ភ្នំពេញ ៖ កុមារីសុខ សុជាតា អតីតបេក្ខភាពវគ្គផ្តាច់ព្រ័តក្នុងកម្មវិធីប្រឡងចម្រៀងកុមារលំដាប់ថ្នាក់ពិភពលោក “The Voice Kids Cambodia” កាលពីយប់ថ្ងៃទី០៥ ខែកុម្ភៈ ឆ្នាំ២០១៨ បានជួបដោយផ្ទាល់ជាមួយសម្តេចហ៊ុន សែន នាយករដ្ឋមន្ត្រីកម្ពុជា នៅក្នុងពិធីជប់លៀងមង្គលការមួយ និងទទួលបានកាដូចំនួន១ពាន់ដុល្លារ។
គួរបញ្ជាក់ថា កុមារីសុខ សុជាតា, កុមារាលី លីងគ័ង្គ និងកុមារាពេជ្រ ថៃ ដែលសុទ្ធសឹងជាអតីតបេក្ខភាពកម្មវិធីប្រឡងចម្រៀង “The Voice Kids Cambodia” កាលពីយប់ថ្ងៃទី០៥ ខែកុម្ភៈ ឆ្នាំ២០១៨ បានចូលរួមច្រៀង និងសម្តែងនៅក្នុងពិធីជប់លៀងមង្គលការមួយ ដែលមានវត្តមានថ្នាក់ដឹកនាំជាន់ខ្ពស់រាជរដ្ឋាភិបាលជាច្រើនបានចូលរួម។ នៅក្នុងឱកាសនោះ សម្តេចហ៊ុន សែន ព្រមទាំងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអនុញ្ញាតិឱ្យកុមារា-កុមារីទាំង៣នាក់ បានចូលជួបសំណេះសំណាលដោយផ្ទាល់ ព្រមទាំងបានឧបត្ថម្ភជាទឹកប្រាក់ ក្នុងម្នាក់១ពាន់ដុល្លារទៀតផង។
យោងតាមគណីហ្វេសប៊ុកផ្ទាល់ខ្លួនរបស់កុមារី សុខ សុជាតា កាលពីយប់ថ្ងៃទី០៥ ខែកុម្ភៈ ឆ្នាំ២០១៨ បានបង្ហោះសារមួយថា “ថ្ងៃនេះ ខ្ញុំសប្បាយរីករាយណាស់ ព្រោះបានជួបលោកតាសម្តេច និងលោកជំទាវយាយ…”។
រហូតមកដល់ព្រឹកថ្ងៃទី០៦ ខែកុម្ភៈ ឆ្នាំ២០១៨ ហ្វេសប៊ុកកុមារីសុខ សុជាតា បានបង្ហោះរូបភាពចំនួន២សន្លឹក ដែលបង្ហាញពីការថតរូបសែលហ្វីជាមួយនឹងសម្តេចហ៊ុន សែន ១ប៉ុស្តិ៍ និង១ប៉ុស្តិ៍ទៀត ជាមួយនឹងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងបង្ហោះសារមួយឃ្លាថា “ចៅសូមអរគុណ លោកតាសម្តេច និងលោកយាយជំទាវ ដែលបានឧបត្ថម្ភប្រាក់ចំនួន១០០០ដុល្លារដល់ចៅ ក្នុងពីធីជប់លៀងមង្គលការកាលពីយប់មិញ ចៅសូមជូនពរលោកតាសម្តេច និងលោកយាយជំទាវ មានសុខភាពល្អ កម្លាំងមាំមួន អាយុយឺនយូរ…”។
គួរបញ្ជាក់ថា កុមារី សុខ សុជាតា មានអាយុ១២ឆ្នាំ គឺជាសិស្សរៀនថ្នាក់ទី៧B២ នៅអនុវិទ្យាល័យវត្តដំបូកខ្ពស់ មានឪពុកជាជាងអគ្គិសនី និងម្តាយជាអាជីវករ និងមានលំនៅក្នុងរាជធានីភ្នំពេញ។
នៅក្នុងកម្មវិធីប្រឡងចម្រៀងកុមារលំដាប់ថ្នាក់ពិភពលោក “The Voice Kids Cambodia” ពីមួយវគ្គទៅមួយវគ្គ កុមារីសុខ សុជាតា ដែលពោរពេញទៅដោយរូបសម្រស់ គួរឱ្យគ្រឺតក្នាញ់ផងនោះ បានបញ្ចោញនូវសមត្ថភាពយ៉ាងល្អឡើងជាលំដាប់ ទាំងទឹកដមសំឡេង ក៏ដូចជាកាយវិការនៃការសម្តែង រហូតធ្វើឱ្យមហាជនអ្នកទស្សនាបោះឆ្នោតគាំទ្រ ឱ្យក្លាយជាបេក្ខភាពឈានទៅដល់វគ្គផ្តាច់ព្រ័ត ហើយទោះជាមិនបានលើកពាន “The Voice Kids Cambodia” ក្តី ប៉ុន្តែកុមារីរូបនេះត្រូវបានក្រុមហ៊ុនហង្សមាស លើកតម្កើង និងផ្តល់ឱកាសឱ្យក្លាយជាតារាចម្រៀងវ័យក្មេងប្រចាំផលិតកម្មរស្មីហង្សមាស និងកំពុងទទួលបានការគាំទ្រពីសំណាក់មហាជនទូទៅ៕