គង់ សុជាតិ បាត់មុខមួយរយៈ ដោយសារធ្លាក់ខ្លួនឈឺ

ពិធីការិនីគង់ សុជាតិ ត្រូវប៉ាន់ខ្លាំងនៅរដូវក្ដៅនេះ ដោយជាប់ធ្វើមង្គលការនៅកម្មវិធីមង្គលការកូនអ្នកធំៗ នៅជុំវិញរាជធានីភ្នំពេញ ជាមួយស្វាមីអ្នកនាង លោកជា វិបុល ទើបធ្វើឲ្យប្រាក់ចំណូលពីសិល្បៈរបស់គ្រួសារតារា១គូនេះ អាចរកបានរាប់ម៉ឺនដុល្លារ ក្នុង១ខែៗ។ ដោយសារប្រឹងសម្រុកប្រមូលលុយធំទាំងយប់ទាំងថ្ងៃ ជាមួយស្វាមីក្មេងបែបនេះហើយ ទើបពេលនេះ អ្នកនាងសុជាតិ ធ្លាក់ខ្លួនឈឺផ្ដាសាយធំ រហូតបង្ខំចិត្តត្រូវដកខ្លួនមកសម្រាកព្យាបាលមួយរយៈសិន ព្រោះថាទោះជាលុយធំយ៉ាងណា ក៏មិនសំខាន់ជាងសុខភាពដែរ។

គង់ សុជាតិ និយាយដោយសំឡេងគ្រលៗសឹងតែស្ដាប់មិនស្គាល់ថា ”ខ្ញុំមិនស្រួលខ្លួនទេ ដូចជាគ្រុនផ្ដាសាយធំ រងាៗ ចេះតែក្អកហូត អីចឹងត្រូវការសម្រាកឲ្យស្រួលបួលសិន ទើបបន្ដការងារវិញ…”។

គង់ សុជាតិ កាន់តែមានទ្រព្យច្រើនក្រោយពីចូលរោងការជាមួយលោកជា វិបុល កាលពីថ្ងៃទី១៣ ខែវិច្ឆិកា ឆ្នាំ២០១៣ ដោយពេលនេះទទួលបានចំណងដៃស្នេហ៍ជាកូនស្រីម្នាក់ដ៏ស្រស់ស្អាត ឈ្មោះជា សុជាតិនារី ហៅដូរី។ គង់​ សុជាតិ ដែលបើកហាងរក្សាសម្រស់នៅក្បែរវិទ្យាល័យបាក់ទូក ជាង១០ឆ្នាំនោះ បានសម្រេចបំណងធំ ដោយបើកហាងសុជាតិ នៅទួលគោក ដោយសាងសង់អស់ទឹកប្រាក់២លានដុល្លារ នូវអគារក្សាសម្រស់កម្ពស់៧ជាន់ ដែលបានសម្ពោធកាលពីថ្ងៃទី១២ ខែសីហា ឆ្នាំ២០១៧។

សុភមង្គលអ្នកនាងសុជាតិ កាន់តែរឹងមាំជាមួយលោកជា វិបុល ក្រោយពីបានកូនស្រីម្នាក់ដ៏ស្រស់ស្អាតនេះ ខណៈដែលស្វាមីអ្នកនាងលោកវិបុល ចង់បានកូនប្រុសម្នាក់ទៀត ក្នុងពេលឆាប់ៗនេះ តែសុជាតិ ថា ត្រូវពន្យាពេលយកកូនថែមទៀតសិន ព្រោះអំឡុងពេលដែលអ្នកនាងពពោះកូនស្រីនោះ ត្រូវការសម្រាកពីសិល្បៈជាច្រើនខែ អីចឹងអ្នកនាងចង់សម្រុកការងារសិល្បៈសាជាថ្មីឡើងវិញ ហើយដកឃ្លាបានបន្ដិច ទើបបំពេញបំណងស្វាមីដែលចង់បានកូន១ទៀតនោះ។

អ្នកនាងសុជាតិ ប្រាប់ថា ពេលនេះអ្នកនាងមិនមែនមានកូនស្រីតែ១នោះទេ គឺមានកូនដល់ទៅ៣ហើយ បើទោះជាកូន២នាក់មុន មិនមែនជាកូនលោកវិបុល ក៏ដោយ តែស្វាមីថ្មីអ្នកនាងបានចាត់ទុកកូនៗទាំងអស់នេះ ដូចជាកូនលោកបង្កើតដែរ ចំណុចនេះហើយធ្វើឲ្យអ្នកនាងមានភាពកក់ក្ដៅខ្លាំងណាស់ក្នុងគ្រួសារថ្មីនេះ។

គង់ សុជាតិ បន្តថា អ្នកនាងសម្រាកពីការសម្រុកការងារសិល្បៈតែរយៈពេលខ្លីប៉ុណ្ណោះ ដើម្បីឲ្យសុខភាពវិលមកប្រក្រតីវិញធម្មតានោះ អ្នកនាងនឹងចូលទៅធ្វើការជាពិធីការិនីនៅតាមកញ្ចក់ទូទស្សន៍ តាមបណ្ដាកម្មវិធីមង្គលការ និងកម្មវិធីផ្សេងៗទៀតដូចដើម។

អតីតពិធីការិនីប៉ុស្ដិ៏លេខ៣ល្បីឈ្មោះរូបនេះ ត្រូវបានគេចាត់ទុកថាជាតារាមានទ្រព្យច្រើននាពេលបច្ចុប្បន្ន មានដូចជា លោកចា រិទ្ធី , លោកព្រាប សុវត្ថិ , លោកខេមរៈ​ សិរីមន្ដ , លោកយុគ ចិន្ដា និងអ្នកនាងខាត់​ សុឃីម​។ ពេលនេះ អ្នកនាងសុជាតិ ជិះរថយន្ដទំនើប Landcruiser V8 តម្លៃជិត១០ម៉ឺនដុល្លារ ហើយអ្នកនាងមានហាងរក្សាសម្រស់ ”សុជាតិ” ធំ៣ នៅទួលគោក , បាក់ទូក និងបឹងកេងកង៕