តារាចម្រៀង២ផលិតកម្មផ្សេងគ្នា គឺកញ្ញាទេព បូព្រឹក្ស បានមកប៉ះគ្នានៅឆាកតន្រ្ដីតែមួយ “ខារ៉ាបាវ Spark Concert 2018” កាលពីថ្ងៃទី១៨ ខែកុម្ភៈ នោះ ធ្វើឲ្យអ្នកទស្សនាការផ្សាយផ្ទាល់របស់ប៉ុស្ដិ៍លេខ៥ ជក់ចិត្តយ៉ាងខ្លាំង ដោយសារតែអ្នកចម្រៀងស្រីវ័យក្មេង បូព្រឹក្ស និងអ៊ីវ៉ា មិនត្រឹមតែមានរូបសម្រស់ស្រស់ស្អាតនោះទេ តែពួកគេមានក្បាច់រាំយ៉ាងរស់រវើកផងដែរ។ ទោះជាយ៉ាងណា មហាជនបានលើកឡើងថា អ៊ីវ៉ា ហាក់រាំនៅស្ទើរៗ ដោយមានក្រុមរាំអមតែ៤នាក់ប៉ុណ្ណោះ មិនអាចប្រជែងជាមួយទេព បូព្រឹក្ស ដែលមានក្បាច់រាំសាហាវ និងមានអ្នករាំអមដល់ទៅ១០រូបនោះបានឡើយ ខណៈដែលអ៊ីវ៉ា ថា នាងមិនមានចេតនាប្រជែងក្បាច់រាំជាមួយតារារូបណាទេ ហើយក៏គ្មានបំណងលេងក្បាច់រាំសាហាវៗដូចតារាណាដែរ។
ទេព បូព្រឹក្ស បានច្រៀងបទល្បីៗរបស់ខ្លួន ដូចជាបទ ”Turn It up “, ”ចឹកមួយ”, ”Girl Loy” និងបទ”អន្ទិតឆើត”។
ដោយឡែក អ៊ីវ៉ា ច្រៀងបទ ”បែកលេងៗបានហើយ”, ”មហាមិត្ត” និងបទ ”ភ្នែកតូចគួរឲ្យស្រលាញ់”។
ទេព បូព្រឹក្ស និយាយថា ”ខ្ញុំមានអារម្មណ៍សប្បាយចិត្តខ្លាំងណាស់ដែលបានច្រៀងកម្មវិធី “ខារ៉ាបាវ Spark Concert 2018” នេះជាលើកទី១ហើយ ខ្ញុំនឹងមកចូលរួមកម្មវិធីនេះលើកក្រោយៗទៀត”។
ចំណែក អ៊ីវ៉ា ថ្លែងថា ”នេះជាកិត្តិយសសម្រាប់ខ្ញុំដែលបានឡើងច្រៀងកម្មវិធីប្រគំតន្ដ្រីរបស់ប៉ុស្ដិ៍លេខ៥ នេះ បានជួបជាមួយបងប្អូនមកទស្សនាផ្ទាល់ច្រើន។ ខ្ញុំនឹងមានបទចម្រៀងថ្មីៗមកច្រៀងជូនទស្សនិកជននៅកម្មវិធីប្រគំតន្ដ្រីនៅសប្ដាហ៍បន្ដបន្ទាប់ទៀត ឲ្យតែខាងប៉ុស្ដិ៍ហៅខ្ញុំច្រៀង”។
ក្រៅពីតារាចម្រៀងអ៊ីវ៉ា និងទេព បូព្រឹក្ស ប៉ះគ្នាមួយប្រាវផ្អើលពេញ មជ្ឍមណ្ឌល Spark នោះ ក៏មានម្ចាស់ពាន “Cambodian Idol” រដូវកាលទី១ លោកនី រតនា ឡើងច្រៀងជាមួយគ្នាដែរ ដោយបុរសសង្ហារូបនេះបានលើកយកបទ ”ប្រពន្ធអូនលំបាកហើយ”, ”មនុស្សប្រុសពេលយំអាក្រក់មើលខ្លាំងណាស់” និងបទ ”ញ៉ែអ្នកលក់ឡេ”។
ទេព បូព្រឹក្ស ច្រៀង១កម្មវិធី ស៊ីថ្លៃ១៥០០ទៅ១៨០០ដុល្លារ ហេតុនេះហើយ ពេញ១រដូវក្ដៅ បូព្រឹក្ស ហៅស្រីនិច្ច អាចរកប្រាក់ចំណូលបានជាច្រើនម៉ឺនដុល្លារ ស្របពេលដែលរឿងស្នេហានាងជាមួយតារាចម្រៀងរួមដំបូលលោកងួន ចាន់ដេវីត កាន់តែល្បីសុសសាយដូចអាជីពចម្រៀងដែរ ដោយពួកគេមានគម្រោងដឹកដៃគ្នាចូលរោងការទៀតផង។ ចំពោះ អ៊ីវ៉ា ច្រៀង១កម្មវិធី ស៊ីថ្លៃជាង១ពាន់ដុល្លារដែរ ហើយតារាចម្រៀងដែលគេកំពុងតែសង្ស័យថា នាងចេញពីសាន់ដេ ចូលទៅហង្សមាស នោះ ព្យាយាមលាក់គូស្នេហ៍មិនឲ្យគេស្គាល់ឡើយ បើទោះជាមុននេះមានការលេចឮថា មានលោកធំម្នាក់ជាប្អូនប្រុសលោកផ្កាយ៣ តាមស្នេហ៍ក្ដី។
អ្នករៀបចំកម្មវិធីប្រគំតន្ដ្រីប៉ុស្ដិ៍លេខ៥ បានឲ្យដឹងថា “ការដែលទេព បូព្រឹក្ស និងអ៊ីវ៉ា ឡើងឆាកតែមួយប៉ះគ្នានេះ ធ្វើឲ្យទស្សនិកជនបានសប្បាយចិត្ត ព្រោះថាតារាទាំង២មានសម្រស់ស្អាតម្យ៉ាងម្នាក់ ហើយក្បាច់រាំក៏មិនធម្មតាដែរ។ ប៉ុស្ដិ៍លេខ៥ នឹងនាំយកតារាល្បីៗជាច្រើនទៀត ទាំងតារាខ្មែរ និងបរទេស មកជួបជុំគ្នាដើម្បីឲ្យបងប្អូនបានទស្សនាផ្ទាល់ និងទស្សនាតាមកញ្ចក់ទូរទស្សន៍ ឲ្យមានភាពសប្បាយរីករាយនៅចុងសប្ដាហ៍ទាំងអស់គ្នា៕
