កែវ ស្រីនាង និងទឹម រដ្ឋា ធ្លាប់តែប៉ះគ្នាក្នុងភាពយន្ដទេកន្លងមក ស្រាប់តែពេលនេះមកប៉ះគ្នាក្នុង MV មួយរបស់អតីតតារាចម្រៀងផលិតកម្មរស្មីហង្សមាស លោកអែនឌី ដោយឲ្យតារាស្រីទាំង២ដួង ដែលមានបទពិសោធន៍ក្នុងការសម្ដែងប៉ះគ្នា ដោយថែមទាំងមានឈុតខ្លះស្រីស្រស់ទាំង២ មានភាពស្និទ្ធស្នាលគ្នាដូចគូស្នេហ៍ទៀតផង។
បទចម្រៀងដែលជាការបន្លឺសំនៀងដោយលោកអែនឌី នោះ មានចំណងជើងថា ”ទីបំផុតទើបដឹងថាគេកុហក” ដែលនឹងត្រៀមចេញក្នុងពេលឆាប់ៗនេះហើយ។
ក្នុងជំនួបតាមទូរស័ព្ទកាលពីពេលថ្មីៗនេះ លោកអែនឌី បាននិយាយសរសើរតារាស្រីទាំង២រូបនេះថា “ពិតជាមានទេពកោសល្យមិនធម្មតាមែន ព្រោះលេងជាតួយ៉ាងម៉េច ក៏ធ្វើបានដែរ”។
តារាចម្រៀងបុរសមានស្បែកមិនចាញ់នារីនោះ ថ្លែងថា ”ខ្ញុំសូមសរសើរគាត់ទាំង២ លេងសមណាស់ ខ្ញុំសង្ឃឹមច្រើននៅពេលដែលគាត់ចូលមកសម្ដែងក្នុង MV បទថ្មីរបស់ខ្ញុំនេះ ព្រោះគាត់ទាំង២សុទ្ធតែមានបទពិសោធន៍ និងទេពកោសល្យល្អៗណាស់ ខ្ញុំពេញចិត្តដូចគ្នាតែម្ដង។ ខ្ញុំសង្ឃឹមថា ពេលបទនេះចេញទៅ បងប្អូននឹងបានប្លែកជាមិនខានទេ ព្រោះនេះជាលើកទី១ហើយសម្រាប់ខ្ញុំ ដែលបានសម្ដែងរួមគ្នាជាមួយតារាស្រីទាំង២ ក្នុងបទតែមួយបែបនេះ ហើយបទនេះខ្ញុំពេញចិត្តខ្លាំង”។
តាមរយៈរូបភាពខ្លះគេឃើញអ្នកនាងកែវ ស្រីនាង និងទឹម រដ្ឋា ហាក់មានភាពស្និទ្ធស្នាលគ្នាចម្លែកដូចគូរស្នេហ៍អីចឹង ទើបធ្វើឲ្យមានការសង្ស័យថា MV បទថ្មីរបស់លោកអែនឌី នោះអាចជាស្នេហាត្រីកោណតារាស្រីទាំង២ ដែលធ្វើឲ្យអតីតតារាហង្សមាស រូបនេះ ត្រូវខូចចិត្ត។ ប៉ុន្តែលោកអែនឌី បែរជាថា មិនទាន់អាចទម្លាយសាច់រឿងនេះចេញឲ្យគេដឹងមុនចេញជា Trailer ឬ Full MV ទៅវិញ ដោយថាចង់ឲ្យគេតាមដាន ហើយភ្ញាក់ផ្អើលចំពោះបទថ្មីរបស់លោកទាំងអស់គ្នាទៅវិញ។
ម្ចាស់បទ ”ទីបំផុតទើបដឹងថាគេកុហក” រូបនេះបន្ថែមថា ”សាច់រឿងហ្នឹង ខ្ញុំមិនទាន់អាចប្រាប់បានទេបង។ គ្រាន់តែថាបទនេះខ្ញុំមានការសម្រិតសម្រាំងខ្លាំងដែរ ព្រោះថតដល់ទៅម៉ោង៣ទៀបភ្លឺឯណោះ។ ខ្ញុំចង់ឲ្យបងប្អូនទាំងអស់គ្នាតាមដាន អីចឹងមិនហ៊ានទម្លាយសាច់រឿងអស់ទេ។ ខ្ញុំសូមសរសើរចំពោះកែវ ស្រីនាង និងទឹម រដ្ឋា ដែលគាត់ទាំង២សហការគ្នាធ្វើការក្នុងការថត MV មួយនេះ ដោយរលូនតែម្ដង”។
ក្នុង MV ថ្មីរបស់លោកអែនឌី នេះ គេបែរជាឃើញតារាចម្រៀងរូបនេះមានភាពស្និទ្ធស្នាលគ្នាជាមួយទឹម រដ្ឋា ជាងកែវ ស្រីនាង ទៅវិញ។ រហូតដល់មានឈុតខ្លះ លោកអែនឌី បីទឹម រដ្ឋា ក្នុងឈុតអាពាហ៍ពិពាហ៍ទៀតផង ដែលធ្វើឲ្យអ្នកខ្លះនិយាយថា ក្នុងបទ ”ទីបំផុតទើបដឹងថាគេកុហក” នោះអាចជាស្នេហាត្រីកោណរវាងទឹម រដ្ឋា និងកែវ ស្រីនាង ហើយចុងក្រោយ អែនឌី ជ្រើសរើសទឹម រដ្ឋា ដោយការសុំរៀបការទៀតផង បានជាលេងឈុតអាពាហ៍ពិពាហ៍បែបនេះ…។ យ៉ាងណា លោកអែន ឌី នៅតែមិនប្រាប់ពីសាច់រឿងទាំងនោះឡើយ ដោយព្យាយាមបិទបាំងជិតឈឹងតែម្ដង។
គួរបញ្ជាក់ថា ថ្មីៗនេះ លោកអែន ឌី បានចេញបុក MV ថ្មីផ្ទួនៗ ដោយបានកៀកកើយជាមួយតារាស្រីស្អាតៗក្នុងបទរបស់ខ្លួនមានដូចជា ពេជ្រ អាវីហ្សា , កែវ ស្រីនាង, ទឹម រដ្ឋា, សុខ សោម៉ាវត្តី និងឌុច លីដា ជាដើម ដែលធ្វើឲ្យប្រុសៗមិនតិចនាក់ឡើយ ច្រណែនតារាចម្រៀងរូបនេះ រហូតគេដាក់រហស្សនាមថា ”បុរសមានសំណាង” ជាងគេទៀតផង។
ទស្សនិកជនរង់ចាំមើលថា តារាស្រីសាច់សខ្ចីរូបណាដែលនឹងលេចមុខនៅពេលបន្ទាប់ ក្នុងឈុតរោលរាលរបស់លោកអែន ឌី?៕