សម្រាប់ឆ្នាំ២០១៨ នេះ តារាល្បីៗកាន់តែច្រើនប្រជែងគ្នាក្នុងការលេងម៉ូដរថយន្តថ្លៃកប់ពពក ដែលក្នុងនោះ មានតារាស្រីស្អាត៤ដួង កំពុងជិះរថយន្ត Lexus LX 570 តម្លៃស្មើវីឡា១នោះ គឺសឿ សុធារ៉ា, លី ម៉ារីណា, ម៉ាក សែនសូនីតា, ពៅ លីដា និងគង់ វង្សយ៉ាទី…។
ពៅ លីដា ៖ ស្រីស្អាតពៅ លីដា ថ្មីៗនេះ ទើបតែបង្ហាញរថយន្តទំនើបកប់ស៊េរី Lexus LX 570 ស៊េរីឆ្នាំ2018 តម្លៃជាង20ម៉ឺនដុល្លារ គ្មានតារាណាអាចប្រដូចនាងបានទេ។
សឿ សុធារ៉ា ៖ ពេលនេះមានកូន2នាក់ហើយ គឺកូនស្រីសាពូន ដារ៉ាពិមាន និងកូនប្រុស សាពូន តារាបុរស ដែលការសម្រាលកូនប្រុសទី2 នេះ អាចធ្វើឱ្យឱ្យអាជីពសិល្បៈកាន់តែធ្លាក់ចុះទៅថែមទៀត ឬឈានទៅបញ្ចប់អាជីពចាស់នេះតែម្តង ព្រោះថា តាំងពីសឿ សុធារ៉ា ដឹកដៃសាពូន មីដាដា រៀបការកាលពីឆ្នាំ2009 មក អតីតអ្នកសម្តែងឈានដល់កម្រិតកំពូលរូបនេះ បាត់បង់សកម្មភាពសិល្បៈស្ទើរតែទាំងស្រុង ហើយចូលកម្មវិធីមិត្តភក្តិរួមអាជីព ដោយលឹបលៗប៉ុណ្ណោះ។ ប៉ុន្តែ ក្រោយមានកូនទី2 នេះមក លោកសាពូន មីដាដា ហាក់សប្បាយចិត្តក្រៃលែង ព្រោះថា មន្ត្រីធំគ្រាក់ៗដែលធ្លាប់តែគ្រឺតក្នាញ់សាច់សខ្ចីភរិយាលោក និងមានប្រុសខ្លះចង់ឱ្យសុធារ៉ា លែងប្តីមីដាដា ដើម្បីបានតំណែងជាជំទាវនោះ ចាប់ផ្តើមដកខ្លួនថយទៅវិញអស់ ទើបធ្វើឱ្យមីដាដា ដែលមមាញឹករឿងនយោបាយនោះ បានដេកលក់ស្រួលវិញ លែងខ្លាចគេឆក់ប្រពន្ធទៅបាត់។ ទោះជាយ៉ាងណា តារាសិល្បៈរួមអាជីព និងមហាជន នៅតែមានការសង្ស័យថា ហេតុអីបានជាសុធារ៉ា ដែលស្ងប់ស្ងាត់អាជីពសិល្បៈ ដូចចោរលួចសេះនោះ បែរជាមានលុយទិញរថយន្តទំនើប Lexus LX570 ពណ៌ស ស៊េរីឆ្នាំ2015 តម្លៃជាង18ម៉ឺនដុល្លារ នោះ ជិះទៅវិញ? ខណៈដែលធ្លាប់លេចឮថា ការសាងសង់ផ្ទះរបស់នាងនៅទួលទំពូង នោះ ដោះបំណុលធនាគារ មិនទាន់រួចផង។
លី ម៉ារីណា ៖ តារាខ្ពស់ស្រឡះរូបនេះ បានចេញទៅរស់នៅអាមេរិក តាមប្តីនាងលោកសាត ចាន់ថន រយៈពេល3ឆ្នាំ ក្រោយមានដំណឹង ដោយចម្រូងចម្រាសថា មង្គលការរបស់នាងកាលពីឆ្នាំ2013 នោះ ជាការរៀបចំក្លែងក្លាយ ក្រោយផ្ទុះរឿង នាងត្រូវភរិយាមន្ត្រីធំម្នាក់ព្រមាន។
ម៉ារីណា ដែលមានកូនប្រុសម្នាក់ ឈ្មោះសាត ថៃសាន់ អាយុជាង3ឆ្នាំនោះ បានវិលត្រឡប់មករស់នៅស្រុកខ្មែរវិញ កាលពីចុងឆ្នាំ2016 ហើយបន្តប្រឡូកអាជីពសិល្បៈវិញ ដោយឈានចូលថតឱ្យផលិតកម្មរស្មីហង្សមាស រឿង “រាជិនីភូមិគ្រឹះ” និងរឿង “ពស់កេងកង”។ ស្វាមីម៉ារីណា បានចុះឡើងៗពីអាមេរិក មកស្រុកខ្មែរ ដោយរកស៊ីជាអ្នកទទួលបញ្ញើអីវ៉ាន់ ហើយស្របពេលដែលប្តីមិនសូវនៅជិតនេះ ម៉ារីណា ក៏បញ្ចោញរថយន្តទំនើប ដោយជិះ Lexus LX570 ពណ៌ស ស៊េរីឆ្នាំ2015 តម្លៃជិត20ម៉ឺនដុល្លារ ជិះយ៉ាងកាលីប ធ្វើឱ្យតារាជាច្រើនស្រឡាំងកាំងខ្លាំងដែរ។
