ភ្នំពេញ ៖ ស្ត្រីម្នាក់បាននាំកូនតូចម្នាក់មកផ្សារដើម្បីទិញម្ហូប ស្រាប់តែត្រូវស្ត្រីម្នាក់ ដើរមកអន្ទងហៅឱ្យឡើងជិះរថយន្តទំនើបជាមួយខ្លួន ដោយប្រាប់ថា រើសបានមាសមួយថង់ទុកចែកគ្នា លុះស្ត្រីរងគ្រាះជឿលង់ ចង់ចែកមាសជាមួយគេ ក៏យល់ព្រមឡើងជិះរថយន្តទំនើប និងត្រូវ បានក្រុមជនសង្ស័យដោះដូរយកគ្រឿងអលង្ការអស់ពីខ្លួន ដោយទុកឱ្យវិញនូវកូនថង់ដាក់សុទ្ធតែគ្រាប់សំណរ ធ្វើឱ្យស្ត្រីរងគ្រោះកើតទុក្ខមិនសុខចិត្តរត់មកដាក់ពាក្យបណ្តឹង ឱ្យសមត្ថកិច្ចជួយអន្តរាគមន៍។
ហេតុការណ៍ស្ត្រីម្នាក់ចាញ់ល្បិចក្រុមទម្លាក់យោងនេះ បានកើតមានការភ្ញាក់ផ្អើលឡើងកាលពីវេលាម៉ោង៨និង៣០នាទីព្រឹក ថ្ងៃទី២០ ខែមីនា ឆ្នាំ២០១៨ ស្ថិតនៅក្នុងចម្ការចេកមួយកន្លែង ស្ថិតក្នុងភូមិព្រែកតាប៉ែន ឃុំព្រែកអញ្ចាញ ស្រុកមុខកំពូល ខេត្តកណ្តាល ជាប់ព្រំប្រទល់ជាមួយភូមិបាក់ខែង សង្កាត់បាក់ខែង ខណ្ឌជ្រោយចង្វារ។ ក្រោយសមត្ថកិច្ច ធ្វើការសាកសួររឿងហេតុ ទើបដឹងថា ករណីនេះ កើតនៅក្នុងទឹកដី ស្រុកមុខកំពូលខេត្តកណ្តាល។
ស្ត្រីរងគ្រោះដែលចាញ់ល្បិចទម្លាក់យោងអស់ពីខ្លួន មានឈ្មោះលី ឆយី អាយុ២៥ឆ្នាំ មានកូនស្រីម្នាក់អាយុ២ខួប ស្នាក់នៅស្រុក មុខកំពូល ខេត្តកណ្តាល។ ចំណែកសម្ភារៈដែលបាត់បង់ រួមមានខ្សែកមាសទម្ងន់៥ជី ខ្សែដៃមាសទម្ងន់៥ជី ចិញ្ចៀន២វង់ ស្មើ៤ជីមាស លុយ១០០ដុល្លារ និងទូរស័ព្ទដៃម៉ាក Oppo ១គ្រឿង ដែលទើបនឹងទិញយកមកទុកលេងហ្វេសប៊ុកបាន៣ថ្ងៃ។
តាមសម្តីស្ត្រីរងគ្រោះ បានរៀបរាប់ប្រាប់ថា នៅមុនកើតហេតុ នាងបាននាំកូនស្រីអាយុ២ខួប ធ្វើដំណើរមកផ្សារព្រែកអញ្ចាញ ស្ថិតនៅក្នុងភូមិព្រែកអញ្ចាញក្រោម ឃុំព្រែកអញ្ចាញ ស្រុកមុខកំពូល ដើម្បីរកទិញម្ហូប។ ខណៈដែលនាងដើរចូលផ្សារទិញម្ហូបរួចហើយ ក៏បានពរកូនស្រីចេញពីផ្សារវិញបានបន្តិច ក៏លេចមុខស្ត្រីម្នាក់ដើរមកសួរនាងថា មានឃើញកាបូប១អត់ មានគេជ្រុះបាត់ ក្នុងនោះមានមាសនិងលុយច្រើនណាស់ ពេលនោះនាងក៏ឆ្លើយទៅវិញថា មិនដឹងទេ មិនឃើញទេ ស្រាប់តែភ្លាមនោះមានស្ត្រីម្នាក់ទៀត ដើរមកក្បែររួចខ្សឹបប្រាប់នាងថា កុំមាត់មានបុរសម្នាក់គេរើសបាន ហាមប្រាប់អ្នកណាឱ្យដឹងទេ រង់ចាំយកទៅចែកគ្នា គ្រាន់តែលាស្រាយមើលក្នុងនោះមានគ្រឿងលោហៈធាតុក្រហម និងលុយដុល្លារពេញកាបូប។
ស្ត្រីរងគ្រោះបន្តថា បន្ទាប់មក ស្ត្រីម្នាក់នោះ បាននាំនាងដើរចេញទៅក្រៅ រួចបបួលនាំឡើងជិះតាមរថយន្តទំនើប ម៉ាកហ្វត១គ្រឿង ដោយឱ្យនាង២នាក់ម្តាយកូនជិះបាំងខាងក្រោយ ជាមួយស្ត្រីសង្ស័យ២នាក់ទៀត និងបាននាំគ្នាធ្វើដំណើរតាមបណ្តោយផ្លូវជាតិលេខ៦ ក្នុងទិសដៅពីកើតទៅលិច ដោយជិះបណ្តើរលាមាត់ថង់ឱ្យនាងមើលបណ្តើរ លុះនាងភ្លេចខ្លួន ស្ត្រីសង្ស័យបានហុចថង់១នោះឱ្យនាងកាន់ រួចដោះយកគ្រឿងអលង្ការ និងទ្រព្យសម្បត្តិរបស់នាងអស់ពីខ្លួន។ លុះដល់ចំណុចភូមិព្រែកតាប៉ែន ឃុំព្រែកអញ្ចាញ រថយន្តបានបត់ចូលក្នុងព្រៃចម្ការចេកមួយកន្លែង ក្បែរស្ពានលេខទី១២ ផ្លូវលេខ៦ ទើបឱ្យនាងចុះដោយប្រាប់ថា រង់ចាំនៅទីនេះជាមួយស្ត្រីម្នាក់សិន ចំណែកជនសង្ស័យប្រុសស្រី៣នាក់ទៀត បានជិះរថយន្តចេញទៅបាត់ ដោយប្រាប់ថាកុំឱ្យខ្ចរខ្ចាយយកមាសទៅដូរទុកចែកគ្នា។ បន្ទាប់ពីចេញទៅបាត់មួយសន្ទុះ ស្ត្រីជនសង្ស័យម្នាក់ទៀត បានចេញទៅតាមដែរ ដោយប្រាប់ថាទៅតាមមើលដូរលុយ មាសអ្វីក៏យូរម៉្លេះ រួចក៏ទៅបាត់រហូត។ លុះនាងចាំយូរពេក ក៏លាមាត់ថង់មើល ស្រាប់តែប្រទះឃើញសុទ្ធតែគ្រាប់សំណ ទើបធ្វើឱ្យនាងភ្ញាក់ខ្លួនដឹងថា ចាញ់បោកគេអស់ទ្រព្យសម្បត្តិពីខ្លួនទៅហើយ ទើបប្រញាប់ហៅម៉ូតូឌុបជិះ ទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាក់ខែង។
ក្រោយទៅដល់ប៉ុស្តិ៍នគរបាល សមត្ថកិច្ចក៏ធ្វើការសាកសួរពីដំណើរដើមរឿង ទើបដឹងថា ករណីនេះមិនមែនកើតក្នុងភូមិសាស្ត្រសង្កាត់ បាក់ខែងទេ ទើបណែនាំឱ្យស្ត្រីរងគ្រាះទៅដាក់ពាក្យបណ្តឹងប៉ុស្តិ៍នគរបាលរដ្ឋបាលព្រែកអញ្ចាញ ស្រុកមុខកំពូលវិញ៕