អតីតតារាចម្រៀងផលិតកម្ម Blue diamond និង M នាងសុខ សីឡាលីន លេចមុខលើឆាកតន្រី្ដ “ខារ៉ាបាវ Spark Concert 2018” ជាលើកដំបូង កាលពីថ្ងៃទី២៥ ខែមីនា ដែលធ្វើឲ្យអ្នកទស្សនាផ្ទាល់ហ៊ោកញ្ជ្រៀវពេញឆាកតន្រ្ដីតែម្ដង ព្រោះតែអ្នកចម្រៀងរូបនេះលេងក្បាច់រាំសាហាវដូចប្រុសអីចឹង ជាមួយស្ទីលគ្រងអាវដៃវែងពីលើ ហើយបញ្ចេញក្បាច់ពិសេស ឡើងរង្គើឆាកនៅស្ប៉ាក។
តារាចម្រៀងផលិតកម្មរស្មីហង្សមាស រូបនេះ ច្រៀងបទ ”ស្នេហ៍ដល់ទីបញ្ចប់”, ”Stupid Love”, ”បងលែងSweet” និងបទ ”ប្ដីដែលអូនប្រាថ្នា”។
សុខ សីឡាលីន និយាយថា “នាងមានអារម្មណ៍រំភើបពេលបានមកច្រៀងលើឆាក “ខារ៉ាបាវ Spark Concert 2018” នេះ ហើយជាពិសេស គឺពេលប្រកាសរកប្ដីដែលនាងប្រាថ្នានោះ គឺស្រាប់តែមានអ្នកលើកដៃច្រើន ក្នុងនោះរួមទាំងពិធីករលោកឆានី ផងដែរ ដែលចង់ធ្វើជាប្ដីរបស់នាង តែសុំទោសហើយ គឺត្រូវការពិនិត្យឲ្យបានច្បាស់លាស់ជាមុនសិន មុននឹងព្រមជឿថា បងជាមនុស្សល្អ។
សុខ សីឡាលីន ហាក់នៅទ្រឹងពេលទៅដលើទ្រនំធំផលិតកម្មរស្មីហង្សមាស ពិសេសនៅពេលដែលហង្សមាស យកនាងវី ឌីណែត ចូលហង្សមាស ដែរនោះ ធ្វើឲ្យអ្នកចម្រៀងរូបនេះមានទីផ្សារកាន់តែចង្អៀត ព្រោះថា ឌីណែត ច្រៀងសំឡេងខ្លាំងជាង ទាំងបទជាភាសាអង់គ្លេសនិងខ្មែរ។ ម្យ៉ាងទៀតការឆ្មើងឆ្មៃនាពេលកន្លងមក ជាមួយអ្នកសារព័ត៌មាន ក៏ធ្វើឲ្យអ្នកចម្រៀងមានកាយវិការដូចប្រុសរូបនេះ មិនសូវមានមុខលើបណ្ដាញសារព័ត៌មានដែរ ដែលខុសពីតារាចម្រៀងផ្សេងៗទៀតរបស់ផលិតកម្មរស្មីហង្សមាស។ ដោយឡែក ចំណងស្នេហ៍ជាមួយអ្នកភ្លេងនៅ CTN ដែលដើរដល់ទីបញ្ចប់ ហើយអ្នកចម្រៀងលេងខ្លួនដូចបរទេសរូបនេះ មកភ្ជាប់ស្នេហ៍ជាមួយប្រុសសង្ហា លោកជេមី នោះ ក៏មិនទៅមុខដែរ ហេតុនេះហើយ សីឡាលីន ចេះតែព្យាយាមគេចចេញពីការសាកសួររបស់អ្នកកាសែត។ អ្នកចម្រៀងដែលចូលចិត្តច្រៀងបទជាភាសាអង់គ្លេស ជាងខ្មែរ ហើយរត់ទៅកែសម្រស់នៅហាងឌែម៉ូគ្លីនិករូបនេះ មានទម្រង់មុខកាន់តែប្លែក និងខុសពីមុនពេលឡើងឆាកតន្ដ្រីចុងក្រោយនេះ រហូតមានអ្នកខ្លះមើលនាងសឹងតែមិនស្គាល់ទៀតផង។
ក្រៅពីនាងសុខ សីឡាលីន នោះ កម្មវីធីប្រគំតន្រ្ដី “ខារ៉ាបាវ Spark Concert 2018” ក៏មានការចូលរួមពីតារាមួយចំនួនទៀតដែរ មានដូចជា តារាចម្រៀងផលិតកម្មថោន កញ្ញាស៊ូ ស៊ីរីកា ច្រៀងបទ ”ទាសករស្នេហ៍”, ”Look What We do”, ”ឧបសគ្គស្នេហ៍”។ ចំណែកលោក Hak Record ច្រៀងបទ ”យើងសំរាកទៅ”, ”មេឃកំពុងភ្លៀងហើយ” និងបទ ”អាម៉ាប់ឆាប់មកវិញណា”។ ចំណែកតារាកិត្តិយសលោកខៀវ ប៊ុនលាភ ច្រៀងបទ ”យប់ឡើងខ្ញុំតែងតែSad”, ”Sexy Girl”, ”បើស្នេហ៍បងចូលស្ដី” និងបទ ”ចេកចៀនហុយៗ”៕