ការបង្ហាញទ្រព្យរបស់លី ម៉ារីណា នៅពេលនេះ ចំពេលដែលមានព័ត៌មានថា ម៉ារីណា ដែលមានកូនមួយទៅហើយនោះ តែនាងមានមន្ត្រីធំផ្កាយ3ម្នាក់ តាមស្នេហ៍ដដែល ទើបធ្វើឱ្យប្តីនាងភ័យបុកពោះ។
ម៉ាក សែនសូនីតា ៖ ឡូយឆាយខ្លាំងណាស់ដែលនៅវ័យក្មេងខ្ចីសោះ តែមានទ្រព្យក្នុងកណ្តាប់ដៃ សែនដុល្លារឯណោះ។ ស្រីស្អាតតូតា រូបនេះ បានបោះបង់ចោលស្នេហ៍ប្រុសក្មេង លោកទឹម នីដា ហើយមកភ្ជាប់ស្នេហ៍ជាមួយបុរសពោះម៉ាយ ថៅកែផលិតកម្ម Angkor Picture លោកប៉ូល វិបូរ ហៅនីត ដោយពេលនេះ ពួកគេរួមរស់ក្រោមដំបូលផ្ទះតែមួយ ដូចប្តីប្រពន្ធអ៊ីចឹង ក្រោយពីបានចូលហ៊ុនគ្នា ដោយដាក់ទុនជិត50ម៉ឺនដុល្លារ គ្រោងបើកហាង “ផែសមុទ្រ” ឱ្យបាន12សាខានៅគ្រប់ខណ្ឌទាំងអស់ ក្នុងរាជធានីភ្នំពេញ។ តូតា បានទិញរថយន្ត Lexus LX450d ស៊េរីឆ្នាំ2017 ពណ៌ស តម្លៃ17ម៉ឺនដុល្លារ ដែលគេជឿថា មិនមែនជាកាដូរបស់លោកនីត ឡើយ។ អ្នកសិល្បៈជាច្រើនបាននាំគ្នាខ្សឹបខ្សៀវគ្នាថា តូតា មានថៅកែសណ្ឋាគារមួយស្រលាញ់ខ្លាំង និងជះលុយជាច្រើនលើនាង ទើបគេសង្ស័យថា ប្រុសចំណាស់នោះជាម្ចាស់កាដូឡានទំនើបនេះ តែតូតា ថា លុយទិញរថយន្តនោះ បានមកពីកម្លាំងញើសឈាមរបស់នាង និងគ្រួសារនាងជួយលុយខ្លះ។
គង់ វង្សយ៉ាទី ៖ នៅឆ្នាំ2018 នេះ ស្រីស្អាតសាច់សខ្ចីរូបនេះឡើងកូដដល់កំពូល គឺជិះ Lexus LX570 ពណ៌ខ្មៅ ស៊េរីឆ្នាំ2016 តម្លៃខ្ទង់22ម៉ឺនដុល្លារ។ តារារួមអាជីពជាច្រើនរួមទាំងបុគ្គលិកនៅ CTN មានភាពស្រឡាំងកាំងពេលឃើញយ៉ាទី ជិះ ឡាន1គ្រឿង ស្មើវីឡា1នេះ ដោយអ្នកខ្លះបានចាត់ទុកថា យ៉ាទី មានសំណាងទៀតផង។ ប៉ុន្តែ យ៉ាងណា ការលេងម៉ូដឡានរបស់នាងយ៉ាទី នៅពេលនេះ គឺចំពេលដែលមានព័ត៌មានល្បីសុសសាយថា ពិធីការិនីរូបនេះមានមន្ត្រីធំផ្កាយ3ម្នាក់ តាមស្នេហ៍នាងយ៉ាងស្អិត ក្រោយពេលដែលនាងយ៉ាទី បានប្រកាសថា បើមានប្រុសណាហ៊ានទិញឡាន Lexus LX570 ជាថ្នូរស្នេហា នាងសុំពេលពិចារណាមើលសិននោះ ទើបធ្វើឱ្យគេរឹតតែសង្ស័យថា នាងយ៉ាទី លោតឆត្រចូលទ្រុងស្នេហ៍ ព្រោះ Lexus LX570 ទៅហើយ។
ប៉ុន្តែក្នុងបទសម្ភាសន៍កន្លងមក យ៉ាទី ថា ក្នុងរដូវត្រូវប៉ាន់ នាងអាចរកប្រាក់ចំណូលបានរាប់ពាន់ដុល្លារ ក្នុង1ខែៗ ព្រោះធ្វើពិធីការិនីតាមខេត្តម្តង ស៊ីថ្លៃ800 ដុល្លារ ហេតុនេះមិនចាំបាច់មានប្រុសចិញ្ចឹមឡើយ។
ក្រៅពីតារាស្រីទាំង5ខាងលើ ដែលកំពុងតែបញ្ចោញភាពហ៊ឺហាជិះរថយន្ត Lexus LX570 ផ្អើលអស់មហាជននោះ តារាផ្សេងទៀតដែលជិះឡាន Lexus LX570 ដែរ មានដូចជា អ្នកនាងចាន់ សុធារ័ត្ន, ខេមរៈ សិរីមន្ត, ករុណា ពេជ្រ និងសុគន្ធ ថេរ៉ាយុ៕