យូរី ស្អិតល្មួតសង្សារថ្មី

តារាចម្រៀងលេងក្បាច់រាំ កញ្ញាសេន យូរី ដែលមានគេស្គាល់ច្រើនតាមរយៈបទ “ចាក់ទឹកដូង” កាលពីអំឡុងបុណ្យចូលឆ្នាំខ្មែរ ២០១៧ តែត្រូវបានអតីតសង្សារបំបាក់មុខ ដោយបញ្ចោញរូបភាពស្រើបស្រាលលើគ្រែ ព្រោះក្តៅក្រហាយបោះបង់លោក ទៅភ្ជាប់ស្នេហ៍ថ្មី សង្សារក្មេងជាដៃគូចម្រៀង លោក Bmo Trapz នោះ ពេលនេះចំណងស្នេហ៍ថ្មី យូរី ហាក់គ្មានឧបសគ្គរារាំងទៀតទេ ព្រោះថា អតីតគូស្នេហ៍ក៏លែងតាមព្យាបាទទៀតដែរ ទើបធ្វើឱ្យយូរី កាន់តែស្អិតល្មួតជាមួយប្រុសក្មេងជាសង្សារថ្មី…។

តាមរយៈបទ “ចាក់ទឹកដូង” ធ្វើឱ្យនាងយូរី ត្រូវបានគេស្គាល់ច្បាស់ជាងមុន តែភ្លាមៗនោះ អ្នកចម្រៀងតូចច្រឡឹងរូបនេះបាក់មុខ ស្ទើរតែមិនអាចងើបរួចឡើយ នៅពេលដែលត្រូវអតីតសង្សារ លោក “រ៉េត” ទម្លាយរូបភាពស្នេហាស្រើបស្រាលលើគ្រែ នាំឱ្យផ្អើលពេញផ្ទៃប្រទេស ព្រោះតែស្នេហាដ៏ចម្រូងចម្រាស ដែលលោកអ្នកដឹកនាំសម្តែងខារ៉ាអូខេរូបនោះថា យូរី ជាស្រីស្នេហ៍លោក តែពេលល្បី បែរជាទៅភ្ជាប់ស្នេហ៍ជាមួយប្រុសក្មេងលោក Bmo Trapz ដែលជាដៃគូចម្រៀងនោះ។

យូរី តែងព្យាយាមគេចចេញពីការសម្ភាសន៍របស់អ្នកកាសែត ព្រោះខ្លាចគេសួរនាំរឿងបានថ្មី ចោលចាស់នោះ តែចំពោះអ្នកគាំទ្រតារាចម្រៀងសាន់ដេ រូបនេះ បាននិយាយការពារអ្នកចម្រៀងរបស់ពួកគេថា នេះមិនមែនមានតែយូរី ម្នាក់ទេ ដែលពេលល្បី បែកបាក់សង្សារចាស់នោះ គឺមានច្រើនតារាទៅហើយ ចុះម៉េចបានមិននិយាយផងទៅ?

ទោះជាយ៉ាងណា ពេលនេះ យូរី មិនត្រូវបានអតីតគូស្នេហ៍តាមហួងហែងទៀតឡើយ នាពេលចុងក្រោយនេះ អ៊ីចឹងហើយបានជាគេឃើញនាង និងលោក Bmo កាន់តែបង្ហាញភាពល្អូកល្អិនគ្នា ដោយតារាចម្រៀងរួមអាជីពបានហៅថា ដូចប្តីប្រពន្ធទៀតផង។

ប្រភពបានឱ្យដឹងថា នាងយូរី កាលសាងស្នេហ៍មុន ជាមួយលោករ៉េត គឺត្រូវបានអតីតអ្នកដឹកនាំសម្តែងខារ៉ាអូខេរូបនេះ ជួយលើកស្ទួយតាមរយៈការស្វែងរកទីតាំងប្លង់ល្អៗ ដើម្បីឱ្យការថត MV បទចម្រៀងនោះមានការចាប់អារម្មណ៍ តែពេលភ្ជាប់ស្នេហ៍ថ្មីជាមួយប្រុសក្មេង Bmo ពេលនេះ គឺត្រូវអ្នកចម្រៀងរូបនេះជួយធ្វើបទភ្លេង និងចម្រៀងឱ្យទៀត អ៊ីចឹងស្រីស្រស់រូបនេះអាចនឹងមានសង្ឃឹមថា អាចស្តារកេរ្តិ៍ឈ្មោះរបស់ខ្លួនឡើងមកវិញបាន បន្ទាប់ពីរងភាពអាម៉ាស់ស្ទើរតែពិបាកប្រឈម នាពេលកន្លងមកនោះ។

