហាញខ្លួនរបស់ស្រីស្អាត Freshie Girl ទាំង៣នាក់រូបនេះ គឺធ្វើឲ្យកម្មវិធីកាន់តែទាក់ទាញ ហើយអ្នកឈ្នះរង្វាន់ទាំងឡាយបានថតរូបជាអនុស្សារីយ៍ជាមួយប្អូនៗទាំង៣នាក់ រួមទាំងពិធីកររូបសង្ហា លោកឈិត រតនា ផងដែរ៕
