តារាចម្រៀងផាន វីរ៉ាទី ហៅរ៉ាប៊ី ដែលពេលនេះកំពុងនៅអាមេរិក នោះ បានប្រតិកម្មចេញមុខរិះគន់ចំពោះមិត្តទាំងឡាយនៅលើបណ្ដាញសង្គម Facebok ដែលថា សម្រាប់ចូលឆ្នាំខ្មែរ២០១៨ នេះ នាងនឹងផ្ដួលតារាចម្រៀងផលិតកម្មរស្មីហង្សមាស អ្នកនាងពេជ្រ សោភា តាមរយៈបទ ”មាន់ស្រែ” ដែលល្បីល្បាញខ្លាំងក្នុងស្រទាប់យុវវ័យនោះ។
រ៉ាប៊ី ចាត់ទុកថា ការនិយាយ និងលើកឡើងបែបនេះ ហាក់ដូចជាធ្វើឲ្យតារាសិល្បៈមើលមុខគ្នាមិនចំទេ តែធាតុពិត អ្នកចម្រៀងចេះស្រលាញ់គ្នាខ្លាំងណាស់ បើទោះជានៅផលិតកម្មផ្សេងគ្នាក៏ដោយ។
តារាចម្រៀងផលិតកម្មថោន រូបនេះ ប្រតិកម្មតបនឹងរឿងគេថា នាងផ្ដួលពេជ្រ សោភា នោះថា ”អ្នកនិយាយអីចឹងចង់ល្បីខ្លាំងណាស់មើលទៅ អ្នកសិល្បៈគេស្រលាញ់រាប់អានគ្នាណាស់ ប៉ុន្ដែមានតែពួកនៅទីងងឹតមិនដែលហ៊ានបញ្ចេញមុខហ្នឹងទេ ប្រឹងអុចអាលដើម្បីឲ្យគេចាប់អារម្មណ៍លើ Page ខ្លួនឯង ចង់បាន like និង View ច្រើន គាត់មិនខ្វល់ពីមនុស្សជុំវិញខ្លួនគាត់ទេ យ៉ាប់ណាស់ចូលចិត្តឲ្យគេជេរ ទើបដេកលក់”។
រ៉ាប៊ី ត្រូវបានគេស្គាល់ច្បាស់តាមរយៈការល្បីចម្រៀង១បទ គឺ ”មាន់ស្រែ” សម្រាប់បុណ្យចូលឆ្នាំខ្មែរនេះ ដោយអ្នកចម្រៀងរូបនេះបានឲ្យដឹងថា គ្រាន់តែបទនេះចេញជា Audio ត្រឹមតែជាង១សប្ដាហ៍នោះ ក៏មានអ្នកចូលមើលជិត១០លាននាក់ឯណោះ ដែលធ្វើឲ្យនាងសប្បាយចិត្តជាខ្លាំង ព្រោះរំពឹងថា បទនេះនឹងត្រូវបានគេចាក់រាំលេងកម្សាន្ដនៅឱកាសបុណ្យចូលឆ្នាំខ្មែរ ខាងមុខនេះ ច្រើនជាមិនខានឡើយ។
ដោយឡែកពេជ្រ សោភា ធ្លាប់ល្បីល្បាញខ្លាំង២ឆ្នាំជាប់គ្នា សម្រាប់បុណ្យចូលឆ្នាំខ្មែរ២០១៦ ល្បីបទ ”រាំញីកែងជើង” ជាមួយដេវីត និងឆ្នាំ២០១៧ ល្បីបទ ”ឆ្កែរត់បុកប៉ោត”។ ចំណែកឆ្នាំ២០១៨នេះ ចេញបទ ”បីឆ្កែទៅរាំ” ដែលរំពឹងថា នឹងទទួលបានការគាំទ្រដែរ ប៉ុន្តែសន្ទុះបទនេះបើប្រៀបធៀបជាមួយបទ ”មាន់ស្រែ” របស់នាងរ៉ាប៊ី ហាក់ចាញ់ប្រៀបឆ្ងាយ ទើបធ្វើឲ្យអ្នកលេងបណ្ដាញសង្គម Facebook បានលើកឡើងថា រ៉ាប៊ី នឹងផ្ដួលពេជ្រ សោភា ថ្ងៃបុណ្យចូលឆ្នាំខ្មែរ។
រ៉ាប៊ី បានហោះទៅច្រៀងសម្ដែងនៅអាមេរិក ជាលើកទី១ តែម្នាក់ឯង ដោយសារប៊ុត សីហា អាក់ខានរួមដំណើរកាលពីថ្ងៃទី១៥ ខែមីនា ឆ្នាំ២០១៨ តាមរយៈអង្គការ “I Care” ដោយតាមគម្រោងត្រូវច្រៀង៥សប្ដាហ៍ នឹងវិលវិញក្រោយបុណ្យចូលឆ្នាំខ្មែរ។
អ្នកចម្រៀងថោន រូបនេះ នឹងចេញសម្ដែងលើកដំបូងនៅថ្ងៃទី២៣ ខែមីនា នៅរដ្ឋមីននីសូតា ព្រមទាំងច្រៀងនៅរដ្ឋ១១ផ្សេងទៀត ដែលមានរដ្ឋខ្លះត្រូវចាប់ដៃជាមួយនៅ ស៊ីនឿន ដូចជា រដ្ឋអាត្លង់តា, ឡុងប៊ិច, ប្រូវីដិនស៍, ភីឡាដែលហ្វី, ស្តុកតុន, ដាឡាស៍, ជែកសុនវៀល, ឡូវែល, វើរជីនៀរ ,ហោសស្តុន និងអូហៃយ៉ូ៕
