ភ្នំពេញ ៖ គូសង្សារមួយគូ រួមនឹងមិត្តភក្តិមួយក្រុម ទើបនឹងចេញពីផឹកស៊ីរាំលេងក្នុងក្លឹបរាត្រី ជិះម៉ូតូបំណងត្រឡប់ទៅផ្ទះវិញ ស្រាប់តែត្រូវជនសង្ស័យ១ក្រុម បានធ្វើសកម្មភាពដេញកាប់ប្លន់យកម៉ូតូអស់១គ្រឿង កាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី០៧ ខែមីនា ឆ្នាំ២០១៨ នៅចំណុចខាងមុខសណ្ឋាគារហ្គោលឌិនអ៊ែបភល តាមបណ្តោយផ្លូវសហព័ន្ធរុស្ស៊ី ស្ថិតក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ។
យុវជនរងគ្រោះជាម្ចាស់ម៉ូតូ មានឈ្មោះម៉ន រស្មី អាយុ២០ឆ្នាំ មុខរបរសិស្ស និងពុះដីឡូត៍លក់ នៅម្តុំឃុំទួលព្រិច ស្នាក់នៅសង្កាត់គោករការ ខណ្ឌព្រែកព្នៅ និងមានស្រុកកំណើតនៅស្រុកដងទង់ ខេត្តកំពត។ ចំណែកម៉ូតូដែលជនសង្ស័យប្លន់យកទៅ ម៉ាកហុងដាឌ្រីម សេ១២៥ ស៊េរីឆ្នាំ២០០៦ ឡើងតែម២០១៥ ពណ៌ខ្មៅ ពាក់ស្លាកលេខ កំពត 1A-4802។
តាមសម្តីយុវជនរងគ្រោះ បានរៀបរាប់ប្រាប់ថា នៅមុនពេលកើតហេតុ ពួកគេមានគ្នា៥នាក់ (ប្រុស៤ ស្រី១) បាននាំគ្នាជិះម៉ូតូ២គ្រឿង ចូលទៅផឹកស៊ីរាំលេងនៅក្នុងក្លឹបមួយកន្លែងម្តុំត្រឡោកបែក។
លុះពេលចេញពីក្លឹបមកវិញ រូបគេបានជិះម៉ូតូដឹកសង្សារ ចំណែកម៉ូតូមិត្តភក្តិ ១គ្រឿងទៀត ជិះគ្នាប្រុសៗ៣នាក់ បំណងត្រឡប់ទៅផ្ទះវិញ ស្រាប់តែពេលធ្វើដំណើរមកដល់ចំណុចកើតហេតុខាងលើ ក៏លេចមុខក្រុមជនសង្ស័យមានគ្នា៦នាក់ ជិះម៉ូតូ២គ្រឿង តាមមកពីក្រោយ និងបានធ្វើសកម្មភាពឆក់យកទូរស័ព្ទពីសង្សាររបស់ខ្លួន តែមិនបានសម្រេច ទើបខ្លួន បានស្រែកហៅមិត្តភក្តិ៣នាក់ទៀតឱ្យឈប់ បន្ទាប់មករូបគេបានឈប់ម៉ូតូ តែមិនបានពន្លត់ម៉ាស៊ីនទេ ស្រាប់តែភ្លាមនោះ ក្រុមជនសង្ស័យបានដកដាវសាំម៉ូរ៉ៃ និងដំបងមកដេញវាយប្លន់ម៉ូតូរបស់ខ្លួនជិះចេញទៅបាត់តែម្តង។
ក្រោយពេលកើតហេតុកម្លាំងនគរបាលប៉ុស្តិ៍ចោមចៅ៣ បានចុះទៅដល់ចំណុចកើតហេតុ និងបាននាំជនរងគ្រោះទៅដាក់ពាក្យបណ្តឹង ដើម្បីធ្វើការស្រាវជ្រាវ តាមចាប់ខ្លួនក្រុមជនសង្ស័យយកមកផ្តន្ទាទោសតាមច្បាប់៕