តារាចម្រៀងលេងសម្រស់គួរឲ្យក្នាញ់ កញ្ញាផាន វីរ៉ាទីហៅរ៉ាប៊ី ដែលត្រៀមហោះហើរទៅសហរដ្ឋអាមេរិក ជាលើកទី១ ក្នុងជីវិតនោះ ស្រាប់តែមិនទាន់បានឡើងយន្ដហោះផង អ្នកចម្រៀងតូចច្រឡឹងរូបនេះបានបង្ហាញអារម្មណ៍ពិតថា នាងសែនខ្លោចចិត្តអាណិតអ្នកចម្រៀងប៊ុត សីហា ដែលមិនបានទៅរកលុយនៅបរទេសជាមួយនាង ព្រោះថាមិនបាន VISA ចំពេលដែលមានរឿងអាស្រូវបោកបក់លើខ្លួនជុំជិតនោះ។
អតីតពិធីការិនីហង្សមាស ក្លាយទៅជាអ្នកចម្រៀងផលិតកម្មថោន រូបនេះ បានឲ្យដឹងតាមទូរស័ព្ទថា ”ខ្ញុំបានជួបបងប៊ុត សីហា កាលពីថ្ងៃទី២៣ ខែកុម្ភៈ នៅពេលដែលពួកយើងទៅយក VISA នៅស្ថានទូតអាមេរិកត ខាងទូតបានណាត់ម៉ោងខុសគ្នា។ បងសីហា គាត់ខកចិត្ត ហើយដូចដឹងហើយថា គាត់មិនសូវចេះនិយាយអីទេ គឺពីធម្មជាតិមកចឹងស្រាប់តែម្ដង ហើយគាត់ថា អត់បានVISAទេ។ ខ្ញុំសោកស្ដាយដែរ ព្រោះថាយើងត្រូវទៅសម្ដែងជាមួយគ្នា នៅថ្ងៃទី១៣ ខែមីនា ហ្នឹង ហើយខ្ញុំបាន VISA តែគាត់អត់បាន ព្រោះខាងស្ថានទូតថា ឲ្យគាត់បំពេញឯកសារម្ដងទៀត។ ឥឡូវដល់ពេលអីចឹងទៅ ខ្ញុំត្រូវទៅតែម្នាក់ឯង ហើយមានអារម្មណ៍ថាភ័យតិចៗដែរ ព្រោះអីនេះជាលើកទី១”។
ប៊ុត សីហា អាក់ខានបណ្ដើរស្រីស្អាតផាន វីរ៉ាទី ហៅរ៉ាប៊ី ទៅទឹកដីអាមេរិក ដោយសារតែអតីតអ្នកចម្រៀងផលិតកម្មរស្មីហង្សមាស រូបនេះ ត្រូវបានកម្លាំងមន្ទីរប្រឆាំងគ្រឿងញៀន សហការជាមួយនគរបាលខណ្ឌដង្កោ ឃាត់ខ្លួនកាលពីរសៀលថ្ងៃទី២១ ខែកុម្ភៈ ឆ្នាំ២០១៨ ពាក់ព័ន្ធបទល្មើសគ្រឿងញៀន ព្រោះជាមុខសញ្ញាដែលសមត្ថកិច្ចតាមចាប់ជាយូរមកហើយ។ប៉ុន្ដែ សីហា ដែលត្រូវប៉ូលិសដោះលែងវិញ ដើម្បីឲ្យទៅបន្សាបគ្រឿងញៀននោះ បានបកស្រាយថា រូបគេជាភ្នាក់ងាបង្រ្កាបគ្រឿងញៀនដែលប៉ូលិសចាប់ច្រឡំ តែការបំភ្លឺបែបនេះមិនសូវបានគេជឿជាក់ឡើយ។ យ៉ាងណា សីហា សម្ដែងអារម្មណ៍ខឹងចំពោះការមិនបានចេញទៅសម្ដែងនៅអាមេរិក តាមគម្រោងនេះ ហើយរូបគេសួរថា តើអ្នកណាជាអ្នកទទួលខុសត្រូវ ព្រោះរឿងនេះ ហង្សមាស ផ្សាយ២ថ្ងៃជាប់គ្នា?។
រ៉ាប៊ី និយាយបន្ថែមថា ”ចំពោះការដែលបងសីហា មិនបានទៅអាមេរិក ជាមួយខ្ញុំនេះ ខ្ញុំមានការសោកស្ដាយផង អាណិតគាត់ផង។ តែរឿងរ៉ាវផ្សេងៗដែលលេចឮថ្មីៗនេះ ខ្ញុំមិនហ៊ានសន្និដ្ឋានថាម៉េចឡើយ”។
តាមរយៈការបង្ហាញភាពស្និទ្ធស្នាលរវាងកញ្ញារ៉ាប៊ី និងប៊ុត សីហា នោះដែរ ក៏ធ្វើឲ្យមានការសង្ស័យថា សីហា បានចាកចេញពីផលិតកម្មរស្មីហង្សមាស ចូលទៅថោន តែកញ្ញាផាន វីរ៉ាទី ថាដំណឹងខាងលើនោះមិនមែនជាការពិតឡើយ ព្រោះនាងគ្រាន់តែជួប និងថតរូបជាមួយគ្នាធម្មតាប៉ុណ្ណោះ។
រ៉ាប៊ី គ្រោងនឹងច្រៀងសម្ដែងនៅអាមេរិក រយៈពេល៥សប្ដាហ៏ ដែលមានជាច្រើន Show ហើយអ្នកចម្រៀងដែលមានក្បាច់រាំយ៉ាងរស់រវើកនេះថា ការទៅអាមេរិក ជាលើកដំបូងនេះ ក៏បានធ្វើឲ្យនាងចោល Concert ជាច្រើននៅស្រុកខ្មែរ ដែរ ហេតុនេះហើយនាងនឹងវិលវិញតាមពេលកំណត់ មិនបន្ដVISAទេ។
តារាចម្រៀងវ័យក្មេងរបស់ផលិតកម្មថោន រូបនេះ បន្ថែមទៀតថា ”ខ្ញុំចោលការងារច្រើនដែរនៅស្រុកខ្មែរ ពេលបុណ្យចូលឆ្នាំខ្មែរនេះ ព្រោះអីយើងទទួលគេ ថាព្រមទៅហើយ មិនអាចកែប្រែបានទេ។ ប៉ុន្តែខ្ញុំសប្បាយចិត្ត ព្រោះខ្ញុំទៅហ្នឹងតាមអង្គការមួយដែលគេជួយដល់សង្គមដែរ។ដោយសារតែប៊ុត សីហា មិនបានទៅអីចឹង ខ្ញុំត្រូវច្រៀងសម្ដែងជាមួយលោកនៅ ស៊ីនឿន និងតារាមួយចំនួនទៀតដែលនៅទីនោះស្រាប់។ មានShow ខ្លះក៏ខ្ញុំចេញសម្ដែងតែម្នាក់ឯងដែរ តែមិនអីទេ ខ្ញុំអាចច្រៀងបទពីដើមៗបានដែរ”។
ផាន វីរ៉ាទី ដែលទៅច្រៀងបង្អួតសម្រស់នៅអាមេរិក ដំបូងនេះ នឹងពិបាកគេចអន្ទាក់ស្នេហ៍កន្លង់ឯនាយសមុទ្រជាមិនខានឡើយ តែរ៉ាប៊ី ថានាងទៅច្រៀង មិនមែនទៅរកសង្សារទេ៕
