តេង លក្ខិណា ដែលធ្លាប់តែជាស្រីស្អាតដាច់គេក្នុងចំណោមតារាវ័យក្មេង កាលពីឆ្នាំ២០១៥ នោះ ស្រាប់តែពេលនេះ នាងបែរជាស្គមស្គាំងធ្លាក់សម្រស់អស់ មើលសឹងតែមិនស្គាល់ថាជារូបនាងឡើយ។
តើហេតុអ្វីបានជាលក្ខិណា ធ្លាក់ខ្លួន យីអ៊ុនដាក់ និងអស់តំណែងជាស្រីស្អាតនៅផលិតកម្ម M បែបនេះ?
តេង លក្ខិណា ពេលនេះមិនមែនដូចលក្ខិណា ពីមុនឡើយ ព្រោះតារាដែលធ្លាប់តែមានរូបសម្រស់គួរឱ្យក្នាញ់រូបនេះ ប្រែទៅជាស្លេកស្លាំងខុសពីធម្មតា ហើយថែមទាំងអស់តំណែងជាតារាចម្រៀងនៅផលិតកម្ម M ទៀតផង។
ប្រភពព័ត៌មានបានឱ្យដឹងថា ពេលនេះលក្ខិណា និងប្អូនប្រុសរបស់នាង លោកតេង ឆេកូ លែងជាអ្នកចម្រៀងរបស់ M ទៀតហើយ ទើបធ្វើឱ្យស្រីស្អាតតូចច្រឡឹងរូបនេះ ហាក់រសាត់អណ្តែត ដោយនឹងខ្វះខ្នងបង្អែកដូចមុន ហើយបើនឹងវិលត្រឡប់មករកអាជីពចាស់សម្តែងវិញ ខ្លាចខ្មាសមិត្តភក្តិ ទើបធ្វើឱ្យតារារូបនេះត្រូវបង្ខំចិត្តដកខ្លួន និងសម្ងំនៅឱ្យឆ្ងាយពីពិភពសិល្បៈមួយរយៈសិន។
យ៉ាងណា នៅមិនទាន់មានការបញ្ជាក់ពីតេង លក្ខិណា ផ្ទាល់នៅឡើយ ព្រោះលេខទូរស័ព្ទនាងមិនអាចទាក់ទងបានទេ។ អ្នកយកព័ត៌មានយើងបានទាក់ទងទៅពិធីករម្នាក់នៅទូរទស្សន៍ MyTV ដែលធ្លាប់ស្និទ្ធស្នាលជាមួយតេង លក្ខិណា បុរសនោះអះអាងដោយសុំមិនបញ្ចោញឈ្មោះថា លក្ខិណា កំពុងត្រៀមវិលត្រឡប់មកចូលអាជីពសម្តែងវិញ នាពេលខាងមុខនេះ ព្រោះថា ពេលនេះនាងមានគីឡូឡើងជ្រុល ហើយកំពុងប្រឹងសម្រក ទើបមិនទាន់អាចបង្ហាញខ្លួនតាមកម្មវិធីអ្នកសិល្បៈដូចមុន។
តេង លក្ខិណា ដែលលេចធ្លោគួរសម កាលពីឆ្នាំ2015 ទាំងអាជីពសម្តែង ខារ៉ាអូខេ និងជាពិធីការិនីនៅ MyTV នោះ ស្រាប់តែហក់ចូលធ្វើជាតារាចម្រៀងនៅផលិតកម្ម M ដោយចៃដន្យ រហូតលេចឮរឿងដំណឹងដ៏រសើបថា លក្ខិណា មានស្នេហាជាមួយថៅកែស្រីផលិតកម្មទៀតផង តែរឿងនេះត្រូវបានលក្ខិណា ច្រានចោល។ ប៉ុន្តែ តាមព័ត៌មានចុងក្រោយបានឱ្យដឹងថា លក្ខិណា លែងមានភាពស្និទ្ធស្នាលជាមួយថៅកែស្រីទៀតហើយ ដោយសារតែមានថៅកែស្រីលក់ពេជ្រម្នាក់ទៀត នៅម្តុំផ្សារធំថ្មី តាមស្រលាញ់លក្ខិណា យ៉ាងប្រកិតបំផុត។
