នេះអាចចាត់ទុកថាជាលើកទី១ សម្រាប់អតីតតារាសម្ដែងកំពូល កាលពីទសវត្សន៍១៩៩០ អ្នកនាងអម្ពរ ទេវី ដែលបានទៅរស់នៅសហរដ្ឋអាមេរិក ជាង១ទសវត្សន៍ហើយនោះ ប៉ុន្តែនៅពេលដែលអ្នកនាងមកលេងស្រុកកំណើត និងឆ្លៀតថតភាពយន្ដឲ្យផលិតកម្ម Red Picture នោះ អតីតភរិយាលោកពេជ្រ ភិរុណ រូបនេះ បានទៅចូលរួមកម្មវិធីអបអរសាទរ ទិវាវប្បធម៌ជាតិ ៣មីនា លើកទី២០ ឆ្នាំ២០១៨ ពិធីបិទមហោស្រពសិល្បៈយុវជនទូទាំងប្រទេស និងការជួបសំណេះសំណាលជាមួយសិល្បករសិល្បការិនីនៅកោះពេជ្រ កាលពីល្ងាចថ្ងៃទី០៦ ខែមីនា ឆ្នាំ២០១៨ ដោយមានតារាៗជាច្រើនពាន់នាក់បានចូលរួម។ កម្មវិធីនេះមានការអញ្ជើញចូលរួមក្រោមអធិបតីសម្ដេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងថ្នាក់ដឹកនាំជាច្រើនរូបទៀត។
អ្នកនាងអម្ពរ ទេវី បានបង្ហាញភាពរីករាយនៅពេលដែលបានចូលរួមកម្មវិធីនេះជាលើកដំបូង ហើយមានការស្វាគម៍ពីតារាចាស់ក្មេងជាច្រើនដួង មកសួរសុខទុក្ខ និងថតរូបជាមួយអ្នកនាងដោយក្ដីនឹករលឹក។ ការលេចមុខដោយកម្រររបស់អ្នកនាងអម្ពរ ទេវី នេះដែរ អ្នកនាងក៏បានបណ្ដើរដៃគូដែលយល់ចិត្តបំផុត លោកទេព រិន្ទដារ៉ូ ទៅអង្គុយជិតកៀកកិត និងញាំអាហារជាមួយគ្នាផងដែរ។
អ្នកនាងអម្ពរ ទេវី បានប្រាប់អ្នកយកព័ត៌មានយើងថា ការមកស្រុកកំណើតលើកនេះ គឺដើម្បីថតភាពយន្ដមួយឲ្យផលិតកម្ម Red Picture រឿង ”ឆន្ទា” ដែលសម្រាប់ប្លង់របស់អ្នកនាងត្រូវថតបញ្ចប់នៅត្រឹមថ្ងៃទី០៧ខែមីនា នេះ ហើយនៅថ្ងៃទី០៨ ខែមីនា អ្នកនាងនឹងចេញទៅសហរដ្ឋអាមេរិក វិញ តាមការកំណត់។
អម្ពរ ទេវី បានប្រាប់ថា ”ខ្ញុំថតរឿងហ្នឹងចប់នៅថ្ងៃទី០៧ ខែមីនា ហើយថ្ងៃទី០៨ ខែមីនា ខ្ញុំចេញទៅអាមេរិកវិញ។ រឿងនេះខ្ញុំសម្ដែងជាតួម៉ឺងម៉ាត់ដែរ គឺជាប្រធានក្រុមហ៊ុនមួយដែលគ្រប់គ្រងគេ។ សម្រាប់ខ្ញុំនៅតែគិតថា ទោះជាខ្ញុំទៅដល់អាមេរិក មែន តែអារម្មណ៍នៅតែចង់ត្រឡប់មករស់នៅស្រុកខ្មែរវិញ នៅពេលណាមួយដែលសមស្រប”។
ដោយឡែក លោកទេព រិនដារ៉ូ ដែលអង្គុយនៅជិតអ្នកនាងអម្ពរ ទេវី បានអះអាងដែរថា ”មានផលិតកម្មមួយ គេចង់ឲ្យអម្ពរ ទេវី សម្ដែងភាពយន្ដជាមួយខ្ញុំ តែមិនទាន់និយាយគ្នាច្បាស់លាស់ទេ ហើយបើត្រូវរ៉ូវគ្នា អាចថតនៅឆ្នាំ២០១៨ ហ្នឹងដែរ…”។
ក្រៅពីអ្នកនាងអម្ពរ ទេវី ដែលលេចមុខក្នុងកម្មវិធីពិសេសនេះ ក៏មានតារាល្បីជាច្រើនដួងទៀតបានទៅចូលរួម ដោយទឹកមុខរីករាយផងដែរ ហើយអ្វីដែលគេចាប់អារម្មណ៍នោះ គឺកញ្ញាធី សុវណ្ណថា ដែលត្រៀមខ្លួនទៅប្រកួតបរវកញ្ញានៅប្រទេសកូរ៉េខាងត្បូងនោះ ស្រាប់តែលេចមុខកៀកកើយ VJ អាណូ ថត Selfie ជាមួយគ្នាយ៉ាងស្និទ្ធស្នាល ទើបធ្វើឲ្យតារាៗដែលចូលរួមព្រឹត្តិការណ៏នោះ លាន់មាត់ថា សុវណ្ណថា ក្លាយទៅជាតារាល្បីហ្នឹងគេដែរ ហើយពេលនេះ ខណៈដែលណុប បាយ៉ារិទ្ធ និងសុគន្ធ និសា ច្រៀងសម្ដែងបើកឆាកកម្មវិធីនៅចំពោះលោកនាយករដ្ឋមន្ដ្រី និងសម្តេចកិត្តិព្រឹទ្ធបណ្ឌិត៕
