មាស សុខសោភា ពិតជាធ្វើឲ្យអ្នកទស្សនាការផ្សាយផ្ទាល់របស់ប៉ុស្ដិ៍លេខ៥ មានការរំជើបរំជួលខ្លាំងនៅពេលដែលអ្នកចម្រៀងល្បីរូបនេះលេខមុខនៅឆាកតន្ដ្រី “ខារ៉ាបាវ Spark Concert 2018” នៅមជ្ឈមណ្ឌលកម្សាន្តស្ប៉ាក កាលពីថ្ងៃអាទិត្យ ទី០៤ ខែកុម្ភៈ ឆ្នាំ២០១៨ នេះ ព្រោះតែអ្នកចម្រៀងជួរមុខគេរបស់ផលិតកម្មថោន រូបនេះ លេងឈុតខោខ្លីពណ៌ត្រួយចេករឹបរាង មើលទៅឡើងសិចស៊ីអស់ទាស់ ទើបធ្វើឲ្យអ្នកទស្សនាផ្ទាល់ហ៊ោកញ្ច្រៀវខ្លាំង នៅពេលដែលឃើញសោភា លេងខ្លួនប្លែកទៅៗ ហើយមានក្បាច់រាំកាន់តែសាហាវបែបនេះ។
តារាចម្រៀងផលិតកម្មថោន និង Camtrax រូបនេះ បានច្រៀងបទល្បីៗរបស់ខ្លួនចុងក្រោយ៥បទ មានដូចជា បទ ”អារម្មណ៏ក្លែងក្លាយ”, ”ទឹកភ្នែកមនុស្សស្មោះ”, ”ខូចចិត្តធ្វើអី?”, ”Friday Night” និងបទ ”ចង្កេះgoal”។ បទចម្រៀងដែលមាសសុខសោភា ច្រៀងនិងលេងក្បាច់រាំគួរឲ្យចាប់អារម្មណ៏ជាងគេនោះ គឺបទ ”ចង្កេះGoal” ដែលអ្នកទស្សនាជក់ចិត្តជាមួយការលេងចង្កេះរបស់សុខសោភា។
ក្នុងជំនួបផ្ទាល់ មាស សុខសោភា និយាយលាយឡំសំណើចថា “មួយរយៈនេះ គឺពិតជាមានការតែងខ្លួនសិចស៊ីខុសពីលើកមុនៗមែន តែមិនមែនគ្រប់កម្មវិធីឡើយ ហើយពេលច្រៀងបទញាក់ គឺត្រូវតែស្លៀកពាក់អីចឹង ទើបត្រូវព្រោះរាំលើឆាក។
តារាល្បីរូបនេះអះអាងថា ”ខ្ញុំច្រៀងបទញាក់ មានរាំអីផង ឲ្យខ្ញុំស្លៀកហូលផាមួងអី រាំម៉េចកើតទៅ? ប៉ុណ្ណឹងមិនអីទេ ខ្ញុំជាអ្នកចម្រៀងសិចស៊ីយូរហើយ មិនមែនតែពេលនេះឯណា? ខ្ញុំមិនប្ដូរទេ កុំឲ្យតែជ្រុលហួសហេតុ “។
ក្រៅពីមាស សុខសោភា ក៏មានតារាចម្រៀងល្បីរបស់ផលិតកម្មរស្មីហង្សមាស ខេមរៈ សិរីមន្ដ ផងដែរ ដែលចូលជួយអង្រួនឆាកតន្រ្ដី “ខារ៉ាបាវ Spark Concert ២០១៨” នោះ ទើបធ្វើឲ្យទស្សនិកជនសប្បាយរីករាយជាខ្លាំង ព្រោះពួកគេថែមទាំងបានឡើងច្រៀង និងថតរូប Selfie ជាមួយសោភា និងសិរីមន្ដ ទៀតផង។
ខេមរៈ សិរីមន្ដ បានលើកយកបទចម្រៀងល្បីៗរបស់ខ្លួនឡើងច្រៀង មានដូចជាបទ ”ស្ទឹងត្រែងបងអើយ”, ”បុរសទឹកដប់”, ”ក្បាច់ពស់” និងបទ ”បទចឹងៗអីវិន អ្នកណាមិនរាំ”។
អតីតតារាចម្រៀងផលិតកម្មសាន់ដេ រូបនេះ នៅតែទទួលបានការគាំទ្រច្រើនគួរសម ជាមួយស្ទីលពាក់វ៉ែនតាខ្មៅ ហើយលេងក្បាច់ពោះ កូរពេញឆាកនោះ។
ខេមរៈ សិរីមន្ដ បានឲ្យដឹងថា ”ខ្ញុំពិតជាមានការរីករាយ ដែលថ្ងៃនេះបានមកច្រៀងនៅឆាកតន្រ្ដីប៉ុស្ដិ៍លេខ៥ ហើយមានអ្នកគាំទ្រ (Fan) ឡើងច្រៀងបទខ្ញុំដែរ។ សូមឲ្យទស្សនិកជនមកទស្សនាផ្ទាល់ឲ្យបានច្រើននៅទីនេះហើយខ្ញុំនឹងចូលរួមកម្មវិធីនេះក្រោយៗទៀតជាមិនខាន ព្រោះមកទីនេះសប្បាយទាំងអស់គ្នា”។
ក្រៅពីមាស សុខសោភា ដែលលេងខ្លួនសិចស៊ី ធ្វើឲ្យខេមរៈ សិរីមន្ដ បះសក់ច្រូងនៅលើឆាកតន្ដ្រីតែមួយនោះ ក៏មានការចូលរួមពីតារាថៃ នាងfroy , កញ្ញាសុខ ស្រីលក្ខណ៏ និងលោកលី ណាកូ ផងដែរ។
អ្នកតំណាងស្ថានីយទូរទស្សន៍ប៉ុស្ដិ៍លេខ៥ បានឲ្យដឹងថា “កម្មវិធីប្រគំតន្ដ្រី “ខារ៉ាបាវ Spark Concert 2018” នឹងធ្វើនៅមជ្ឈមណ្ឌលកម្សាន្ដ Spark រយៈពេល១ឆ្នាំ នូវតំណាក់កាលដំបូងសិន ដែលមានការផ្សាយផ្ទាល់រៀងរាល់ថ្ងៃអាទិត្យ ហើយយើងនឹងនាំតារាល្បីទាំងខ្មែរនិងបរទេស មកជួបជុំគ្នា ដើម្បីឲ្យបងប្អូនបានទស្សនាដោយសប្បាយរីករាយ ព្រោះថានេះជាទីតាំងនៅចំកណ្ដាលរាជធានីភ្នំពេញ តែម្ដង៕