ដោយឡែក អ្នកគាំទ្រតារាចម្រៀងយូរី បានឱ្យដឹងថា យូរី និងលោក Bmo មានការចុះសម្រុងគ្នាបានល្អណាស់ ទាំងការសម្តែងក្នុងនិងក្រៅឆាក អ៊ីចឹងគូស្នេហ៍ដែលមានវ័យប្រហាក់ប្រហែលគ្នានេះ គឺនឹងមិនអាចអត់គ្នាបានឡើយ ព្រោះថា ពួកគេត្រូវការគ្នាទៅវិញទៅមក ដែលមិនអាចខ្វះគ្នាបានទេ។

ប្រភពបានឱ្យដឹងថា តាំងពីធ្លាយរឿងស្នេហ៍យូរី និងលោករ៉េត ម៉្លេះ គឺនាងយូរី មានបុរសមានទ្រព្យមិនតិចនាក់ឡើយ តាមរយៈការដាក់អន្ទាក់ស្នេហ៍អតីតអ្នកចម្រៀងផលិតកម្ម Rock នេះ តែកាលនោះ យូរី ត្រូវបានសង្សារចាស់ហួងហែងខ្លាំងណាស់ ទើបប្រុសទាំងនោះមិនអាចឆក់ស្នេហ៍នាងបានឡើយ។ ដោយឡែកការភ្ជាប់ស្នេហ៍ថ្មីជាមួយដៃគូចម្រៀងនាពេលនេះ ប្រភពបានឱ្យដឹងថា ពួកគេសច្ចាស្មោះស្មគ្រ័ស្នេហាជាមួយគ្នា ពោលគឺបើនៅសាន់ដេ គឺនៅជាមួយគ្នា តែបើចេញ ក៏ត្រូវចេញជាមួយគ្នាដែរ ហេតុនេះហើយតារាវ័យក្មេង១គូនេះ នឹងពិបាកធ្វើឱ្យមានអ្នកជ្រៀតជ្រែកស្នេហ៍ដូចគូស្នេហ៍តារាចម្រៀងមួយចំនួន ដែលផ្អែមល្ហែមតែដំបូង ក៏ត្រូវបានអំណាចទឹកលុយបំបែកកណ្តាលផ្លូវ ហើយអ្នកដែលឈឺចាប់ គឺខាងប្រុសដែលជាអ្នកជួយជ្រោមជ្រែងនោះ។

មហាជនបានចាប់អារម្មណ៍ថា ក្រៅពីនាងយូរី និង Bmo នោះ តារាចម្រៀងដែលសាងស្នេហ៍ក្រោមដំបូលតែមួយ គឺមាននាងទេព បូព្រឹក្ស និងងួន ចាន់ដេវីដ ផងដែរ ដែលពួកគេមិនត្រឹមតែបង្ហាញភាពល្អូកល្អិនជាមួយគ្នាទេ តែថែមទាំងសន្សំលុយចូលគ្នារកស៊ីធំទៀតផង។ ប្រភពបានឱ្យដឹងថា ទោះជាប៉ះរឿងអាស្រូវស្នេហ៍ស្ពឹកមុខ ដោយត្រូវអតីតសង្សារបកអាក្រាតក៏ដោយ តែនាងយូរី នៅតែមានផលិតកម្មធំមួយចង់ចែចូវឱ្យនាងចូលជាសមាជិករបស់ខ្លួនដែរ តែផលិតកម្មសាន់ដេ ចង់រក្សាតារាលេងក្បាច់រាំរបស់ខ្លួននេះ ដោយមិនចង់ឱ្យទៅផលិតកម្មជាគូប្រជែងឡើយ អ៊ីចឹងហើយបានជាផ្តល់សិទ្ធិឱ្យយូរី ធ្វើបទចម្រៀងជាមួយសង្សារនាងតាមចិត្តចង់។

ប្រភពពីអ្នកដឹកនាំកម្មវិធីប្រគំតន្ត្រីមួយចំនួន បានឱ្យដឹងថា យូរី បាត់បង់ទីផ្សារច្រើន តាំងពីផ្ទុះរឿងអាស្រូវមក ហើយម៉្យាងទៀត អ្នកចម្រៀងរូបនេះមិនអាចប្រជែងទីផ្សារជាមួយនាងទេព បូព្រឹក្ស បានទេ ខណៈនាងរ៉ាប៊ី របស់ថោន ដែលលោតឡើងនោះ ក៏ជាចំណែកធ្វើឱ្យនាងយូរី ពិបាកស្ទុះឡើងដែរ៕