ស្រីស្អាតអុីងអុីង និងប្រុសសង្ហា ម៉ា ច័ន្ទបញ្ញា ថតរឿង “កិច្ចសន្យាស្នេហ៍” ស្រដៀងរឿងស្នេហាផ្ទាល់ខ្លួន

ផលិតកម្ម Rock បានធ្វើពីធីសម្ពោធខ្សែភាពយន្ដខ្នាតធំរបស់ខ្លួន កាលពីលា្ងចថ្ងៃទី០៦ ខែកុម្ភៈ ឆ្នាំ២០១៨ នៅផ្សាសូរិយា ជាន់ផ្ទាល់ដី ដោយមានតារាសិល្បៈ អ្នកដឹកនាំរឿង និងអ្នកសារព័ត៌មានជាច្រើនបានចូលរួម។ តួឯកស្រីក្នុងរឿង ”កិច្ចសន្យាស្នេហ៍” នេះ គឺស្រីស្អាតអ៊ីងអ៊ីង ដឹកដៃប្រុសសង្ហាដែលជាសង្សារនា ងលោកម៉ា ច័ន្ទបញ្ញា លេងជាតួឯកប្រុស និងមានតារាសម្ដែងជាច្រើនដួងទៀត បានចូលរួម ដូចជា កញ្ញាម៉ារីសា, លោកគឹម សាន, Yoro Mong, Skyler, Soy SengHour ជាដើម ដែលមានរយៈពេល១ម៉ោង៤៥នាទី ហើយជាប្រភេទរឿងស្នេហា ខ្មោច និងកំប្លែង។ រឿងនេះជាការនិពន្ធដោយកញ្ញាស៊ា រស្មី និងដឹកនាំសម្ដែងដោយលោកមង្គល ព្រមទាំងមានក្រុមហ៊ុនឧបត្ថម្ភ ដូចជា GPark Energy dring, ភេសជ្ជៈ honey Lemon, Soriya Center Point, TMS និង Akasa Studio។

គេចាប់អារម្មណ៍ថា តួឯកស្រី កញ្ញាអ៊ីងអ៊ីង ដែលសម្ដែងជាតួកូនជនជាតិភាគតិចនោះ មានសម្រស់លេចធ្លោខ្លាំងនៅពេលដែលគ្រងឈុតក្រមុំជនជាតិ ហើយនាងបានយកសង្សាររបស់នាង តារាចម្រៀងម៉ា ច័ន្ទបញ្ញា ចូលសម្ដែងជាដៃគូដែរ ហើយបើតាមអ្នកដឹកនាំបានឲ្យដឹងថា សាច់រឿងទាំងមូលក៏ស្រដៀងទៅនឹងរឿងស្នេហាកញ្ញាអ៊ីង អ៊ីង និងលោកច័ន្ទបញ្ញា ផងដែរ។

ស្រីស្អាតអ៊ីងអ៊ីង បានឲ្យដឹងថា ”រឿងនេះមានការពិបាកជាងរឿងផ្សេងៗ ដែលខ្ញុំបានថត ព្រោះនិយាយឲ្យត្រង់ទៅ ខ្ញុំខ្លួនឯង គឺខ្ញុំខ្លាចខ្មោចជាងគេ តែឈុតខ្មោចដែលខ្ញុំលេងហ្នឹង គឺមានប្រហែល២០%ទេ។ រឿងនេះមានកំប្លែង ស្នេហាអីផង។ ខ្ញុំមានជំនឿថា បងប្អូននឹងចូលទស្សនាច្រើនជាមួយរឿងនេះ ព្រោះមានឈុតឆាកប្លែកៗច្រើនណាស់ ហើយខ្ញុំមិនអាចនិយាយអស់ទេ បើចង់ដឹង មានតែមកទស្សនាទាំងអស់គ្នា”។​

