សួស វីសា សង្សារចាស់វិលផ្តើមស្នេហ៍ជាថ្មី លេចឮដំណឹងជិតចូលរោងការ

ក្រោយបែកស្នេហ៍ពីតារាចម្រៀងលោកមាស សាឡី និង ល្បីមានបុរសទ្រព្យស្តុកជាច្រើន តាមថ្ពក់ស្នេហ៍ ក្រោយចូលទ្រនំរស្មីហង្សមាស នោះ ថ្មីៗនេះ ស្រាប់តែលេចធ្លាយដំណឹងថា តារាចម្រៀងរូបស្រស់ កញ្ញាសួស វីសា បានសាងស្នេហ៍យ៉ាងស្អិតល្មួតជាមួយតារាសម្តែងលោកថមមី ថែមទាំងមានគម្រោងចូលរោងការទៀតផង…។

អតីតតារាចម្រៀងរបស់ផលិតកម្ម Rock កញ្ញាសួស វីសា ត្រូវបានគេដឹងថា បានភ្ជាប់ស្នេហ៍ឈានដល់ការភ្ជាប់ពាក្យជាមួយលោកមាស សាឡី រយៈពេលជាច្រើនឆ្នាំ និងគ្រោងចូលនឹមអាពាហ៍ពិពាហ៍ទៀតផង ប៉ុន្តែបានប្រេះឆាកណ្តាលទីនៅមុនពេលនាងហក់ចូលទ្រនំរស្មីហង្សមាស ខណៈដែលលោកមាស សាឡី ក៏មានប្រពន្ធកូនរួចទៅហើយដែរ។ ក្រោយពេលតារាចម្រៀងរូបស្រស់សាច់សខ្ចី កញ្ញាសួស វីសា ទាញបានភាពលេចធ្លោនៅលើវិថីចម្រៀងនៅទ្រនំហង្សមាស ល្បីថា មានបុរសៗអ្នកមានជាច្រើនតាមចោមស្នេហ៍ មានទាំងអ្នកចង់ជ្រោមជ្រែងឱ្យនាងហ៊ឺហារស់នៅដូចជំទាវទៀតផង។ ប៉ុន្តែ អ្វីដែលគួរឱ្យភ្ញាក់ផ្អើលនោះ ថ្មីៗនេះ ស្រាប់តែធ្លាយដំណឹងថា នាងបានសម្រេចចិត្តចងសម្ព័ន្ធស្នេហ៍ជាមួយតារាសម្តែង លោកថមមី ដែលថែមទាំងបែកធ្លាយរូបភាពកៀកកើយយ៉ាងផ្អែមល្ហែមនៅលើបណ្តាញសង្គមហ្វេសប៊ុកទៀតផង។

យោងតាមប្រភពពីចង្កោមអ្នកសិល្បៈ និយាយថា វីសា និងថមមី បានពិសោធស្នេហ៍ជាមួយគ្នាមួយរយៈធំមកហើយ ដែលពួកគេធ្លាប់ចែកផ្លូវគ្នាមួយរយៈទៀតផង ដោយសារមិនចុះសម្រុងគ្នា។ តាមដំណឹងថា បន្ទាប់ពីស្នេហារបស់គេប្រេះឆាមួយគ្រា លោកថមមី បានងាកទៅស្និទ្ធស្នាលជាមួយតារាកំប្លែង នាងប្រិមប្រិយ ខណៈដែលប្រិមប្រិយ បានបែកបាក់គូដណ្តឹងនៅអាមេរិក។

យ៉ាងណា មួយរយៈចុងក្រោយនេះ តាមប្រភពថា រងើកភ្លើងស្នេហ៍រវាងវីសា ជាមួយថមមី បានឆាបឆេះឡើងវិញ ថែមទាំងគ្រោងដឹកដៃគ្នាចូលរោងការទៀតផង។

តាមប្រភពពីចង្កោមអ្នកសិល្បៈ បានខ្សឹបខ្សៀវគ្នាថា កន្លងមក អ្នកទាំងពីរ (វីសា-ថមមី) ធ្លាប់បានរួមរស់ក្រោមដំបូលតែមួយទៀតផង ប៉ុន្តែក្រោយពេលត្រូវរ៉ូវគ្នាជាថ្មី សម្ព័ន្ធស្នេហ៍របស់អ្នកទាំងពីរមិនទាន់ដូចដើមនៅឡើយទេ។ ប៉ុន្តែពួកគេគ្រោងនឹងរៀបការឆាប់ៗ ដើម្បីការពារចំណងស្នេហ៍ឱ្យបានកាន់តែរឹងមាំ។

តារាចម្រៀងរូបស្រស់សម្បូរប្រុសចោមស្នេហ៍ កញ្ញាសួស វីសា មិនអាចទាក់ទងសុំការបញ្ជាក់បានទេ ចំពោះដំណឹងនេះ ហើយយើងនឹងរង់ចាំការបកស្រាយពីនាងជានិច្ច។

