តារាចម្រៀងឆាយ ចាន់ឆោម ហៅឆាយ វីរៈយុទ្ធ ដែលជាអ្នកតំណាងរបស់ក្រុមហ៊ុនរថយន្តទំនើប Chevrolet បានជិះរថយន្ដទំនើបរបស់ខ្លួន Trailblazer តម្លៃជាង៧ម៉ឺនដុល្លារ ដែលជាកាដូរបស់ក្រុមហ៊ុន Chevrolet នោះទៅច្រៀងនៅប៉ុស្ដិ៍លេខ៥ ក្នុងកម្មវិធីប្រគំតន្ដ្រី “ខារ៉ាបាវ Spark Concert ២០១៨” នាំឲ្យអ្នកចម្រៀងសាន់ដេ រូបនេះ មានការចាប់អារម្មណ៍ជាច្រើនពីក្រុមយុវវ័យ។
ឆាយវីរៈយុទ្ធ ដែលជាកូនប្រសាអ្នកជំនួញល្បីឈ្មោះ លោកហាក់ សែ នោះ បានកៀកកើយគ្នាជាមួយតារាចម្រៀងសាច់សខ្ចី សុខ ពិសី ដែលធ្វើឲ្យអ្នកសារព័ត៌មានជាច្រើនចោមរោមផ្ដិតយករូបភាពអ្នកចម្រៀងល្បី១គូរបស់ផលិតកម្មសាន់ដេ នេះ។
ឆាយ វីរៈយុទ្ធ បានច្រៀងបទល្បីៗរបស់ខ្លួន ដូចជា ”គេមិនបានស្រលាញ់យើងទេ”, ”អាបោកក្មួយពូ”, ”ចែចែ” និងបទ ”រាំកក្រើក”។ តារាចម្រៀងល្បីរូបនេះបានលេងក្បាច់រាំឡើងរង្គើឆាកតន្ដ្រីតែម្ដង ជាមួយក្រុមរាំអមដែលមានក្បាច់រាំយ៉ាងរស់រវើក។ ការលេចមុខរបស់លោកឆោម នៅពេលនេះ គឺចំពេលដែលមានព័ត៌មានថា អតីតតារាចម្រៀងផលិតកម្ម Blue Diamond , M និង Bigman រូបនេះរើបង្វេចចេញពីផលិតកម្មសាន់ដេ ចូលទៅធ្វើជាសមាជិកថ្មីរបស់ហង្សមាស។
ឆាយ វីរៈយុទ្ធ បានប្រាប់អ្នកកាសែតថា ”ជាថ្មីម្ដងទៀត ខ្ញុំសូមអះអាងប្រាប់ៗបងអ្នកកាសែតថា ខ្ញុំនៅតែជាតារាចម្រៀងរបស់ផលិតកម្មសាន់ដេ ដដែលទេ។ ខ្ញុំមិនទៅណាទេ ព្រោះនៅទីនេះមានការងារច្រើន ទាំង Concert និងការថតភាពយន្ដ ជាដើម។ ម្យ៉ាងទៀត ខ្ញុំនៅមានកុងត្រាជាមួយសាន់ដេ ផងដែរ គឺនៅយូរអង្វែងទៀត”។
ដោយឡែក សុខ ពិសី បានលើកយកបទចម្រៀងល្បីៗរបស់ខ្លួនចុងក្រោយ មកអូសទាញការគាំទ្រដែរ មានដូចជាបទ ”គេមិនស្រលាញ់យើងទេ”, ”បើស្រលាញ់ហេតុអ្វីបងមិនខ្វល់”, ”ចិត្តចង់មានស្នេហ៍” និងបទ ”សង្សារជើងល្អ”។
សុខ ពិសី ដែលកន្លងមកគេច្រើនតែឃើញនាងច្រៀងបទស្លូវៗនោះ ស្រាប់តែពេលនេះងាកមកច្រៀងបទញាក់វិញម្ដង ដោយបញ្ចេញក្បាច់រាំគួរឲ្យក្នាញ់ទៀតផង។
តារាស្រីសាច់សដូចបណ្ដូលចេក បានឲ្យដឹងថា ”ខ្ញុំរករាយដែលបានច្រៀងកម្មវិធី “ខារ៉ាបាវ Spark Concert 2018” នេះ ព្រោះខ្ញុំបានជួបជាមួយអ្នកគាំទ្រ (Fan) ខ្ញុំដែលពួកគាត់ចេះច្រៀងបទខ្ញុំដែរ”។
សុខ ពិសី មិនខុសពីការលេចមុខនៅតាមស្ថានីយផ្សេងៗទៀតឡើយ គឺនាងត្រូវបានក្រុម Fan ជាច្រើននាក់តាមហែហមពេញឆាក ដោយពួកគេបានយកបាច់ផ្កា តុក្កតា និងកាដូផ្សេងៗទៀតជូនអ្នកចម្រៀងសាច់សខ្ចីរូបនេះ។
ក្រៅពីតារាល្បីទាំង២ដួងនេះ ក៏មានអ្នកចម្រៀងវណ្ណា ស័ក្ក និងម៉ុង ចាន់កញ្ញា ផងដែរ បង្ហាញខ្លួនលើឆាកតន្ដី្រតែមួយនេះ នាំឲ្យអ្នកទស្សនាផ្ទាល់បានជក់ចិត្តខ្លាំង ហើយពួកគេថា ប៉ុស្ដិ៍លេខ៥ ពិតជានាំតារាល្បីៗមករាល់សប្ដាហ៍មែន។
ឆាយ វីរៈយុទ្ធ ដែលមានភរិយាអ្នកនាងសែ ចាន់ឌី ទៅហើយនោះ កាន់តែស្និទ្ធស្នាលជាមួយសុខ ពិសី ជាងមុន ក្រោយពេលដែលខេមរៈសិរីមន្ដ រត់ចេញពីសាន់ដេ ទៅផ្ញើខ្លួនជាមួយហង្សមាស នោះ៕