ខេត្តមណ្ឌលគិរី ៖ ជនសង្ស័យ២នាក់ ម៉ូតូ២គ្រឿង បានដឹកស្វា២ទ្រុង នៅចំណុចព្រៃឃុំ មេម៉ង់ ត្រូវបានកម្លាំងប៉ុស្តិ៍សហការជាមួយ ស្នាក់ការបរិស្ថានប្រចាំឃុំមេម៉ង់ និងកងរាជអាវុធហត្ថស្នាក់ការសន្តិសុខ៧៦៤ ស្ទាក់ឃាត់បាន ម្នាក់ និងម្នាក់ទៀតរត់បាត់ស្រមោល។
ការស្ទាក់ឃាត់បានម៉ូតូដឹកសត្វស្វានោះធ្វើ ឡើងនៅវេលាម៉ោង៤និង៤នាទីទៀបភ្លឺ ថ្ងៃទី១៦ ខែមីនា ឆ្នាំ២០១៨ ត្រង់ចំណុចក្រោមភ្នំកាច់ករ ស្ថិតក្នុងភូមិពូញ៉ាវ ឃុំមេម៉ង់ ស្រុកកែវសីមា។
ប្រភពពីសមត្ថកិច្ចបានឱ្យដឹងថា ម៉ូតូដឹកស្វា ចំនួន២គ្រឿង ទី១-ម៉ាក Exciter (ពណ៌ក្រហម) ម៉ូតូទី២ ឆ្លាមកែច្នៃ ហើយបានឆែកឆេរ ទៅឃើញមានសត្វស្វាចំនួន៣២ក្បាលងាប់៨ក្បាលដែលជាប្រភេទស្វាស្រូវ ឯម្ចាស់ម៉ូតូរត់គេចខ្លួនចូលព្រៃបាត់នៅពេលឃើញសមត្ថកិច្ច ចាំស្ទាក់ត្រង់ចំណុចខាងលើ។
ម៉ូតូត្រូវបានសមត្ថកិច្ចយកមករក្សាទុកនៅស្នាក់ការបរិស្ថាន ឯសត្វស្វាដែលនៅរស់បានយកទៅលែងត្រង់ចំណុចអូរឆាងក្នុងភូមិពូញ៉ាវ ឃុំមេម៉ង ស្រុកកែវសីមា ខេត្តមណ្ឌលគិរី ចំណែកស្វា ដែលងាប់យកទៅដុតបំផ្លាញចោលផងដែរ៕