ភ្នំពេញ ៖ បុរសម្នាក់ដែលគេស្គាល់ជាស្វាមីអ្នកនាងសុគន្ធ និសា បានជួបគ្រោះថ្នាក់ចរាចរណ៍ បើករថយន្តស៊េរីទំនើបម៉ាក Rang Rover បុកម៉ូតូម៉ាកឌ្រីមសង់ បណ្តាលឲ្យម៉ូតូនិងរថយន្តខូចខាតទាំងសងខាង តែមិនមានអ្នកណារងរបួសធ្ងន់នោះទេ ហេតុការណ៍នេះកើតឡើងនៅជិតវិមានឯករាជ្យ កាលពីម៉ោង២យប់ ថ្ងៃទី១៧ ខែមីនា ឆ្នាំ២០១៧ ។
តាមប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសម្នាក់ដែលគេស្គាល់ច្បាស់ជាស្វាមីអ្នកនាងសុគន្ធ និសា បើករថយន្តម៉ាក Rang Rover ពាក់ស្លាកលេខភ្នំពេញ 2V-9779 បានបើករេចុះឡើង ស្រាប់តែមកដល់វិមានឯករាជ្យ ក៏ជ្រុលទៅបុកម៉ូតូមួយគ្រឿង ម៉ាកឌ្រីមសង់ ដែលចតនៅលើផ្លូវ បណ្តាលឲ្យម៉ូតូ បាក់គូទក្រោយ ធ្លាក់ស្លាកលេខ ចំណែករថយន្តរងការខូចខារចំហៀងខាងឆ្វេង ផ្នែកខាងមុខ ក្នុងហេតុការណ៍នេះ មិនបណ្តាលឲ្យមនុស្សណាម្នាក់រងបួសនោះទេ។
បន្ទាប់ពីបុកម៉ូតូហើយ ម្ចាស់រថយន្តដែលគេស្គាល់ឈ្មោះថា ចៅ សម្បត្តិ ហៅសាំបា មិនបានឈប់ដោះស្រាយនោះទេ បែរជាព្យាយាមបើករត់គេច ដល់ស្ពាននាគ ជិតរមណីយដ្ឋានវត្តភ្នំ ទើបអ្នកឃើញហេតុការណ៍ជិះម៉ូតូដេញទាន់ ក៏ប្រាប់សមត្ថកិច្ចឲ្យទៅយកមកកាន់កន្លែងកើតហេតុ មិនមានអំពើហិង្សានោះទេ។
ក្រោយឃាត់ខ្លួនបាន ភាគីខាងរថយន្តបង្ក បានជួបចរចាជាមួយជនរងគ្រោះ ហើយសងសំណងទៅម្ចាស់ម៉ូតូចំនួន៤៥០ដុល្លារ ដើម្បីបញ្ចប់រឿងនៅកន្លែងកើតហេតុ។
គួរបញ្ចាក់ថា អ្នកនាងសុគន្ធ និសា បានចូលរោងការជាមួយស្វាមី ចៅ សម្បត្តិ អាណិកជនអាមេរិក កាលពីថ្ងៃទី០១ ខែធ្នូ យ៉ាងអធិកអធមនៅផ្ទះវីឡាដ៏ធំស្កឹមស្កៃរបស់នាង នៅបុរីពិភពថ្មីឬស្សីកែវ រាជធានីភ្នំពេញ ហើយនៅល្ងាចថ្ងៃទី០២ ខែធ្នូ បានធ្វើជប់លៀងធំទទួលភ្ញៀវពិសារភោជនីយអាហារនៅសណ្ឋាគារលំដាប់ផ្កាយ៥ សូហ្វីតែល ភោគីត្រា ភ្នំពេញ៕
