សុខ ស្រីនាង ដែលងើបឡើងវិញទាំងមិនគួរឱ្យជឿនេះ មានឡើងថ្លៃខ្លួនច្រៀង១កម្មវិធី ជាង១ពាន់ដុល្លារ ហើយនាងប្រាប់ថា ចុះឡើងច្រៀងតាមខេត្តជាញឹកញាប់ ហើយសង្ឃឹមថា ឆ្នាំនេះអាចរកប្រាក់ចំណូលបានខ្ពស់ជាងឆ្នាំមុន ព្រោះថាមានគេទាក់ទងហៅច្រៀងច្រើន ហើយនាងសប្បាយចិត្តដោយសារតែបទចម្រៀងថ្មីៗមួយចំនួន មានការនិយម និងយកទៅច្រៀងច្រើនគួរសម។
សុខ ស្រីនាង ត្រូវបានផលិតកម្មរស្មីហង្សមាស លើកតម្កើងដោយថែមទាំងឱ្យនាងសម្តែងជា MV ជាមួយលោកព្រាប សុវត្ថិ និងគ្រងតំណែងជាតួឯកក្នុងភាពយន្តថ្មី រឿង “រាជិនីភូមិគ្រឹះ“ របស់ទូរទស្សន៍ហង្សមាស ទើបធ្វើឱ្យអ្នកមេម៉ាយគ្មានកូន១គ្រាប់នេះ រីករាយខ្លាំងណាស់ ហើយជឿថា នៅពេលដែលរឿងនោះត្រូវដាក់បញ្ចាំង នឹងជួយឱ្យនាងល្បីថែមទៀតជាមិនខានឡើយ។
ប៉ុន្តែទោះជាឆ្នាំថ្មី រាសីឡើងយ៉ាងណា ក៏សុខ ស្រីនាង នៅតែនៅមិនទាន់មានឱកាសក្តាប់បានស្ពតពាណិជ្ជកម្មធំៗ ដូចនាងរ៉េត ស៊ូហ្សាណា ដែរ បើទោះជានៅហង្សមាស ស្រីនាង ស្ថិតក្នុងចំណោមតារាមានរូបសម្រស់លេចធ្លោក្តី។
អ្នកជំនាញសិល្បៈបានលើកឡើងថា សមត្ថភាពរបស់សុខ ស្រីនាង នៅមានកម្រិតទេ គឺមិនអាចធ្វើព្យុះភ្លៀង ដូចឱក សុគន្ធកញ្ញា, ពេជ្រ សោភា នៅហង្សមាស បានឡើយ បើទោះជាលើកយ៉ាងណាក៏ដោយ ព្រោះថា ស្រីនាង មិនអាចច្រៀងបទខ្លាំង ដែលប្រើតុងខ្ពស់ៗបានទេ គឺស្រែកទៅហាក់ចង់តែភ្លាត់ៗអ៊ីចឹងហើយ គ្រូភ្លេងខ្លាំងៗនៅហង្សមាស គេនឹងធ្វើបទចម្រៀងឱ្យនាងច្រៀងទៅតាមហ្នឹងដែរ។
សុខ ស្រីនាង បានធ្លាក់ខ្លួនមេម៉ាយជាង៦ឆ្នាំមកហើយ ដែលធ្វើឱ្យប្រុសៗមិនតិចឡើយ គ្រឺតក្នាញ់សម្រស់អតីតប្រពន្ធ លោកស៊ី សុវត្ថិ ដែលមានរូបសម្រស់កាន់តែស្អាតទៅៗនេះ។ ប៉ុន្តែតាមព័ត៌មានថា អ្នកចម្រៀងផលិតកម្មរស្មីហង្សមាស សុខ ស្រីនាង មិនទុកបេះដូងឱ្យនៅទំនេរឡើយ គឺមានម្ចាស់ចិត្តថ្មីទៅហើយ គ្រាន់តែនាងលាក់មិនឱ្យគេស្គាល់ប៉ុណ្ណោះ ព្រោះតាំងពីលែងប្តីមក ស្រីនាង មានលោកធំៗតាមស្នេហ៍ដល់ផ្ទះវីឡានៅបុរីអ៊ែតវូដ នោះទៀតផង ទោបីជាក្រោយពេលលែងលះគ្នា អតីតប្តីស្រីនាង ធ្លាប់បានព្រមានបុរសៗទាំងឡាយ ដែលលង់សម្រស់អតីតភរិយាលោកថា “បើគ្មានអំណាច និងទ្រព្យសម្បត្តិទេ កុំទៅស្រលាញ់សុខ ស្រីនាង អី នាំតែខូចចិត្ត” ក៏ដោយ…៕