យ៉ាងណា លោកថមមី បានទទួលស្គាល់ថា រវាងរូបលោកនិងវីសា ពិតជាបានវិលរកគ្នាវិញមែន ប៉ុន្តែ យ៉ាងណា លោកសុំមិនទាន់និយាយអ្វីឱ្យលើសពីនេះទេ ខណៈដែលលោកគិតថា ស្នេហារបស់លោកស្ថិតក្នុងស្ថានភាពផុយស្រួយ នៅឡើយ បន្ទាប់ពីខ្វែងគំនិតគ្នាមួយរយៈមុន។

ប៉ុន្តៃលោកថមមី បានបង្ហាញពីជំនឿចិត្តថា ទំនាក់ទំនងរវាងលោកនិងវីសា នឹងកាន់តែល្អប្រសើរជាងនេះ ថែមទាំងអាចមានដំណឹងល្អក្នុងពេលឆាប់ៗទៀតផង។

តាមប្រភពថា ក្រោយរងើកភ្លើងស្នេហ៍ឆាបឆេះឡើងវិញ ចំណងស្នេហ៍រវាងវីសា និងថមមី កាន់តែផ្អែមល្ហែមជាងមុន និងត្រូវបានចាស់ទុំទាំងសងខាងបានដឹងឮ ចង់រៀបចំមង្គលការឱ្យពួកគេទៀតផង។ ប៉ុន្តែ លោកថមមី មិនទាន់ចង់ទម្លាយអ្វីលើសពីនេះទេ ព្រោះខ្លាចប៉ះពាល់ប្រជាប្រិយភាពរបស់វីសា ដែលកំពុងស្ទុះឡើងនៅទ្រនំរស្មីហង្សមាស។

ចាប់តាំងពីទាញបានភាពលេចធ្លោនៅរស្មីហង្សមាស កញ្ញាវីសា បានជំពប់នឹងដំណឹងស្នេហ៍ជាបន្តបន្ទាប់ ដែលល្បីមានទាំងមន្ត្រីធំ អ្នកជំនួញ និងឧកញ៉ាផង តាមថ្ពក់ស្នេហ៍ ហើយក្រោយពេលសាយភាយដំណឹងស្នេហ៍ជាមួយថមមី តាមដំណឹងថា មានបុរសៗអ្នកមានជាច្រើនខកចិត្តស្តាយស្នេហ៍នាង។

មុននេះបន្តិច តារាចម្រៀងរូបស្រស់ សម្បូរប្រុសចោមស្នេហ៍ កញ្ញាសួស វីសា ត្រូវបានអាណិកជនខ្មែរ នៅសហរដ្ឋអាមេរិក ឈ្មោះឆាំ ឆានី បានចោទនាងថា មានទំនាក់ទំនងស្នេហ៍ជាមួយសម្តេចនាយករដ្ឋមន្ត្រីនៃព្រះរាជាណាចក្រកម្ពុជា ដែលធ្វើឱ្យនាងភ័យបះសក់មិនតិចទេ។ ប៉ុន្តែរឿងបានស្ងប់ស្ងាត់ទៅវិញ ក្រោយពេលចេញមុខបដិសេធ និងព្រមានប្តឹងបុគ្គលបង្កាច់បង្ខូចនាងរូបនោះ។

កន្លងមក សួស វីសា ធ្លាប់បានបង្ហើបឱ្យដឹងថា នាងចង់បានដៃគូស្នេហានៅសហរដ្ឋអាមេរិក ព្រោះនាងចង់ទៅរស់នៅផ្ញើវាសនានៅទីនោះ ហើយនាងតែងតែអះអាងថា ពេលនាងជួបដៃគូស្នេហាពិតប្រាកដ នាងនឹងបើកចំហជាសាធារណៈ គឺមិនចងសម្ព័ន្ធស្នេហ៍ក្រោមរូបភាពលាក់លៀមនោះទេ។ ប៉ុន្តែពេលនេះ ស្រាប់តែបែកធ្លាយរឿងស្នេហ៍ជាមួយតារាសម្តែង លោកថមមី ថែមទាំងល្បីគ្រោងដឹកដៃគ្នាចូលរោងការទៀតផង។

ទោះជាយ៉ាងណា ជុំវិញដំណឹងស្នេហ៍ថ្មីនេះ អ្នកយកព័ត៌មានមិនអាចទាក់ទងសុំយោបល់បំភ្លឺពី កញ្ញាសួស វីសា បានទេ កាលពីចុងសប្តាហ៍មុននេះ ខណៈដែលលោកថមមី បានសារភាព។ ដូច្នេះ មានតែរង់ចាំការបញ្ជាក់ពីកញ្ញាសួស វីសា តែប៉ុណ្ណោះ៕