ទោះជាយ៉ាងណា នៅពេលមានព័ត៌មានលេចឮថា លក្ខិណា ឆ្វាក់តែរឿងថៅកែស្រីតាមស្នេហ៍នេះ បានធ្វើឱ្យប្រុសៗមិនតិចនាក់ទេ ដែលខកចិត្តស្តាយស្នេហ៍លក្ខិណា បើសិនជាតារាដែលមានសម្រស់ដូចលក្ខិណា ហើយមើលរំលងប្រុសៗ បែរជាទៅបេតីតែស្រីៗនោះ។
តារាសម្តែងម្នាក់ដែលជាមិត្តភក្តិតេង លក្ខិណា បានបង្ហើបឱ្យដឹងថា ទោះជាតេង លក្ខិណា កំពុងល្បីថា ធ្លាក់ខ្លួន ព្រោះឆ្នាំថ្មីរាសីដាក់អារក្សជាន់យ៉ាងណាក៏ដោយ ក៏គេនៅតែឃើញនារីតូចច្រឡឹងរូបនេះ បង្ហាញរថយន្តទំនើបៗ ជិះប្តូររហូតដដែល ទើបនាំឱ្យអ្នករួមអាជីពជាច្រើនលាន់មាត់ថា “លក្ខិណា ម្តងរាសីដាក់ ម្តងរាសីឡើង”។
ប្រភពបានឱ្យដឹងថា ការត្រៀមវិលចូលប្រឡូកសិល្បៈសាជាថ្មី របស់តេង លក្ខិណា នាខាងមុខនេះ ពិបាកក្នុងការស្តារមុខឡើងវិញ ព្រោះថាមុននេះ នាងជាអ្នកចម្រៀង ហេតុនេះហើយការវិលទៅរកអាជីពចាស់ ថតសម្តែងនោះ អាចគ្រាន់តែជាការតេស្តមើលទៅលើការគាំទ្រប៉ុណ្ណោះ ហើយបើសិនជាមិនបានជោគជ័យទេនោះ លក្ខិណា នឹងប្រាកដជាឈប់ផ្តាច់ពីអាជីពសម្តែងរហូតជាមិនខាន ព្រោះថាមុននេះ នាងធ្លាប់មានលុយដុល្លារចាយពេញៗដៃ អ៊ីចឹងតើការថតសិល្បៈយកប្រាក់ល្អិតជាថ្មីវិញនោះ តារាស្រីរូបនេះនឹងមានអារម្មណ៍ដូចមុនដែរឬទេ? តែការបង្ហាញមុខជាថ្មីរបស់តេង លក្ខិណា នោះ ច្បាស់ជាធ្វើឱ្យតារាស្រីស្រស់រូបនេះអាចបន្សាបរឿងដែលគេសង្ស័យថា នាងលាក់ខ្លួន ព្រោះជាប់ទ្រុងគូស្នេហ៍ជាមិនខាន ហើយគេជឿថា ស្រីស្អាតដូចលក្ខិណា នឹងមានប្រុសៗអ្នកមានមិនតិចនាក់ឡើយ ដែលរង់ចាំត្រងស្នេហ៍តារាដែលតូចច្រឡឹង រូបឆោមស្រស់គយគន់មិនចេះណាយនេះ។
ក្រៅពីតេង លក្ខិណា តារាសម្តែងដែលប្តូរអាជីពទៅជាតារាចម្រៀង តែមិនបានជោគជ័យនោះ មានដូចជា គៀត សុវណ្ណាឡាង, គង់ សុកញ្ញា (អែនជី), ពេជ្រ សូលីកា ជាដើម ដែលពេលនេះ ខ្លះបានវិលត្រឡប់មករកអាជីពចាស់ និងខ្លះទៀតដកខ្លួនពីសិល្បៈ…៕