តាមដំណឹងចុងក្រោយថា តារាភាពយន្ត និងជាពិធីការិនីរូបស្រស់ កញ្ញានៅ សុនិតា ដែលមានជីវភាពកាន់តែហ៊ឺហានោះ កំពុងត្រូវបានបុរសទ្រព្យស្តុក៣នាក់ តាមប្រជែងស្នេហ៍យ៉ាងស្អិត មានទាំងលោកអភិបាលខណ្ឌម្នាក់ មន្ត្រីប៉ូលិសអន្តោប្រវេសន៍ម្នាក់ និងអ្នកគ្រប់គ្រងកម្មវិធីទូរទស្សន៍ម្នាក់ផងដែរ…។
ចាប់តាំងពីទាញបានភាពលេចធ្លោនៅក្នុងសង្គមសិល្បៈ តារាដែលមានត្រេមុខស្រគត់ស្រគំ មានមន្តស្នេហ៍ កញ្ញានៅ សុនិតា បានប៉ះនឹងដំណឹងស្នេហ៍បណ្តាក់គ្នា មិនឈប់ឈរ មានទាំងកូនមន្ត្រីធំ អ្នកជំនួញ ឧកញ៉ា និងតារាសិល្បៈជាដើម គឺមានបុរសៗចម្រុះឋានៈតែម្តង ដែលចង់ថ្នាក់ថ្នមនែបនិត្យនាង។
អ្វីដែលគួរឱ្យចាប់អារម្មណ៍ទៀតនោះ តាមប្រភពចុងក្រោយពីចង្កោមអ្នកសិល្បៈ បានឱ្យដឹងថា សុនិតា មានមន្តស្នេហ៍ទាក់ទាញកាន់តែខ្លាំង នាពេលចុងក្រោយនេះ ដែលធ្វើឱ្យបុរសៗអ្នកមាន៣នាក់ តាមប្រជែងស្នេហ៍នាងយ៉ាងប្រកិត ខណៈដែលគេដឹងថា មានទាំងលោកអភិបាលខណ្ឌទ្រព្យស្តុកម្នាក់ ប៉ូលិសអន្តោប្រវេសន៍ម្នាក់ និងអ្នកគ្រប់គ្រងកម្មវិធីទូរទស្សន៍ម្នាក់ផង។
តាមប្រភពថា បុរសទ្រព្យស្តុកទាំង៣នាក់ សុទ្ធតែចង់បានសុនិតា មករួមស្នេហ៍ និងហ៊ានចំណាយលើនាង ដោយមិនស្តាយទៀតផង។ ពោលគឺបុរសទាំង៣នាក់ គឺហ៊ានបោះនុយធំស្ទូចបេះដូងសុនិតា។ ជាពិសេស លោកអភិបាលខណ្ឌ ចង់ចិញ្ចឹមជ្រោមជ្រែងនាងឱ្យរស់នៅហ៊ឺហាដូចជំទាវតែម្តង។
តារាសម្បូរប្រុសចោមស្នេហ៍ កញ្ញានៅ សុនិតា មិនអាចទាក់ទងសុំការបញ្ជាក់បានទេ ចំពោះដំណឹងនេះ ហើយយើងនឹងរង់ចាំទទួលការបកស្រាយពីនាងជានិច្ច។
ស្របពេលទាញបានភាពកាន់តែលេចធ្លោ និងល្បីមានបុរសៗទ្រព្យស្តុកតាមចោមស្នេហ៍បណ្តាក់គ្នាឱ្យរដឹកនោះ មានការកត់សម្គាល់ថា កញ្ញានៅ សុនិតា ដែលធ្លាប់តែជិះរថយន្តម៉ាកកាម៉ារីឆ្លាមស៊េរីទាបនោះ ស្រាប់តែមានជីវភាពប្រែប្រួលហ៊ឺហាយ៉ាងឆាប់រហ័ស ដែលក្រៅពីជិះរថយន្តទំនើប នាងទើបតែទិញវីឡាតម្លៃជាង២០ម៉ឺនដុល្លារ គួរឱ្យភ្ញាក់ផ្អើល។ ពោលគឺជីវភាពរបស់នាងពេលនេះ មិនចាញ់លោកជំទាវមួយចំនួនទេ ខណៈដែលមានលុយចាយវាយពេញៗដៃ និងប្រើប្រាស់របស់សុទ្ធតែម៉ាកល្បីៗថ្លៃៗ គឺលេចធ្លោជាងតារាល្បីឈ្មោះមួយចំនួនទៀតផង។