ចំណែកសង្សារនាងអ៊ីងអ៊ីង លោកម៉ា ច័ន្ទបញ្ញា បានឲ្យដឹងដែរថា”នៅក្នុងរឿងនេះក៏មានបទចម្រៀងខ្ញុំដែលមានចំណងជើងថា ”កិច្ចសន្យាស្នេហ៏” អមសាច់រឿងដែរ ដែលបទនេះនឹងត្រៀមបង្ហោះនៅលើ Youtube ផងដែរ។ បទនេះស្ដែងចេញពីមនោសញ្ចេតនាពិតមួយ ហើយសាច់រឿងហ្នឹង ក៏មានការពាក់ព័ន្ធស្នេហារបស់ខ្ញុំផងដែរ។ ខ្ញុំមានសង្ឃឹមច្រើនចំពោះរឿងនេះថា នឹងមានការគាំទ្រច្រើន ព្រោះសាច់រឿងល្អ និងមានគ្រប់រសជាតិទាំងស្នេហា កំប្លែង និងខ្មោច ជាដើម”។

គេចាប់អារម្មណ៍ថា មុននេះ ស្រីស្អាតអ៊ីងអ៊ីង ក៏បានលេចមុខក្នុងភាពយន្ដរបស់ប៉ុស្ដិ៍ហង្សមាស រឿង ”សិសិររដូវក្នុងបេះដូង” ដោយទទួលបានការចាប់អារម្មណ៍ច្រើនគួរសមដែរ ខណៈដែលនាងក៏ធ្លាប់សង្សារថត MV បទរបស់តារាចម្រៀងអេដា ”២នាក់បានហើយ” មុននឹងឈានមកថតរឿង ”កិច្ចសន្យាស្នេហ៍” របស់ផលិតកម្ម Rock នេះ។

លោកយឹម សុសត្យា ហៅលីម៉េង ជំនួយការលោកឧកញ៉ាគិត ធាង និងជាអ្នកចាត់ការទូទៅផលិតកម្ម Rock បានឲ្យដឹងថា ”រឿង ”កិច្ចសន្យាស្នេហ៍” នេះ ចំណាយទុនអស់ថវិកាជាង៥ម៉ឺនដុល្លារ ហើយយើងចំណាយពេល៦ខែ ទើបថតចប់។ នេះជារឿងទី១២ របស់ផលិតកម្ម Rock ហើយជាគោលការណ៏ក្នុង១ឆ្នាំ យើងថតពី៤ទៅ៦រឿង។ រឿងនេះយើងបានហៅបងប្អូនជនជាតិភាគតិចមកថតដែរ ហើយយើងបានសាងសង់ផ្ទះសម្រាប់ថតកុនជាផ្ទះជនជាតិនោះ បានជាង១០ខ្នង នៅសហគមន៍ជនជាតិភាគតិចភូមិកាទៀង ខេត្តរតនគិរី ហើយពេលថតចប់ គឺយើងទុកឲ្យបងប្អូនជនជាតិនៅតែម្ដង។ រឿងនេះត្រូវទៅតាមវ័យស្នេហានាពេលបច្ចុប្បន្ន ហើយផលិតកម្ម Rock ចំណាយថវិកាច្រើនក្នុងការផលិតរឿងឲ្យមានគុណភាព តម្រូវតាមទីផ្សារផង និងជួយដល់សង្គមផងដែរ”។

លោកម៉ា ច័ន្ទបញ្ញា សង្សារនាងអ៊ីងអ៊ីង នោះ បានឲ្យដឹងថា “ចំណងស្នេហ៏លោកនិងបណ្ដូលចិត្ត មានរយៈពេលជាង១ឆ្នាំទៅហើយ ដោយលោកគ្រោងដឹកដៃអ៊ីងអ៊ីង ចូលរោងការរយៈពេលជាង១ឆ្នាំទៀតនេះហើយ”។

លោកបញ្ញា ដែលតាមការពារសង្សារជាស្រីស្អាតស្អិតគ្រប់ជំហាននោះថា “នៅពេលដែលអ៊ីងអ៊ីង ក្លាយជាភរិយាលោកហើយ គឺនាងអាចនៅបន្ដលេងសិល្បៈដដែល គ្រាន់តែមិនឲ្យថតរឿងណាដែលមានឈុតឆាកស្នេហាមិនសមរម្យនោះទេ។ ចំណែករឿង ”កិច្ចសន្យាស្នេហ៏” នេះ លោកសប្បាយចិត្តណាស់ដែលបានសម្ដែងជាមួយសង្សារជាស្រីស្អាត អ៊ីងអ៊ីង ដែលត្រូវ Rock ជ្រើសរើសទាំងគូរនេះ៕