ភ្នំពេញ ៖ នារីស្រស់ស្អាតវ័យក្មេងម្នាក់ បានទុកម៉ូតូនៅផ្ទះ និងបានចាក់សោយ៉ាងត្រឹមត្រូវ ហើយរវល់តែឡើងទៅបន្ទប់ជាន់ទី២ ដើម្បីងូតទឹករៀបចំខ្លួនទៅបុណ្យគេ លុះចុះមកវិញ ត្រូវចោរលួចម៉ូតូទៅបាត់ដោយសុវត្ថិភាព បង្កឱ្យមានការភ្ញាក់ផ្អើល កាលពីវេលាម៉ោង៦និង១០នាទីល្ងាច ថ្ងៃទី១៧ ខែមីនា ឆ្នាំ២០១៨ ស្ថិតនៅមុខផ្ទះជួលក្នុងភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ។
នារីដែលជាជនរងគ្រោះមានឈ្មោះសុខ ច័ន្ទមុន្នី អាយុ២១ឆ្នាំ មុខរបរបុគ្គលិកក្រុមហ៊ុន ស្នាក់នៅផ្ទះកន្លែងកើតហេតុខាងលើ។
នារីជនរងគ្រោះជាម្ចាស់ម៉ូតូ បានឱ្យដឹងថា មុនពេលកើតហេតុ ពេលនាងមកពីធ្វើការងារវិញ ដល់ផ្ទះប្រញាប់ប្រញាល់ឡើងទៅងូតទឹក នៅបន្ទប់ជាន់ទី២ ដោយទុកដាក់ម៉ូតូនៅមុខបន្ទប់ និងចាក់សោត្រឹមត្រូវ ហើយមានបងស្រីបង្កើត អង្គុយបោកគក់ខោអាវនៅក្បែរនោះទៀតផង លុះពេលចេញមកវិញបំណងចេញទៅចូលរួមពិធីបុណ្យរបស់មិត្តភក្តិ ស្រាប់តែម៉ូតូត្រូវបានជនសង្ស័យលួចយកទៅបាត់ មិនដឹងជាជនសង្ស័យ ធ្វើសកម្មភាពកាច់កយកទៅតាំងពីថ្មើរណា ទើបនាំគ្នាផ្អើលឆោឡោតែម្តង និងធ្វើដំណើរទៅដាក់ពាក្យបណ្តឹងនៅប៉ុស្តិ៍ប៉ូលិស ដើម្បីឱ្យជួយ ស្រាវជ្រាវ និងស្វែងរកមុខសញ្ញាមកចាត់ការតាមនីតិវិធីច្បាប់។
តាមសម្តីនគរបាលឱ្យដឹងថា ក្រោយពីមានពាក្យបណ្តឹងរបស់នារីរងគ្រោះកម្លាំងនគរបាល ប៉ុស្តិ៍អូរបែកក្អម បានចេញល្បាតក្នុងមូលដ្ឋាន និងទាក់ទងផ្តល់ដំណឹងទៅបណ្តាប៉ុស្តិ៍ផ្សេងទៀត បំណងស្វែងរកម៉ូតូរបស់ជនរងគ្រោះ តែមកដល់ព្រឹកថ្ងៃទី១១ ខែមីនា ឆ្នាំ២០១៨នេះ គ្មានពន្លឺសោះ តែយ៉ាងណាសមត្ថកិច្ចនិងបន្តធ្វើការស្រាវជ្រាវតាមចាប់ខ្លួនជនសង្ស័យនាំមកផ្តន្ទាទោសនៅថ្ងៃណាមួយឱ្យខាងតែបាន៕