ថ្វីត្បិតតែជ្រកនៅផលិតកម្មផ្សេងគ្នាក្ដី តែតារាចម្រៀងពេជ្រ សោភា និងនាយចឺម ហាក់មានភាពស្និទ្ធស្នាលគ្នាខ្លាំង នៅពេលដែលអ្នកទាំង២ បានប៉ះគ្នានៅលើឆាកតន្រ្ដី “ខារ៉ាបាវ Spark Concert 2018” កាលពីថ្ងៃអាទិត្យ ទី១១ ខែកុម្ភៈ ឆ្នាំ២០១៨ នោះ។
ពេជ្រ សោភា បានលេងខ្លួនខុសពីធម្មតាដោយពាក់នាឡិកាដៃ ១គ្រឿង ម៉ាកRolex តម្លៃជាង២ម៉ឺនដុល្លារ និងលេងស្បែកជើងម៉ាកល្បីៗដែលកុម្មង់មកពីអាមេរិក ពាក់ផ្អើលឆាកតែម្ដង។ តារាដុះស្លែនៅហង្សមាសរូបនេះ បានច្រៀងបទល្បីៗរបស់ខ្លួន ដូចជា ”ស្រលាញ់បងម៉ែឲ្យជិះឆ្កែ”, ”ហុយហុយ”, ”ញ័រចង់រាំ” និងបទ ”រាំឡូយកប់លូ” ជាដើម។ ពេជ្រ សោភា ពិតជាធ្វើឲ្យរង្គើឆាកតន្រ្ដីប៉ុស្ដិ៍លេខ៥នេះមែន ដោយនាងយកក្រុមរាំអមដល់ទៅ១០នាក់ ឡើងអង្រួនឆាក នាំឲ្យអ្នកទស្សនាជក់ចិត្តជាមួយអ្នកចម្រៀងរូបនេះតែម្ដង។
ពេជ្រ សោភា ថ្លែងថា ”ខ្ញុំពេញចិត្តឡើងប៉ុស្ដិ៍លេខ៥ ព្រោះធ្លាប់ធ្វើការជាមួយគ្នាយូរមកហើយ សូមឲ្យបងប្អូនមកទស្សនាឲ្យបានច្រើនទាំងអស់គ្នា។ នៅរដូវក្ដៅនេះ ខ្ញុំរវល់ច្រើន ចុះច្រៀងតាមខេត្តរាល់សប្ដាហ៍ ហើយសូម្បីតែនៅខែធ្លាក់ភ្លៀងខាងមុខ ក៏មានគេទាក់ទងមកបណ្ដើរៗដែរ អីចឹងអាចនិយាយបានថា ខ្ញុំរវល់ច្រៀងទាំងនៅរដូវក្ដៅនិងរដូវធ្លាក់ភ្លៀង។ ចំណែករឿងពាក់នាឡិកានេះ គឺមានយូរហើយតើ ខ្ញុំពាក់ Rolex ហ្សីនមែន តម្លៃដូចគេថាអីចឹង។ ចំណែកស្បែកជើងវិញ ខ្ញុំបានកុម្មង់មកពីអាមេរិក ហើយតម្លៃមិនអាចប្រាប់ទេ ព្រោះខ្លាចគេថាយើងអួតអី…”។
ពេជ្រ សោភា ក៏ត្រូវបានក្រុមអ្នកគាំទ្រនាងចោមថតរូបដែរនៅក្រោយឆាកហើយលោកសុខ មេសា ហៅនាយចឺម បានមកកៀកកើយជាមួយរៀមច្បង ដោយភាពស្និទញធស្នាលគ្នាផងដែរ។
នាយចឺម ដែលមុននេះក្រុមរាំខ្លួនរាំឡើងបាក់ឆាកនៅខេត្តក្រចេះ នោះបានលើកយកបទល្បីៗរបស់ខ្លួនពេលដែលប៉ះរៀមច្បងពេជ្រ សោភា នោះ មានដូចជា ”អារហាម”, ”អ្នកអត់សង្សារលើកដៃ”, ”ស្រីស្អាតគីមី”…។
តារាចម្រៀងសាន់ដេ រូបនេះ បានឲ្យដឹងថា ”ខ្ញុំសប្បាយចិត្តដែលប៉ុស្ដិ៍លេខ៥ ហៅខ្ញុំមកច្រៀង។ សូមឲ្យបងប្អូនមកទស្សនាកម្មវិធីនេះឲ្យច្រើន។ តាំងពីខ្ញុំក្លាយទៅជាតារាល្បី (Super Star) មក រវល់រហូតតែម្ដង ហើយចេញពីប៉ុស្ដិ៍លេខ៥ ទៅច្រៀងនៅខេត្តកំពង់ធំទៀត អីចឹងលុយក៏ចូលទៅតាមហ្នឹងដែរ… (សើច)។ ពីមុនគ្មានអ្នកណាស្គាល់អាចឺម ទេ តែតាំងពីអាចឺម ល្បីមកគេហៅច្រៀងរហូត…”។
ក្រៅពីពេជ្រ សោភា ដែលដឹកដៃនាយចឺម ឡើងអង្រួនឆាកប៉ុស្ដិ៍លេខ៥ កណ្ដាលថ្ងៃត្រង់នោះ ក៏មានតារាមួយចំនួនទៀតចូលរួមដែរ ដូចជា កញ្ញាវីរៈនិច្ច , ម៉ុង ចាន់កញ្ញា និងកញ្ញាឈិន ម៉ានិច្ច ជាដើម ដែលធ្វើឲ្យអ្នកគាំទ្រតារាចម្រៀងផ្សេងគ្នាទៅទស្សនាកម្មវិធីប្រគំតន្រ្ដីនេះ កាន់តែច្រើនជាងសប្ដាហ៍មុន។
អ្នកតំណាងប៉ុស្ដិ៍លេខ៥ បានឲ្យដឹងថា “ប៉ុស្ដិ៍លេខ៥ នឹងនាំតារាល្បីជាច្រើនដួងថែមទៀត ទាំងតារាជាតិ និងអន្ដរជាតិ មកបម្រើរអារម្មណ៍បងប្អូនទាំងអស់ឲ្យសប្បាយរីករាយនៅថ្ងៃអាទិត្យនេះ ព្រោះទីតាំងប្រគំតន្រ្ដីនេះនៅចំកណ្ដាលរាជធានីភ្នំពេញ តែម្ដង ងាយស្រួលអ្នកមកទស្សនាផ្ទាល់។ យើងមិនខ្លាចក្នុងការចំណាយលើការហៅតារាឡើងច្រៀងទេព្រោះយើងចង់ឲ្យបងប្អូនបានសប្បាយថ្ងៃចុងសប្ដាហ៍ទាំងអស់គ្នា៕