យ៉ាងណា ទន្ទឹមនឹងនោះ ក៏មានដំណឹងលេចជ្រាបពីអ្នកសិល្បៈដែរថា សុនិតា ទទួលបានការជ្រោមជ្រែងពីម្ចាស់ស្នេហ៍សំណព្វចិត្តលាក់មុខរបស់នាង ត្បិតអីបើផ្អែកលើអាជីពសិល្បៈ មិនអាចជួយឱ្យនាងហ៊ឺហាលេចធ្លោយ៉ាងឆាប់រហ័សបែបនេះទេ ខណៈដែលបច្ចុប្បន្ន នាងមិនសូវមានសកម្មភាពថតភាពយន្តដូចមុន ដែលគេឃើញនាងកាន់កម្មវិធីមួយចំនួន នៅប៉ុស្តិ៍បាយ័ន តែប៉ុណ្ណោះ។
តាមដំណឹងថា សុនិតា មិនចង់ថតឈុតខារ៉ាអូខេ និងថតភាពយន្ត ដែលប្រឈមថ្ងៃក្តៅនាំឱ្យខូចស្បែករបស់នាងទៀតទេ ពោលគឺនាងមិនចង់សន្សំប្រាក់ល្អិតពីអាជីពសិល្បៈទៀតទេ ខណៈដែលសព្វថ្ងៃ ជីវភាពរបស់នាងហ៊ឺហា មានប្រាក់ចាយណែនដៃទៅហើយនោះ។
តាមប្រភពពីតារាសិល្បៈថា ខណៈដែលសុនិតា មិនសូវមានសកម្មភាពសិល្បៈជោកជាំដូចមុន ទំនងជាមានអ្នកពិសេសហួងហែង នាងមិនឱ្យថតឈុតស្នេហាឱបថើបជាមួយតួប្រុស។ ម៉្យាងទៀត ចាប់តាំងពីជីវភាពកាន់តែលេចធ្លោ នាងក៏មិនសូវខ្វល់ពីប្រជាប្រិយភាពផងដែរ។
តាមប្រភពថា សុនិតា ធ្លាប់ធ្វើឱ្យបុរសៗជាច្រើន ខកចិត្តស្តាយស្នេហ៍នាង ក៏ព្រោះតែនាងបានច្រានចោលសំណើស្នេហ៍ជាបន្តបន្ទាប់ សូម្បីតែអ្នកជំនួញមួយចំនួន ដែលចង់បាននាងជានារីកំណាន់ ដែលហ៊ានជះលុយរាប់សែនដុល្លារលើនាង ក៏នាងមិនអើពើដែរ ខណៈដែលមជ្ឈដ្ឋានអ្នកសិល្បៈជាច្រើន តែងតែលើកសរសើរពីចរិតនឹងធឹងរបស់នាង។
យ៉ាងណា តាមដំណឹងថា សុនិតា កំពុងតែពិចារណាសំណើស្នេហ៍លោកអភិបាលខណ្ឌ បន្ទាប់ពីលោកអភិបាលខណ្ឌ បានបោះសម្តីថា ហ៊ានធានាផ្គត់ផ្គង់នាងគ្រប់បែបយ៉ាង។ រីឯមន្ត្រីប៉ូលិសអន្តោប្រវេសន៍ និងអ្នកគ្រប់គ្រង កម្មវិធីរបស់ស្ថានីយទូរទស្សន៍មួយ ទំនងជាគ្មានសង្ឃឹមបានសុនិតា មកថ្នមថែនោះទេ បើទោះបីមានទ្រព្យអាចឱ្យនាងរស់ស្រួលក្តី។
យ៉ាងណា ពាក់ព័ន្ធនឹងដំណឹងនេះ យើងនឹងរង់ចាំទទួលការបកស្រាយបំភ្លឺពីកញ្ញានៅ សុនិតា ជានិច្ច…៕