តារាសិចស៊ីដើមទ្រូងធំទ្រលុកទ្រលន់ វ៉ាង ស្រីណូ ដែលលឹបលក្នុងអាជីពសិល្បៈនោះ ស្ងាត់ៗស្រាប់តែបង្អួតរថយន្តទំនើបៗ២គ្រឿង ព្រមគ្នា ដែលមានតម្លៃខ្ទង់សែនដុល្លារ គួរឱ្យភ្ញាក់ផ្អើល ខណៈដែលមានការសង្ស័យថា នាងទទួលបានការជ្រោមជ្រែងពីម្ចាស់ស្នេហ៍ទ្រព្យស្តុក។
កន្លងមក គេគ្រាន់តែដឹងថា វ៉ាង ស្រីណូ ជិះរថយន្តទំនើបម៉ាក Range Rover តម្លៃជិត១០ម៉ឺនដុល្លារ ប៉ុន្តែអ្វីដែលកំពុងទាញបានការចាប់អារម្មណ៍ខ្លាំងទាំងក្នុងនិងក្រៅសង្គមសិល្បៈនោះ នៅថ្ងៃទី០១ ខែកុម្ភៈ ឆ្នាំ២០១៨ កន្លងទៅនេះ ស្រីណូ បានបង្អួតរថយន្តទំនើប២គ្រឿង ព្រមគ្នា នៅលើបណ្តាញសង្គមហ្វេសប៊ុក មានម៉ាក Lexus 570 និងម៉ាក Mercedes ដ៏ថ្មីសន្លាង គួរឱ្យស្ញប់ស្ញែង។ ពោលគឺមើលទៅជីវិតរបស់នាងពេលនេះហ៊ឺហាមិនចាញ់ជំទាវទ្រព្យស្តុកមួយចំនួនទេ ដែលក្រៅពីមានរថយន្តទំនើបតម្លៃរាប់សែនដុល្លារ នាងរស់នៅក្នុងទ្រនំវីឡាដ៏ធំស្កឹមស្កៃនៅបុរីប៉េងហួត បឹងស្នោ ទៀត។ មិនត្រឹមតែប៉ុណ្ណោះ នាងក៏ឧស្សាហ៍ទៅលំហែកាយនៅឯក្រៅប្រទេសជាញឹកញាប់ផងដែរ និងទិញរបស់ប្រើប្រាស់សុទ្ធតែម៉ាកល្បីៗថ្លៃៗ យ៉ាងស៊ីវិល័យ។
យ៉ាងណា ទន្ទឹមនឹងនោះក៏មានពាក្យខ្សឹបខ្សៀវសួរដេញដោលគ្នាថា តើស្រីណូ បានលុយពីណាច្រើនម៉្លេះបានសម្ញែងភាពហ៊ឺហាបានឆាប់រហ័សបែបនេះ ខណៈដែលគេគ្រាន់តែដឹងថា នាងលែងខ្វល់ពីអាជីពសិល្បៈប្រាក់ល្អិត ងាកទៅលក់ផលិតផលតាមអនឡាញបន្តិចបន្តួច។
ស្របពេលដែលវ៉ាង ស្រីណូ សម្ញែងភាពហ៊ឺហាផ្អើលសង្គមហ្វេសប៊ុកនោះ ក៏មានការសង្ស័យថា ទំនងជានាងទទួលបានការជ្រោមពីម្ចាស់ស្នេហ៍សម្បូរទ្រព្យ ខណៈដែលកន្លងមក លេចឮដំណឹងថា មានមន្ត្រីធំផ្កាយ២ ទ្រព្យស្តុកម្នាក់ ដែលមានឪពុកជាមន្ត្រីក្នុងជួររាជរដ្ឋាភិបាលតាមថ្ពក់ស្នេហ៍យ៉ាងស្អិត និងគ្រោងឱ្យនាងក្លាយជាម្ចាស់សណ្ឋាគារលំដាប់ផ្កាយ៥ នៅក្នុងព្រះសីហនុ ផងនោះ។
យ៉ាងណា ពាក់ព័ន្ធនឹងដំណឹងនេះ មិនអាចទាក់ទងសុំការសម្ភាសន៍ពីវ៉ាង ស្រីណូ បានទេ ហើយយើងនឹងរង់ចាំការបកស្រាយពីនាងជានិច្ច។ ប៉ុន្តែកន្លងមក ស្រីណូ ក៏ធ្លាប់ចេញមុខបដិសេធមន្ត្រីធំផ្កាយ២ បោះនុយធំតាមថ្ពក់ស្នេហ៍។ ថែមទាំងធ្លាប់អះអាងថា អ្វីដែលនាងមាន ជាកម្លាំងញើសឈាមរបស់នាង ដោយពុំទទួលបានការជ្រោមជ្រែងពីបុរសណាម្នាក់ទេ៕